Yobkwi 119 - NTSHOB NSI

Nsà mba kàn Nsi

¹ Ghafen b'a ben tse manze yub mbwô, ben tse bo be nzin mb'a be mum ntshù' là!

² Ghafen b'a ben tse bo be ntshùb kwénta tse, ben tse bo be ndiag Tshùaben njoṅ ngô ntù yub fa,

³ ghafen b'a ben tse bo ke' be ghù nukebwô, là, nke nzin num manze Tshùaben nà.

⁴ A b'a wù na' njab ntshù' mu, ndù bo ke nze njoṅ i fa mebwô.

⁵ A bwô ndù njoṅ tshàm manze fa bwô, ndù me ze njoṅ nkàn mu fa!

⁶ Ndùlala mba tuswe ke nsi ko àm ngelaṅ me nsi lôte ntshù' mu là.

⁷ Me nsi ke ghamt'o ntùm ntù nenùne, mba njoṅ ntù àm fa, ngelaṅ me nsi zi'te tsho tsho'te ntsha ts'a tsin nà.

⁸ Me nsi ze nkàn mu, kà ghua' àm matmat.

⁹ Be nguanmèn lànte ze manz'a ndùke? A b'a neke nze ntshù' mu.

¹⁰ Me lo diag o njoṅ ngô ntù àm fa, kà bam ndù me nèn ngùanesà mbaṅ ntshù' mu.

¹¹ Me lem ntshob mu ntùm ntù àm, ndùlala ndù kà me ghù nukebwô num o.

¹² Tshùaben, ghamte be wù, zi't'àm nkàn mu!

¹³ Me be nsiaṅte njoṅ tsho'te ntsha fa ts'a tum ntshu o là num nkub ntshu màm.

¹⁴ Me b'a ntùm tsiaṅte num manze kwénta o, mbe ntùm bwe mebwô ntshùa ntùm fu'.

¹⁵ Me nsi kwate nu num nkàn mu, ke te lag be num tsho manze.

¹⁶ Me ke ngù yôg mebwô à ntùm ntshù' mu, me ke nsi lagte ntshob mu.

¹⁷ Ghù numebwô ngafa' o, ndù me yôge, nke ntshob ntshob mu.

¹⁸ Ké' miag màm ndù me lôte mfa' ntshù' mu mi netshàme.

¹⁹ Me b'a ntshùanze num nsitsha'a, kà lem àm ntshù' mu.

²⁰ Ntù àm be nkù, nke nkô tsho tsho'te ntsha njoṅ ndù fa.

²¹ O be mbàbte ghako'tewut, tshen ghandon nà tse bo tsin tà ngùanesà mbaṅ ntshù' mu là.

²² Bù' tshabte mba wag num àm, nummbe me be ntshùb yu kwénta.

²³ Ke kamkam tse'te num àm no, mba ngafa' o nsi kwate nu num nkàn mu.

²⁴ Me ke ngù yôg mebwô à ntùm ntag mu, ntshù' mu mbit b'a tshàm ghafà ntage.

²⁵ Ntù àm ṅab num mbabe, ghù me yôg à mb'a be mum ntshob mu là.

²⁶ Me be nsoṅ njoṅ tshàm manze fa, o ju' mbùnte me. Tswit'àm ntshù' mu.

²⁷ Ghù me ju' manze ntshù' mu, ndùlala me nsi kwate nu mum mfa' mu mi nekuni.

²⁸ Ntù àm ke' be zi miaglo num nenywine, bù't'àm mb'a mum ntshob mu là.

²⁹ Lo' manze tatte nèn yi ngùanesà mbaṅ àm, ko ndèn màm njam ntshù' mu.

³⁰ Me lo tsho' manze nenùn njab ntshù' mu num miag màm.

³¹ Me ṅab num yu kwénta, Tshùaben, kà ghù tuswe ko àm.

³² Me so nde num manze nkàn mu, nummb'o gha'te ntù àm.

³³ Tshùaben, tswit'àm manze ntshù' mu, ndù me ghô num bwe tà nèn miagte.

³⁴ Fà zenu me, ndù me lé' ntshù' mu, mbèn nz'é njoṅ ntù àm fa.

³⁵ Tshagt'àm num manze ntshù' mu, nummbe me be nju' mebwô num bwe.

³⁶ Fà ntù àm num ntshù' mu, ke b'a num nda' ntum.

³⁷ Tsho' miag màm num tshu banban, ngù me ke njôg num yu manze.

³⁸ Ghù ndù nka'ni o bumte num ngafa' o, nka'ni z'a b'a num ben tse bo be mbwôg o là.

