Yobkwi 101 - NTSHOB NSI

Mfen bam Nsi neze kàn

¹ Yobkwi David. Me nsi ke yob kondèn mba nunetsine. Tshùaben, me nsi yob ndùlal'a wù.

² Me nsi zete num manze ndaṅndaṅ. O nsi se' m'à ndùke? Me nsi zin ntùm nenùn ntù àm, ntùm ndà àm.

³ Me ke nsi yab sàm ju kebwô mbwe miag màm. Me be mban nzin ben kebwô. Be nzin mub ke zi ndat num àm.

⁴ Ntù kebwô nsi nèn ngùanesà mbaṅ àm. Me ke' kô nelèn tshùagkèt mèn.

⁵ Mèn z'a be ngù ndàm num mèn z'a ghebte mbaṅ i njam tsham nà, me nsi biagt'é. Me ke nsi fènte mèn z'a ghù ntshù ka'te mba ntù ko'tewut là.

⁶ Me nsi te miag num ben nenùn tse bo ntùm ngô là. Ndù bo tswe mbaṅ àm. Mèn z'a zin num manze nenùn nà nsi be yàm ngafa'.

⁷ Dù'ntswe ke' be ngafùte ntùm ndà àm. Mèn z'a be ntshob tatte là ke nsi mbwe àm.

⁸ Me nsi ke biagte ben kebwô mum ngô njoṅ nkebnjù fa. Ndùlala ndù me miagte ben tse bo be ngù nukebwô là mum ngô Tshùaben.