Yobkwi 116 - NTSHOB NSI

Le'te Nsi mèn ze bo kwé i ntshu vù là

¹ Me be nkô Tshùaben, nummb'a be nju' nze yàm le'te,

² a lo tshag toṅ i me, ngelaṅ me ke ntsiaṅ i là.

³ Nkù vù lo lam àm mbume, nge' ts'a mum fi là lo ghom àm, me nke njen nge', mbe ntùm ngùtni.

⁴ Me lo ke ntsiaṅ lén Tshùaben: O Tshùaben, yôg ntù àm!

⁵ Tshùaben b'a ngakondèn mba mèn netsine, Nsi yag dun kondèn.

⁶ Tshùaben be ntshètte njam ben nke'nke'e. Me lo be mèn nebole, a ywimt'àm.

⁷ Ntù àm, bèn njam mfite tsho, nummbe Tshùaben ghù numebwô num o.

⁸ Ṅ, mb'o tshu' ntù àm bu vù, miag màm num ntsenyà, nku màm ndù k'a tiag là,

⁹ me nsi zin mbwe Tshùaben, num tsha' ben bo ke' ntùn nà.

¹⁰ Me lo ghù bamntù mba ngelaṅ me ke ntshob ndù me b'a kua' ngayennge' là,

¹¹ me ze me ke ntshob ntùm yàm tshu'tu ndù njoṅ benntùn fa b'a ghatatte là.

¹² Ke ze be me fà Tshùaben num njoṅ mebwô fa ts'a ghù num àm n'à?

¹³ Me nsi bù' ntu' netshu' àm tù, tsiaṅ lén Tshùaben.

¹⁴ Me nsi zwiagte njoṅ tshàm nka'ni fa me ghù Tshùaben nà mbwe njoṅ ze nzwit mèn fa.

¹⁵ Vù ben tse bo be nkô Tshùaben nà ghù njoṅ i mbwe i.

¹⁶ Tshùaben, o ké'te nkù tshàm fa, nummbe me b'a ngafa' o, me ngafa' o b'a mén ngafa' o ze mènnzwi.

¹⁷ Me nsi fà jule'te Nsi ghamte, be fà tsiaṅ lén Tshùaben.

¹⁸ Me nsi zwiagte njoṅ tshàm nka'ni fa me ghù Tshùaben nà mbwe njoṅ ze nzwit mèn fa,

¹⁹ bam ntshundà ndà Tshùaben, netèl o, me Yérusalém! Aléluya! Ghamte be Nsi.