³⁹ Lo' tshabte ze me tshwèt mbwôg là nèn yi ngùanesà mbaṅ àm! Nummbe tsho tsho'te ntsha bwô neshu.

⁴⁰ Tshù, me be nkô neze ntshù' mu. Ghù ndù me tshùa njam yu nunetsin njôge.

⁴¹ Tshùaben, a bwô ndù kondèn o se' num àm, mba yôg s'a fe wù là, mb'a be num nka'ni o là.

⁴² Me nsi bùnte ta' ntshob ntshù' mèn z'a be ntshabt'àm nà, nummbe me yab ntù àm num ntshob mu.

⁴³ Kà sô ntshob nenùn ntshu àm, nummbe me be nywinte num tsho tsho'te ntsha.

⁴⁴ A bwô ndù me ze ntshù' o ke bot njoṅ ndù fa, nz'é matmat.

⁴⁵ Me nsi be zin gha'te wul àm, nummbe me lo diag ntshù' mu.

⁴⁶ Me nsi tshob kwénta o mbwe fenfen, me ke nsi ko tuswe bwe.

⁴⁷ Ntag mu be ngù me tswe tshàm mebwô, me be nkô ntag mu neshu.

⁴⁸ Me be mbù' mbu màm ntshag ntag mu mi me be nkô là tù, me be nkwate nu num ntshù' mu.

⁴⁹ Kwimte nka'ni z'o ghù ngafa' o, z'o be ntshùa bwe ngù me nke nywinte là.

⁵⁰ Nka'ni o nsi ghù me yôge. Yen nà b'a yàm fitentù ntùm nge' àm.

⁵¹ Ghako'tewut be ntshabt'àm, là me ke' fiag ku num ntshù' o.

⁵² O Tshùaben, me be nkwimte tsho tsho'te ntsha ts'a be mbwe là, mfite ntù àm yàm tu.

⁵³ Tshùagntù be ndiag nezwi àm num ghatshùagntù, tse bo ghua' ntshù' o là.

⁵⁴ Ntshù' mu b'a njobkwi me ntùm ndà ze me be ngùn bwe là.

⁵⁵ Tshùaben, me be nkwimte lén so tèttswe'; nke nze ntshù' o.

⁵⁶ Ju z'a ku'ni num àm nà, b'a ndù me ze ntshù' mu!

⁵⁷ Tshùaben, m'a tshob ndù: Ju z'a ku'ni num àm nà b'a ndù me ze ntshob mu.

⁵⁸ Me be ntsiaṅ o njoṅ ntù àm fa mum yàm le'te. Ko ndèn màm mb'a be ntùm nka'ni o là.

⁵⁹ Me lôte manze tshàm fa, mbèn njam mum ntshù' mu.

⁶⁰ Me be nànte, ke ghubte neze nkàn mu.

⁶¹ Nzwit ghatshùagntù lam àm mbume. Me ke lagte ntshù' o.

⁶² Me be ndo nsi tshaṅ tèttswe' nenyàmt'o; mba num tsho'te ntsha ts'a be tse yu nunetsin nà,

⁶³ me b'a nshun ben tse bo be mbwôg o là, mba ben tse bo be ndé' ntshù' mu là.

⁶⁴ O Tshùaben, nsitsha' dun kondèn o. Tswit'àm ntshù' mu.

⁶⁵ O lo ghù numebwô ngafa' o, Tshùaben ngù a mb'a ntùm nka'ni o là.

⁶⁶ Tswit'àm njam ntshob mba zenu, nummbe me be mbam ntshù' mu.

⁶⁷ Me lo be lo' wul àm nèn yi nsi, ndù m'a ke mfàn nze. Ndonni me be nze ntshob mu.

⁶⁸ O b'a mèn mebwô, nke ngù mebwô, tswit'àm ntshù' mu.

⁶⁹ Ghako'te wut be nkwate ba tatte num àm, tu wul àm, me nke ndé' ntshù' mu njoṅ ntù àm fa.

⁷⁰ Ntù yub sag mba nzit ṅab bwe là, tu wul àm, me ke ngù yôg mebwô à ntùm ntshù' o.

⁷¹ Mebwô be m'a nefà wul àm nsi, ndùlala ndù me zi'te ntshù' mu.

⁷² Ntshù' a tum ntshu o là be me mebwô ntshùa gol ntsha' mbùm, ke nkàb ntsha' mbùm no.

⁷³ Mbu mu lo nabt'àm, a lo bomt'àm; fà zenu me, ndù me zi'te nkàn mu.

⁷⁴ Ben tse bo be mbwôg o là be njen àm nke ntsiaṅte, nummbe me be nywinte num nka'ni mu.

