Yobkwi 104 - NTSHOB NSI

Me bam Nsi nganabte njù

¹ Ntù àm, ghamte Tshùaben! Tshùaben, Nsi àm, o b'a mèn ndùb neshu! O ma' nkuni mba ghamte num o,

² nkut wul o mum nelàn mba kummbaṅ nà nyitte kamànyam mba ntàb nzwe là.

³ O be nkut nsànsà mba' num ba ntse, nke ndo' ba ndot ngù so kalig yi, nke nzinte num mbàb ba fetmbaṅ,

⁴ nke ndo' ba fetmbaṅ ngù ghantum tsho yi, nke ndo' ngwat mbwôg ngù ghafa' tsho yi.

⁵ O lo te tsha' num ntun mi, a ke nsi zi nyi'te num njoṅ ngu'ngu' fa.

⁶ O lo lo' ghem nkabt'é yi mba nzwe là, ba ntse lo tsin num ba mbale.

⁷ O lo tshùag yub bo kù; bo lo bùn à nebùn ngelaṅ bo ju' nze fambaṅ so là.

⁸ Bo be nko' mbale, nswe' nèn mà tômbo'o, num dù' z'o na' nabte njab bo là.

⁹ O lo yab ndù z'a bwô ndù kà bo bèn nja' là, bo ke nsi bèn bèn njam kabte nsitsha'a.

¹⁰ O lo ghù tumnsi ntse tum ntùm mfub ntsitmbaṅ, nke nké nswe' netèt ba mbale.

¹¹ Njoṅ nyàm tshwèt fa be nu yube, njoṅ nkekwèn fa nke mfite ntù yub bwe.

¹² Bon nsaṅ mi à kamànyam nà be ngù dù'ntswe yub mbaṅ bo, bo be ntswe netèt mfu tù nke ntshag nze yub tù.

¹³ O be ntsin dù'ntswe o z'a sag là nke nzwi' ba mbale. Njoṅ nsitsha' fa be njwèt num ntàm mfa' mu.

¹⁴ O be ngù nenà bit num jujù nyàm, ngù ntù mi be mènntùn jù ntàm là bit, ndùlala ndù a ke nsô ze jujù mum tsha'a,

¹⁵ ngù ndu' mi a be mfà tsiaṅte ntù mènntùn nà, ndùlala ndù a lo' mfèt fonte se i yi. O be mfà bàn z'a be ntomte ntù mènntùn nà!

¹⁶ Tshùaben be nkém ntù mi mebwô, ntù tshom mi a na' njwit Liban nà.

¹⁷ Bon nsaṅ be nte nkàn tshob bwe, saṅna' nke ntswe mfe tshaṅ bwe.

¹⁸ Nsànsà mbat b'a num mfot mbwe mi tshwèt là, ngondoṅ be ndàlem nshutmbàb.

¹⁹ O lo nabte maṅwù neke ndo' ndèn ngelaṅ njù yi, mba lagnyam z'a lèn ngelaṅ z'a be mben nèn bi là.

²⁰ O be nkag njame, njù sèn, njoṅ nyàm fa ts'a fèn nà nke nzinte.

²¹ Bon ngwayit be nke nkua' njam nyàm tse bo ghom nà, nke mbètte yub jujù Nsi.

²² Nyam be ntume, bo kù, nèn ntùm dù'ntswe yub ndem bwe.

²³ Yen ngelaṅ nà mènntùn tum nèn se fa', mfa' se fa' tà nkum mfetnjù.

²⁴ Tshùaben, mi' mfa' mu yàm neshu, o lo lo' zenu mfa' njoṅ i fa yi; mfa' mu dun num njoṅ nsitsha' fa.

²⁵ Tshù dibantse ndùb li boa mbu mi mi a sa tshwèt là, nyàm nke'nke' mba tse ndùbndùb be nke nzinte mum bwe.

²⁶ Nsitima be nzinte mum bwe, mba ngamnyu z'o na' nabt'é neke ndo' nkom zwi yi là.

²⁷ Njoṅ i fa ke nzwi't'a wù, ndù o fà jujù bo num ngelaṅ ntùn.

²⁸ O be mfà bo, bo tse'te, o be nga' bu o, bo ywèt mbwô tshu.

²⁹ A be z'o lem se o là, mba bo a' biagte yube. O be nsô zwiag num bo, bo kwù, mbèn njam ntùm mbabe.

³⁰ O be ntum zwiag so, a nabte yube, o be mbèn nkaṅte njam tsha'a.

³¹ A bwô ndù nkuni Tshùaben tswe matmat, a bwô ndù Tshùaben tsiaṅte num mfa' mi!

³² A be ndôte tsha' a nyi'te, a be nkwag ba mbat bo sô nzembwôge!

³³ Me nsi yob kwi fà Tshùaben ndùse me ke' njôg là. Me nsi ke bu' bon tshu Nsi àm, ndùse me ke' ntùn nà.

³⁴ A bwô ndù ntshob màm bwô i, tu wul àm, me be ntsiaṅte num Tshùaben!

³⁵ A bwô ndù ben kebwô bite fafa num nsitsha'a, kà ben kebwô bèn nebe! Ntù àm, ghamte Tshùaben! Aléluya!