Yobkwi 109 - NTSHOB NSI

Ngantsha tsiaṅ Nsi

¹ Ntshagte yobkwi; yobkwi David. Nsi ze me be nyàmt'é, kà tswe ntshu mi'i.

² Ntshu kebwô mba ntshu tatte gha' nte nge num àm. Bo tshwèt ntshob mo' tatte me.

³ Bo lo' ntshob nkembàn ndam àm yi mbume, nke ma' àm ntsho ke ntun mi.

⁴ Me be nkô yube, bo nke mbot'àm, kà me ntù' be yàm mum le'te,

⁵ bo be ndo' nge' njagte numebwô yi me, ndo' nkembàn njagte nkôni yi me.

⁶ Ghù ndù tshùagkèt mèn tô i, ngabote ntsha tsin num bag bu i ze zwim.

⁷ Bo tsho'te ntsha a vù ntsha, lo' ze le'te mba nukebwô là!

⁸ A bwô nesébte lé'njù tse, mo' mèn lo' ze dù' fa'.

⁹ A bwô ndù bon tse tù' bontse, nzwi i tù' mfôge!

¹⁰ A bwô ndù bon tse be tshakendà, nke ndon ndone, bo bèn nsô yub ntùm mfamnda' mube.

¹¹ A bwô ndù ze nganjo lo' tshu tse fa, ghùn lagte njoṅ tshu fa ts'a tum num fa' mbu mi là.

¹² Kà sàm mèn la'te lèn mfé nkôni yi, kà sàm mèn ko ndèn bontse tse.

¹³ A bwô ndù bo biagte ze nzwit, lén sob bi mum zwiaṅ njù z'a se' là.

¹⁴ A bwô ndù bo kwimte mfànnu tà tse mbwe Tshùaben. Kà bo bwete nukebwô màab.

¹⁵ A bwô ndù bo ke mbe mbwe Tshùaben njoṅ ndù fa, Tshùaben biagte ntshùa mub num nsitsha'a.

¹⁶ Nummb'a lo ke magte neko ndèn, ntsho' nku mbwoṅ mba ngayennge' kebàn, ngù mènntùn ze ntù i be'te là kwù,

¹⁷ mb'a na' nkô ndon nà, a bwô ndù ndon tsho num i! A lo ke kô tse neyab kàn, neyab kàn nèn ngùanesà mbaṅ i!

¹⁸ A ma' ndon num i mba nzwe là, a tsho mum wul i mba ntse là, ntsho ntùm mvôg mi mba mfèt là.

¹⁹ A bwô ndù ndon be yi à mba nzwe z'a be ndam wul i yi là, mbe yi mba kob s'a be ntaṅ njoṅ ndù fa là!

²⁰ Tshù mb'a nsi tshùa njam Tshùaben be ntsho'fa' ghabot'àm tse bo be ntshob nukebwô num àm nà!

²¹ Wù Tshùaben Nsi, ghù me ndùlala num nu lén so, nummbe bwôntù o b'a ze ndùb, tshu' àm.

²² Mbwoṅ mba njennge' mba me là, ntù àm be' mà ntùm bwe,

²³ ndaṅndaṅ mba netshaṅ be mite là, tshù mba tu wul àm be nèn nà, bo tshwèt nta' àm mba ngamntàn nà.

²⁴ Ntunkekwi' màm tshwèt mvètte num mba me tswe nziku' là, wul àm jum fa nummbe nzit ke num àm.

²⁵ Tu wul àm me tù' bo à mba ju tshabte là, bo be njen àm nyi'te tu yube.

²⁶ Tshùaben Nsi àm, ywimt'àm, yôg àm njam kondèn,

²⁷ a tshùa ndùlala bo lèn ndù a b'a bu o, ndèn ndù a b'a wù Tshùaben bèn ngù yen nu là!

²⁸ Ke tshen ben nà so ndon, mba tu wul o nsi yab kàn, ke ghakamt'àm be ntùm tuswe lo, mba ngafa' o b'a ntùm tsiaṅte!

²⁹ A bwô ndù tshabte kut ghabot'àm, a bwô ndù yub tuswe lam yub mba kummbaṅ nà!

³⁰ Me nsi ghamte Tshùaben fà nz'àm tù, nyàmt'é netèt bwoṅ benntùn.

³¹ Nummb'a be ntsin num bag bu ngayennge' ze zwim, num neyôg ntù i bu tse ghatsho'te ntsha.