⁷⁵ O Tshùaben, me lèn ndù tsho tsho'te ntsha tsin. O tshùa njam nenùn kà ngù me mfà wut nsi.

⁷⁶ A bwô ndù kondèn o be yàm fitentù, mb'o na' nka' ngafa' o là!

⁷⁷ A bwô ndù kondèn o be me, ndù me yôge; nummbe me ke ngù yôg mebwô à ntùm ntshù' o.

⁷⁸ A bwô ndù tuswe ko ghako'tewut tse bo be ngùtni àm ke ntun nà. Tu wul àm, me be nkwate nu num ntshù' mu.

⁷⁹ A bwô ndù ben tse bo be mbwôg o là se' me, mba ben tse bo lèn ntshù' mu là.

⁸⁰ A bwô ndù ntù àm ze ntshù' mu kua' mebwô, ndùlala ndù kà tuswe ko àm!

⁸¹ Ntù àm nsi kù neyen yôg s'a fe wù là; me be nywinte num nka'ni o.

⁸² Miag màm nsi b'a be num nka'ni o. Me nsi ke bètte ndù: O nsi fite ntù àm à ndùke?

⁸³ Mba mba me be mba ntu' ze bo yab nzembwôge, nzembwôg sèn i là, me ke' lagte ntshù' mu.

⁸⁴ Tse lé'njù ngafa' o nsi tswe tà kum à ndùke? O nsi naṅ ntsha tu ben tse bo be ntsho' nku màm kebàn n'à ndùke?

⁸⁵ Ghako'te wut tswe' ntô mbwe àm, bo ke' be ghù à mb'a be ntùm ntshù' o là.

⁸⁶ Njoṅ nkàn mu fa b'a be nenùne. Bo ke ntsho' nku màm kebàn à ke ntun mi. Ywimt'àm.

⁸⁷ Bo lo yôg nyiaṅt'àm, njôg biagt'àm; tu wul àm, me ke' ghua' ntshù' mu.

⁸⁸ Yôg àm njam kondèn o, ndù me ke nze ntshù' mi a tum ntshu o là.

⁸⁹ O Tshùaben, njoṅ ndù fa ntshob mu be ntswe mfe kamànyam.

⁹⁰ Yu nenùn be ntswe ngu'ngu'. O te tsha'a, a féb nga nsi.

⁹¹ Njoṅ yub fa ke' ntùn à njam ntshù' mu, nummbe njoṅ yub fa b'a ghafa' tsho.

⁹² A lo mbe ndù me ke' ghù yôg mebwô ntùm ntshù' o, mba m'a bi ntùm nge' àm.

⁹³ Be me ke zi ndagte nkàn mu, nummb'o ke ntshùa njam bo kà ngù me njôge.

⁹⁴ Me b'a yu mèn, yôg àm! Me be zi'te ntshù' mu.

⁹⁵ Ghatshùagntù be nya' àm neghù me bi. Me be nkù' ntoṅ num ntshù' mu.

⁹⁶ Me yen njoṅ tshu fa ts'a bwô miagte là. Là ntshù' o zi nga' mbu.

⁹⁷ Tshù mba me be nkô ntshù' mu njene! Me be nkwate nu bwe njoṅ lé'njù fa.

⁹⁸ Kàn so be ngù me tù' nzenu ntshùa ghakeban tshàm, nummbe me ghù kàn so njoṅ ndù fa mbaṅ àm.

⁹⁹ Me be nsiaṅte nu ntshùa njoṅ tshàm ghatswite fa, nummbe me be nkwate nu num ntshù' mu yàme.

¹⁰⁰ Me be nju' ntshùa ywèn benntùn, nummbe me be ndé' ntshù' mu.

¹⁰¹ Me be nsô nku màm num njoṅ manze nukebwô fa, ndù me lé' ntshob mu.

¹⁰² Me ke' be sô ku num ntshù' mu, nummb'a b'a wù bèn nke ntswit'àm yi.

¹⁰³ Ntshob mu dùm ntshu àm neshu, ndùm ntshùa ṅwa' mum ntshu àm.

¹⁰⁴ Me be ntshùa njam nkàn mu ntù' nzenu. Ndùlala mban njoṅ manze tatte fa.

¹⁰⁵ Ntshob mu b'a lambo num nku màm, mbe nka' num manz'àm.

¹⁰⁶ Me lo ghù nka'ni nke' mbu' bwe, a nsi ghô be ndùlala. Yen nà b'a ndù me nsi ze ntshù' mu mi netsine.

¹⁰⁷ Me b'a ntùm nge' kebwô. Tshùaben, ghù me tshùa num ntshob mu njôge.

