Yérémia 52 - NTSHOB NSI

Diaṅ kam bo nelo' Yérusalém

¹ Sédékia lo ghù ngu'njù ntshob ntshù' ṅam mbàa ndùs'a ke njù fen nà. A tô num ngu'njù ntshob ntshù' gham, nke ntswe Yérusalém. Lén màab na' mb'a Hamutal, a na' mb'a ngon Yérémia ze Libna.

² Sédékia ghù nukebwô num miag Tshùaben. A ghù à kua' ndaṅndaṅ mba Yoyakim nà.

³ Ndùlala nu ghù Yérusalém bo Yuda mb'a be ntùm yantù Tshùaben nà, nummb'a lo kô netshag yub ngùanesà num miag mi. Sédékia ta tse tu mbwe mfen Babilon.

⁴ A be kum ngu'njù bwe'e mba Sédékia be num fen nà, mum lé'njù gham ntùm maṅwù gham, Nébukanetsar, mfen Babilon se' num Yérusalém bo ze ntshu ntsho fa; bo te mbàn mbwe Yérusalém, ntswe' nsam ndiaṅ dù' yi mbume.

⁵ Bo lo be lo' tusô ndù Sédékia ghù ngu'njù ntshob ntshù' gham num fen.

⁶ A be kum lé'njù bwe'e ntùm maṅwù kuà, nziku' ta ntùm tusô, lèn jujù ze be ngô bèn njù là ke be.

⁷ Ndùlala ba Kaldéa to ta' fa tusô, njoṅ ba soyé fa tum nkù, ntum tusô tèttswe' ntshùa manze nzendà z'a be netèt nkummba' mbàa mi a be mbaṅ nka' mfen nà; a lo be be ndù ba Kaldéa lam tusô mbume. Ghakùla' tshùb manze z'a nèn tômbo' là.

⁸ Là ntshu ntsho ba Kaldéa yoṅ mfen; ndùse bo kote Sédékia ntùm ntômbo' Yériko là, njoṅ ze ntshu ntsho fa ghua' i bwe nsate nkù.

⁹ Ba Kaldéa ghom mfen, ndo' i nko' nèn yi mbaṅ mfen Babilon z'a be Dibla, ntùm ngô Hamat là. Bo tsho't'é bwe nkeb ntsha.

¹⁰ Mfen Babilon ghù bo watte nshumnshum Sédékia be kua' mbwe i. A ghù bo watte mba njoṅ kamkam Yuda fa be kua' bwe.

¹¹ Yen ni be tôg a ghù bo to miag Sédékia, ndo' tshan ntùn nkul i yi; mfen Babilon lo' i nèn yi Babilon, ntsho bwe, ma' i ndàtsha tà nkum lé'njù s'a na' nkwù là.

¹² A lo be kum lé'njù gham ntùm maṅwù tàn, num ngu'njù ntshob bwe'e gham mba Nébukanetsar be mfen Babilon nà, Nebuzaradan tà ghabéb dù' z'a be num ntshufa' mfen Babilon nà, ṅwag Yérusalém.

¹³ A ton ba' Tshùaben, ba' mfen, boa njoṅ mba' fa mi a be Yérusalém nà. A ton bon mba' ntùn fa mi a be bwe là.

¹⁴ Njoṅ ntshu ntsho fa ze boa tà ghabéb dù' be là sate njoṅ kàbngô fa ts'a lam Yérusalém mbum nà.

¹⁵ Nebuzaradan tà ghabéb dù' lo' mo' bag ntshe'ma' benntùn nèn yi ndà kuan; a na' mb'a tshé' benntùn tse bo ghô tusô là, ben tse bo tam njam mfen Babilon, ntù' ghô netèt bwoṅ benntùn nà.

¹⁶ Mba tà ndùlala, Nebuzaradan tà ghabéb dù' faṅ tsemo' ntshe'ma' benntùn mba ghadù' nà ntù ndu' là, mba ghadù' nà là.

¹⁷ Ba Kaldéa be'te ntom ntùn ts'a be ntùm ndà Tshùaben nà, mbe'te bon miag ntse bo tshaṅ ntse tùn s'a be ntùm ndà Tshùaben nà, ndo' tùn fa nèn yi Babilon.

