Yobkwi 107 - NTSHOB NSI

MBATTE ṄWA'NI TÀN ( Yobk. 107—150 ) Me bam Nsi ngafà yôg

¹ Bin ghamte Tshùaben, nummb'a b'a mèn mebwô, nummbe kondèn i be ntswe matmat!

² Ben tse Tshùaben tshu' yub là nsi tshob ndùlala. Ben ts'a na' ntshu' yub bu ngaghùtni là,

³ ben ts'a na' ntse'te yub netèt ngôngô, bag ntumnyam mba bag mbinyam, mfe tu, mba mà ntèn nà!

⁴ Bo lo ke ntsha num kônkwa, mum dù' tse benntùn ke bwe là, bo ke fon manze z'a kum ntùm ngô benntùn be ntswe bwe là,

⁵ nziku' ya yube, ntù yub kù, bo ju' ntùm wut tshob ndù ntù yub yub.

⁶ Bo kua' ntsiaṅ Tshùaben ntùm nge' yub, a tshu' yub mum nge' tshobe;

⁷ a lo' yub nzin yi num manze ndaṅndaṅ, ndù bo kum ntùm ngô benntùn be ntswe bwe là.

⁸ A bwô ndù bo ghamte Tshùaben num kondèn i mba num mfa' mi mi nekuni num bon mèn nyiaṅtu.

⁹ Nummb'a fà ntse nzetô z'a jum nà, mfà tshu mebwô bam se nziku' ya i là!

¹⁰ Ben tse bo be ntswe ntùm njam mba dù' nesènte là, ba ghandàtsha ntùm nge' mba mum ntùne,

¹¹ nummbe bo lo be ghatatu num ntshob Nsi, ngwag ntag Nsi z'a mfe tù là,

¹² a lo fà ntù yub bu ngùtni, bo lo tiage, mènntùn z'a ywimte yub là ke be!

¹³ Bo kua' ntsiaṅ Tshùaben mum nge' yub, a yôg yub mum nge' tshobe.

¹⁴ A ghù bo tum ntùm njame, mba ntùm dù' nesènte, a kebte nkù tshobe.

¹⁵ A bwô ndù bo ghamte Tshùaben num kondèn i mba mum mfa' mi mi nekuni num bon mèn nyiaṅtu!

¹⁶ Nummb'a be'te nzendà tùne, mbe'te fùnndà mbatndà tùne nkam nkam.

¹⁷ Kagni lo tshùa njam nzin mub mi kebwô, mba njam nukebwô tshobe, ntù' ghayennge'.

¹⁸ Bam sob ke kô sàm jujù, bo ke'te ba nzendà vùkob.

¹⁹ Bo kua' ntsiaṅ Tshùaben ntùm nge' yub, a yôg yub mum nge' tshobe.

²⁰ A tum ntshob mi, num neyate yub yi, mba nebébte yôg sob yi mum tô.

²¹ A bwô ndù bo ghamte Tshùaben num kondèn i mba mum mfa' mi mi nekuni num bon mèn nyiaṅtu.

²² A bwô ndù bo fà tshule'te Nsi tse fa' kondèn, nsoṅ mfa' mi ntùm tshu'te tsiaṅte.

²³ Ben tse bo nèn ntùm dibantse boa nsitima, nke mfa' fa' sob num ntse ndùbndùb là,

²⁴ tshen ben nà lo yen mfa' Tshùaben mba mfa' mi mi nekuni mà ntùm ntse.

²⁵ Tshob fetmbaṅ ndùb lo, ngù ntu'ntse mbùnte,

²⁶ nko' mfe kamànyam, nswe' mànjam nsi, ntù yub tum mum nge' neshu,

²⁷ netshaṅ shùm yube, bo nke ngwù bag bag mba ghabum ndu' là, njoṅ yub zenu fa nywinte.

²⁸ Bo kua' ntsiaṅ Tshùaben ntùm nge' yub, a yôg yub mum nge' tshobe.

²⁹ A ghù fetmbaṅ bèn njam, dù' fi ndù kam, ntu'ntse mi a dibantse là mi ntswe.

³⁰ Bo tsiaṅte mba ntse fi ndù kam nà, a lo' yub nèn yi ntshuntse dù' ze bo kô là.

³¹ A bwô ndù bo ghamte Tshùaben num kondèn i, mba mum mfa' mi mi nekuni num bon mèn nyiaṅtu.

³² A bwô ndù bo ghamt'é ntùm mbumte ngô, nyàmt'é mum ntse'te kamkame!

³³ A be ngù nta'ntse kaṅ ntù' kônkwa, ngù ba tumnsi ntse tù' dù' tsha' njum,

³⁴ ngù tsha' mebwô tù' tsha' ngwa, num nukebwô ba ntùm ngô.

³⁵ Là, a lo' kônkwa ngù a kaṅ ntù' diaṅnkat ntse, ndo' tsha' njum ngù tumnsi ntse yi,

³⁶ ngù ghanziku' tswe bwe, ndo' ngù ngô ze be benntùn tswe bwe là yi.

³⁷ Bo ywit nà, mbwe ntù z'a fà ntàm bo là.

³⁸ A be njab kàn bo, bo yàm neshu; a ke' be bam njoṅ nyàm tshob kage.

³⁹ Njoṅ yub kag, bo vù nsi, njam ma'ni, nge' mba ngùtni.

⁴⁰ A b'a yi bèn nke nsa wag num ben ndùbndùb, nke ngù bo ntsha num kônkwa, ke fon manze.

⁴¹ A yi nke mbù'te ghayennge', ngù tunndà yub yàm mba metsit bwoṅ nyàm nà.

⁴² Ben ndaṅndaṅ be njen i, ntsiaṅte, mba zit ngafànnu lo mem ntshu i.

⁴³ Mba we lo z'a be nzenu là, a zete num tshen tshu là, ndèn mba kondèn Tshùaben be là!