¹⁰⁸ Tshùaben, bam nka'ni mi a tum ntshu àm nà, ntswit'àm ntshù' mu.

¹⁰⁹ Yôg sàm ke mb'a ntshu vù njoṅ ndù fa, me ke' be lagte ntshù' o.

¹¹⁰ Ghatshùagntù bùn àm ywi', là me ke' tsin ngùanesà mbaṅ nkàn mu.

¹¹¹ Ntshù' mu bèn mbe yàm ju ntsi'i, ntshù' mu bèn nke mfà tsiaṅte ntù àm.

¹¹² Me fà ntù àm num neke nze ntshù' mu, njoṅ ndù fa tà nèn miagte.

¹¹³ Me be mban ben tse bo be mbe ghù nu nke'te là, nke nkô ntshù' o.

¹¹⁴ O b'a yàm ndàlem mba yàm tshètntsho. Me be nywinte num nka'ni o.

¹¹⁵ Ghatshùagntù nèn ngùanesà mbaṅ àm, ndù me ze nkàn Nsi àm.

¹¹⁶ Be yàm ntom mb'a ntùm nka'ni o là, me nsi yôge. Kà bam ndù tuswe ko àm num yàm nenywinte.

¹¹⁷ So neta num àm me nsi yôge, nke ntsiaṅte num ntshù' mu njoṅ ndù fa.

¹¹⁸ O be ngwag njoṅ ben fa tse bo be ntsin ngùanesà mbaṅ ntshù' mu là, nummbe yub nesiaṅte b'a tatte.

¹¹⁹ O be ndôte ghatshùagntù tse bo be num nsitsha' là mba ba bangùa là. Ndùlala me be nkô ntshù' mu.

¹²⁰ Mbàb wul àm be mvètte bwôg num o, me nke mbwôg tsho tsho'te ntsha.

¹²¹ Me be nze ntshù' mba nunetsine, kà ghua' àm mum mbu ghama'ni àm.

¹²² Be ngabéb njam ngafa' o, kà ghako'te wut fé't'àm.

¹²³ Miag màm be mb'a be num yôg s'a fe wù là, mba num ntshob mu mi netsine.

¹²⁴ Ghù num ngafa' o mba kondèn o kô là. Tswit'àm ntshù' mu.

¹²⁵ Me b'a ngafa' o, fà zenu me, ndù me lèn ntshù' mu.

¹²⁶ Tshùaben, a ngelaṅ nelo nsi li. Bo tshwèt mfàn ntshù' o.

¹²⁷ A ndùlala me be nkô nkàn mu ntshùa gol, ntshùa gol z'a làn nà.

¹²⁸ A ndùlala me ke nzin à ndaṅndaṅ mb'a mum njoṅ ntshù' mu fa là. Me lo gha njoṅ manze tatte fa.

¹²⁹ Ntshù' mu bwô neshu, a ndùlala ntù àm be ndé' njoṅ i fa.

¹³⁰ Netswite ntshob mu be nké' miag. A be mfà zenu ben nebétni.

¹³¹ Me be nga' ntshu àm nzwiage, nummbe nzi ntshù' mu be nja àm.

¹³² Kaṅ wul o ndôt'àm. Ko ndèn màm. Ben tse bo be nkô lén so là be mbéb yen nà.

¹³³ Ghù ndù nku màm tshùa njam ntshob mu mféb nsi. Kà bam ndù sàm nukebwô se ka num àm.

¹³⁴ Tshu' àm bu ma'ni benntùn. Ndùlala ndù me ze ntshù' mu.

¹³⁵ Ghù se o ké' num ngafa' o. Tswit'àm ntshù' mu.

¹³⁶ Ntsenyà tshwèt nswe' miag àm, nummbe bo ke tshwèt nze ntshù' o.

¹³⁷ Tshùaben, o b'a mèn netsine, tsho tsho'te ntsha b'a ndaṅndaṅ.

¹³⁸ O lo yab ntshù' mu à num nunetsine, njab i à mum nenùne.

¹³⁹ Nkôni màm tshwèt mi àm, nummbe ghamaṅt'àm lagte ntshob mu.

¹⁴⁰ Ntshob mu làn neshu, là ngafa' o num nkô ntshob mu.

¹⁴¹ Me b'a mônke' mbe mèn bo wag i là, là me ke' be lagte nkàn mu.

¹⁴² Nunetsin o b'a z'a tswe matmat là, ntshù' o b'a ze nenùne.

¹⁴³ Nge' bo ngùtni yab mbu num àm, là, nda' ntshù' mu bèn mbe yàm ju tanjoṅ.

