Yobkwi 118 - NTSHOB NSI

Yôg, mfà nku'ni num mfa' Tshùaben

¹ Bin ghamte Tshùaben, nummb'a b'a mèn mebwô, nummbe kondèn i be ntswe matmat.

² A bwô ndù tunndà Israél tshob ndù: Nummbe kondèn i be ntswe matmat!

³ A bwô ndù tunndà Aron tshob ndù: Nummbe kondèn i be ntswe matmat!

⁴ A bwô ndù ben tse bo be mbwôg Tshùaben nà tshob ndù: Nummbe kondèn i be ntswe matmat!

⁵ Me lo tsin ntùm nge' àm ntsiaṅ Tshùaben; a bùnte me, ngù me ta'te nku màm.

⁶ Tshùaben b'a num yàm njam, me ke bwôge, ke ze mènntùn ku'ni neghù m'à?

⁷ Tshùaben b'a num yàm njam, netèt ben bo be njwimt'àm nà, tu wul àm, me be ntshùa ben bo be mban àm nà.

⁸ A bwô nediag ndàlem num Tshùaben, ntshùa neyab ntù num mènntùn.

⁹ A bwô nediag ndàlem num Tshùaben, ntshùa neyab ntù num ben ndùbndùb!

¹⁰ Njoṅ ghakelèn Nsi fa lo lam àm mbume, me lo' lén Tshùaben nkebte yub yi nkam nkam.

¹¹ Bo lo lam àm mbume, nkaṅt'àm neshu, me lo' lén Tshùaben nkebte yub yi nkam nkam.

¹² Bo lo lam àm mbume, mba ṅwa' là, mbite mba bwôg tsha là, me lo' lén Tshùaben nkebte yub yi nkam nkam.

¹³ O na' ke ntèn àm ndù me vù nsi, là Tshùaben ywimt'àm.

¹⁴ Tshùaben b'a yàm neta, tunu sàm yobkwi. A yi bèn njôg àm.

¹⁵ Tshu'te tshùa ntsho mba ze tsiaṅte tum ntùm ntàb ben netsine: Bu Tshùaben ze zwim fa' mfa' ndùbndùb.

¹⁶ Bu Tshùaben ze zwim b'a tà tù, bu Tshùaben fa' mfa' ndùbndùb.

¹⁷ Me ke nsi kwù, me nsi yôge, me nsi soṅ tshô mfa' Tshùaben.

¹⁸ Tshùaben lo naṅ ntsha num àm, là, a lo ke fà àm vù.

¹⁹ Bin ghab nzendà nunetsin me: Me nsi tshùa bwe tsho ndà, nyàmte Tshùaben.

²⁰ Nzendà Tshùaben b'a nsen ni, ben netsine ke ntshùa à bwe ntsho ndà.

²¹ Me tshwèt nyàmt'o, nummb'o lo bùnte me, nummb'o lo yôg àm.

²² Loṅ se ghabomndà na' ngua' là kaṅ ntù' loṅ tôgndà.

²³ Yen nà b'a fa' Tshùaben. A b'a nu netshàm num miag mage!

²⁴ Tshù lé'njù se Tshùaben nabte li. Be ṅwate, ntsiaṅte num i!

²⁵ Tshùaben, fà yôg! Tshùaben, fà netshùa ntsho!

²⁶ Mbotni be mèn z'a tshwèt nse' num lén Tshùaben nà! Bag be ntsin ndà Tshùaben ngamte zine.

²⁷ Tshùaben b'a Nsi, a be nké' num be. Bin taṅ nyàm ze bin zwi là nkù, ndo' i nèn yi mbaṅ tômbwôg le'te Nsi. Bin tshùb tshaten bu bin, ntaṅ nka nèn bwoṅ tà nkum mbaṅ tômbwôg le'te Nsi.

²⁸ A b'a wù bèn mbe Nsi àm, me be ngamt'o, Nsi àm, me be nyàmt'o!

²⁹ Bin ghamte Tshùaben, nummb'a b'a mèn mebwô, nummbe kondèn i be ntswe matmat.