Yobkwi 1 - NTSHOB NSI

MBWE ṄWA'NI ( Yobk. 1—41 ) Fu' mebwô

¹ Mènfen b'a mèn z'a ke' be zin à num ntag ghatshùagntù là ke be tsin num manze ben kebwô, ke be tam bwoṅ boa ghatshabte là,

² là, a num ṅwate ntùm ntshù' Tshùaben, nke nsiaṅte nu bwe tèttswe' mba mbwôgtshù!

³ A be ndaṅndaṅ à mba tù se bo bwe kaṅntse, a nke njam ntàm mi num ngelaṅ i; mfu mi ke be tsho' là. Mba ke lo ze mènfen num ngù là be ngwù lag.

⁴ A ke' b'a ndùlala num tshùagkèt benntùn. Bo be à mba nyi'nga ze fetmbaṅ tshwèt nsate là.

⁵ A ndùlala tshùagkèt benntùn ke nsi bù' tu yub nsi mum lé'njù tsho'te ntsha. Ben kebwô ke nsi ghù dù' ntùm mbumte ben netsine.

⁶ Nummbe Tshùaben lèn manze ben netsine. Là manze ghatshùagntù ke nkum à ntùm nebi.