¹⁴⁴ Ntshù' mu b'a mi netsin matmat; fà zenu me ndù me ze ntshù' mu, mbèn nse' njôge.

¹⁴⁵ Me be ntsiaṅ o njoṅ ntù àm fa: Tshùaben, ju' me, ndùlala ndù me ke ndé' ntshù' mu.

¹⁴⁶ Me be ntsiaṅ o; yôg àm, ndùlala ndù me ze ntshù' mu!

¹⁴⁷ Me be mbwôgmbwe nkua' wù kà mfôgnjù nse'e; me be nywinte num njoṅ tsho nka'ni fa.

¹⁴⁸ Me be mbwôgmbwe nga' miag màm kà njù ntshétte, num nekwate nu num ntshob mu.

¹⁴⁹ Ju' nz'àm njam kondèn o. Ghù ndù me yôge, ndaṅndaṅ mb'o yen nà.

¹⁵⁰ Ben tse bo be nzwi benntùn nà tshwèt ngebte. Bo tsin tà ngùanesà mbaṅ ntshù'.

¹⁵¹ O Tshùaben, o ghebte! Njoṅ nkàn mu fa b'a nenùne.

¹⁵² Me lo tshùa njam ntshù' mu ndèn fe mbwe ndù o yab ntshù' mu à matmat.

¹⁵³ Yen nge' àm ntshu' àm, nummbe me ke' lagte ntshù' o.

¹⁵⁴ Tshètte njam àm, ntshu' àm. Ghù ndù me yôge, mb'a be ntùm nka'ni o là.

¹⁵⁵ Yôg tsin à ngùanesà mbaṅ ghatshùagntù, nummbe bo ke' be ndiag ntshù' mu.

¹⁵⁶ O Tshùaben, kondèn o b'a ze ndùb, tshùa num tsho tsho'te ntsha ngù me yôge.

¹⁵⁷ Ghatsho' nku màm kebàn mba ghamaṅt'àm yàm neshu; me ke' tsho' ku àm num ntshù' mu.

¹⁵⁸ Me be njen ben tse bo sô ku njam o là, nju' kebwô ntù àm. Nummbe bo ke' ze ntshob mu.

¹⁵⁹ Yen mba me be nkô ntshù' mu njene! Tshùaben tshùa num kondèn o mfà yôg me.

¹⁶⁰ Tun ntshob mu b'a nenùne. Njoṅ ntshù' yu nunetsin fa tswe matmat.

¹⁶¹ Kamkam tshwèt ntsho' nku màm kebàn ke ntun mi. Là ntù àm ke mvètt'a nda' num ntshob mu.

¹⁶² Me be ntsiaṅte num ntshob mu, mba mènntùn z'a fon mà ntsha' ndùb là.

¹⁶³ Me be nga, me be mban tatte, nkô ntshù' o.

¹⁶⁴ Me be ngamt'o yoṅ sammbàa ta' lé'njù num tsho tsho'te ntsha tse netsine.

¹⁶⁵ Fite be mbe ben tse bo kô ntshù' o là yàme. Sàm nge' ke' be tsho num bo.

¹⁶⁶ O Tshùaben, me be nywinte yôg s'a fe wù là, nke nze nkàn mu.

¹⁶⁷ Ntù àm be nze ntshù' mu. Me be nkô ntshù' mu neshu.

¹⁶⁸ Me be nze ntshù' mu mba nkàn mu, nummbe njoṅ tshàm manze fa b'a mbwe o.

¹⁶⁹ Tshùaben, a bwô ndù me kua' nz'àm se' nkum mbwe o. Fà zenu me, mb'a be ntùm nka'ni o là.

¹⁷⁰ A bwô ndù yàm le'te se' nkum mbwe o. Tshu' àm mb'a be ntùm nka'ni o là.

¹⁷¹ A bwô ndù nkub ntshu màm tshob ghamt'o, nummb'o be nzi't'àm ntshù' mu.

¹⁷² A bwô ndù lém sàm yob ntshob mu, nummbe njoṅ ntshù' mu fa b'a mi netsine.

¹⁷³ A bwô ndù bu o ywimt'àm, nummbe me tsho' yàm à ntshù' mu.

¹⁷⁴ Tshùaben, me kô à yôg s'a fe wù là, ntshù' o be ngù me yôg mebwô.

¹⁷⁵ A bwô ndù ntù àm yôge, nke ngamt'o. Tsho tsho'te ntsha be njwimt'àm.

¹⁷⁶ Me b'a tshakendà mba njùmbwe z'a bi là, diag ngafa' o. Nummbe me ke' be lagte ntshù' mu.