¹⁸ Bo lo' ntsi bwembwôge, nsofa', mbi, ntu', nkob boa njoṅ tshundà tùn fa tse bo ke ndo' mfa' yi ndà Tshùaben nà.

¹⁹ Tà ghabéb dù' bèn ndo' nkab, nkab neton labinda yi, ba ntu', ba ntsi bwembwôge, tshu neghette ndambo bwe, nkob boa nkefaṅe. Bo lo' à gol bo silba nabte tshen tshu li yi.

²⁰ Ntom tùn bàa, tshaṅ ntse tùne, nyàmna' ntshob bàa gham tse bo be tun bon miag ntse là. Mfen Salomon na' mbèn nabte num ndà Tshùaben. Bo lo ke lèn njoṅ ze tshen tshundà là tshwèt ndèt yi là.

²¹ Ntse mo' ta' ntom nà lo sag nèn tù mbu bwe'e, mo' ta' nkù z'a ghù mbu ntôg là diaṅ i mbume; ntù ntom na' mb'a nge, ndù a to, tshub i be nguan ntu mbu nkuà mi bo yoṅte là.

²² Tu ntom lo be ndù bo lo' à tùn nabte yi. Tu ta' ntom lo ke nsag nèn tù nguan bu bàa kam. Ntàm tshu lo be mbaṅ tu ntom ndù a taṅte num ngùl i. Njoṅ i fa na' mb'a tùne. Mbatte ntom n'a mb'a be ndaṅndaṅ boa ntàm tshu bwe.

²³ Ntàm tshu lo be num ngùl i ntshob ntôg ṅam bwe'e mba zit bag lo. Njoṅ ntàm tshu fa ts'a be num ngùl i là b'a nkù.

²⁴ Nebuzaradan tà ghabéb dù' lo' Séraja ngale'te ze ndùb bo Sofoni nkwébo i boa ghabéb nzendà tat.

²⁵ A lo' njabmfenkun tusô, z'a na' mbèn nke ndôte ghama' ntsho là, boa benntùn sammbàa tse bo ke ntag mfen, bo tèt yub tusô là. A lo' ze ngakite tà ntshu ntsho z'a ke ndo' benntùn fa' soyé ntùm ngô là boa benntùn ntu ṅam ntôg tse bo be ntùm tusô là.

²⁶ Nebuzaradan tà ghabéb dù' lo' yub nèn yi mbaṅ mfen Babilon Dibla.

²⁷ Mfen Babilon lab yube, nzwite yub bwe, ntùm ngô Hamat. Ndùlala Yuda nèn ndà kuan tà ngùanesà mbaṅ ze ngô.

²⁸ Tshù ben tse Nébukanetsar nèn bo ndà kuan ni: Ba Yuda ntu ntshob tat bon bàa ntsha' tat. A na' mb'a num mbatte ngu'njù sammbàa.

²⁹ A be num mbatte ngu'njù ntshob fom gham, mba Nébukanetsar be mfen nà, a nèn benntùn ndà kuan ntu ntshob bàa bon tat nkù fome. A lo' tshen ben ni à Yérusalém.

³⁰ Nébukanetsar lo be ghù num fen ngu'njù ntshob tat ṅam mbàa, Nebuzaradan tà ghabéb dù' nèn ba Yuda ndà kuan ntu ntshob tàn bon kuà nkù sammbàa; njoṅ yub fa tamte mbe benntùn ntsha' kuà nkù ntôge.

³¹ Yoyakim mfen Yuda lo be tswe ndà kuan ngu'njù ntshob sammbàa ṅam ntat, a be mum lé'njù ntshob tàn ṅam mbàa mum ṅwù ntshob bàa gham, Evil-Merodak mfen Babilon ghù mebwô Yoyakim mfen Yuda, nsô i ndàtsha. A lo be be ndù Evil-Merodak ghù num fen tamngu'.

³² A tshob ntshob ntùn Yoyakim kua' mebwô, nso diaṅkwa tun i a tshùa se njoṅ fenfen fa tse bo be Babilon boa bo là.

³³ A sô nzwe ngandàtsha num i; Yoyakim nke njù be num téblé mfen Babilon tà zi nkwù.

³⁴ Njoṅ ngelaṅ fa z'a be ntùn nà, njoṅ mba ze ke lo fa nke mfe à mfen Babilon mba sit lé'njù lo.