Yérémia 9 - NTSHOB NSI

Ngatshob ntshob Nsi tshwèt ndàn wul i

¹ Yérémia tshob ndù: Wé! A lo mbe ndù ntse dun tu àm, mbe ndù ntsenyà dun miag àm mba tôntse là, mb'a be me làn mbwôgtshù bo tèttswe', ndàn fe ben yàm nzwit mèn.

² Wé! Me lo ngù ntàb ghanèn katte mfe kônkwa, mb'a be me ghua' yàm nzwit mèn, nkù nèn ngùanesà. Nummbe njoṅ yub fa b'a ghaghù màndà, mbe bwoṅ ghafùte.

³ Bo dù' lém sob mba ngoṅkét là, nke ndo' ma' tatte yi. Bo ke' ke ndo' à nenùn nta yi ntùm ngô. Bo be ndo' tshùagntù ntam tshùagntù yi. A b'a nummbe bo ke' lèn àm tshobe, Tshùaben bèn ntshobe.

⁴ A bwô ndù mba we lo zete num nshun i. Kà sàm mèn ghua' wul i fèt tse; nummbe mba zit mfèt lo ke ndiag à be netatte, mba zit nshun no ke nsa' à be ndàm.

⁵ Bo num ntshob tatte bo bo, ke ke ntshob nenùne. Bo num nkaṅte lém sob netshob tatte yi, nke nkagtùn neghù à be nukebwô.

⁶ Dù'ntswe o b'a ntùm tatte. Tatte bèn ngù kà bo nke nga nelèn àm. Tshùaben bèn ntshobe.

Tshùaben tshwèt njù' kebwô

⁷ A ndùlala Tshùaben tàndà ntsho tshob ndù: M'a' diag ntun num bo, m'a' laṅte yube. Nummbe mb'a be me bèn ngù num ngon yàm nzwit mèn nà ke' be.

⁸ Lém sob b'a ta' kô nezwi mèn. Bo ke ntshob à be tatte. Bo num ntshob fite nshun yub à num ntshu, nke mbùn njwi' ntùm ntù bo.

⁹ Me ke nsi so ntsha tu bo ké? Me ke nsi yagte mba' num lén yen ngô li ké? Tshùaben bèn ntshobe. Me nsi kua'a, tsham zwe num ba mbale. Me nsi yob nsindàvù num ntômbo' mi a kônkwa là. Nummbe bo kù, mènntùn ke bèn netshùa bwe. Bo tshwèt mbèn nju' nze bwoṅ nyàm bwe ké? Nsaṅ mfe kamànyam boa nyàm kù, mbite fafa.

¹⁰ Me nsi lo' Yérusalém kaṅ tse fàm yi, a tù' ngab mbù tshwèt. Me nsi ghù ntusô Yuda tù' kônkwa, benntùn be ke bèn nke ntswe bwe.

¹¹ Yérémia bètte ndù: Nzenu mènntùn z'a ju' tshen tshu li là b'a yà? A bwô ndù mèn ze Tshùaben tshob yi là tote là! Numke ngô nsat'à? Numke ngô nkù mba kônkwa, mènntùn ke bèn netshùa bwe à?

¹² Tshùaben tshob ndù: A b'a nummbe bo ghua' ntshù' màm, mi me na' njab mbwe bo là. A b'a nummbe bo ke' ju' nz'àm, ke zin mba me na' mbètte là.

¹³ A b'a nummbe bo lo tam à njam nkwatenu ntù yube, ntam njam Baal, ndaṅndaṅ mba tà tshob na' nzi'te yub là.

¹⁴ A ndùlala, Tshùaben tàndà ntsho, Nsi Israél tshob ndù: M'a' lo' bùmmàghô nkém yen nzwit mèn ni yi, ngù bo nu ntse mi tsheb be ntùm bwe là.

¹⁵ Me nsi sate yub netèt ngôngô, tse tu wut yub ke tà tshob lo na' mbe ke lèn nà. Me nsi ma' ṅwi njam bo tà kum ndùse me nsi biagte yub fa là.

Tsiaṅ bènnzwi ghalàn vù

¹⁶ Tshù mba Tshùaben tàndà ntsho tshob li: Bin diage, bin tsiaṅ bènnzwi tse bo num ndàn vù là bo se'e! Bin tum yub mbaṅ kum bènnzwi, a bwô ndù bo se'e!

¹⁷ A bwô ndù bo nànte njob nsivù num bag. ntsenyà tum miag bag, ntse ke nswe' tu bag!

¹⁸ Nummbe memo' tonte nkua' là tshwèt ntum Sion. Ṅ, man! Bo sate yag be! Tuswe bom yag fa! A bwô ndù bag kag ngô nsi. Bo kam njoṅ dù'ntswe tshag là.

¹⁹ Yérémia tshob ndù: bènnzwi, bin ju' ntshob Tshùaben. A bwô ndù ntoṅ min ju' ju z'a tum ntshu i là. A bwô ndù bin tswite ngonngon tsin nsivù. Bin zi'te nsivù netèt bin, bin bin.

²⁰ Nummbe vùkob ko' ntôg ntôndà mage. A tsho ntùm ndà tshage: A tshwèt nzwite bon num manze, nke nzwite nguanmèn num nsém.

²¹ Tshobe, tshù ju ze Tshùaben tshob li: Fe ben nsi vùte mba ju netshab nà yi là num nà, ndaṅndaṅ mba tsha nsa be ngwù ndùse ngakeb nsa tôg là. A ke' bwô mèn ket fe tshobe.

Nelèn Nsi bèn mbe kua' ndà zenu

²² Tshù mba Tshùaben tshob li: Kà nzenu nyàmte wul i num zenu i, kà nganeta ka'te num neta i, kà ngaju ka'te num ju z'a ghù là.

²³ Là, mèn z'a kô nenyàmte wul i là, nyàmt'é nummb'a ghù zenu, mbèn ndèn àm, ndèn ndù me b'a Tshùaben, z'a be ngù bwôntù, nu ndaṅndaṅ bo nunetsin num nsitsha' là; nummbe me ke tsiaṅt'a num yen nu là. Tshùaben bèn ntshobe.

Nesi ket num mbàb wut ke be bomte mèn num ntsha

²⁴ Tshùaben tshob ndù: Tshù, tsemo' lé'njù tshwèt nse'e, tse me nsi so ntsha tu ben bo si ket, là ke be ben nenùn ntù bo là:

²⁵ Egipto, Yuda, Edom, bon Ammon, Moab, njoṅ benntùn fa tse bo num nkom mbaṅ nyiaṅ ntshu tshob là, ben tse bo num ntswe kônkwa là. Nummbe njoṅ ngôngô fa b'a ba kesiket, là njoṅ tunndà Israél fa be mfut'a ba kesiket, mba mba bo si ket là, nummbe ntù yub ke' làn.