Yérémia 5 - NTSHOB NSI

Nukebwô Israél bo ze Yuda dun ntsho' ntshèt

¹ Tshùaben tshob ndù: Bin zinte num nta'ntse mi a Yérusalém nà, ndôte. Bin bètte, ndiag ntùm njoṅ dù' fa, a be ze bin fon mènntùn bwe, a be ze bin fon ta' mènntùn bwe, a nke ngù nunetsine, nke ndiag nenùn nà, mba me nsi ko ndèn Yérusalém.

² Mba ndùse bo tshob ndù: Num lén Tshùaben z'a tswe ntùn nà! Mba bo nu à ngu tatte.

³ Tshùaben, miag mu ke' ke njen à nenùn ké? O num ndab yube, bo ke ju' sàm ju. O num mem yube, bo ke kô nezi'te yu netswite. Se yub be nta ntshùa gholoṅ. Bo num nga nekaṅ ntù yube.

⁴ Me lo ke ntshob ndù: Bo b'a be bônke'. Bo ke ngù à mba kagni là, nummbe bo ke' lèn ze nze Tshùaben, ke lèn ntshù' Nsi yub.

⁵ Me nsi nèn mbaṅ ben ndùbndùb tshob nu bo. Nummbe bo lèn nze Tshùaben, ndèn ntshù' Nsi yub. Là, mba njoṅ yub fa lo be' sob kele'e, nkebte nkù fa.

⁶ A ndùlala, ngwayit fèn be nzwite yube, mbù tshwèt z'a kônkwa là nke mbiagte yube. Nzwimàntô be nkab ntshu ntusô mub nke nya' yube. Nzwi nsi sé'te mba we lo z'a nsi tum bwe là. Nummbe mfànnu mub gha' mbu, yub tatu ke njàm nèn à be mbwe.

⁷ Tshùaben tshob ndù: Me nsi lagte bin à numke? Bon tsin lo ghua' àm. Bo num ndo' lén nsi tse bo ke' be bwe là nke nu ngu yi. Me lo bam nkàn mfe mube, ndùlala bo swèn wut yub ntùm neghù màndà. Bo ke ntèn à bwoṅ kà nke nèn ndà kattù mènnzwi.

⁸ Bo ke mfut'a nyàmdiaṅ tse bo kém yub mebwô, bo nke ntam nde, nke nèn nsen ni bo nsen nà là. Mba zit mèn no netèt bo be mfit nsém nzwi nshun i, nyiaṅte njam nku mi.

⁹ Me ke nsi so ntsha tu bo num lén tshen tshu là ké? Tshùaben bèn mbètte ndùlala.

Mba bo gha nelèn njoṅ nu fa là Tshùaben tshob ndù

¹⁰ Bin ko' num tse kàbngô, ntèn ma' nsi, là, kà bin sate yub koṅkoṅ. Bin keb mi ntù ndu', men nà mi a ke' b'a mi Tshùaben nà.

¹¹ Nummbe tunndà Israél bo tunndà Yuda lo ta tu me. Tshùaben bèn ntshob ndùlala.

¹² Bo gha Tshùaben nke ntshob ndù: Tshùaben ke' be bwe. Nge' ke nsi tsho yage. Ṅwi ke nsi se' num bag, nziku' ke nsi vù netèt bag.

¹³ Ba ghatshob ntshob Nsi b'a mfùag, sàm mèn ke tshwèt ntshob nu bo. Nu tse bo tshwèt ntshob là nsi tsho à be kua' num bo.

¹⁴ A ndùlala, Tshùaben tàndà ntsho tshob ndù: Mba bin tshob ndùlala là, me kô ndù ntshob màm mi a be ntshu o là, b'a mbwôge, yen nzwit mèn ni be ntshwèn, mbwôg là kù i.

¹⁵ Tshùaben tshob ndù: Tunndà Israél, m'a' ghù mo' ngô fe tà ngùanesà nse' num o; a b'a kua' neta ngô, mb'a mo' ta' njwèn ngô. A b'a ngô ndù o ke' lèn ntshob mi, ke be ju' ntshob mi.

¹⁶ Ze mfe' nkét b'a mba tufi s'a te nge là. Njoṅ yub fa b'a ba sa'nde'e.

¹⁷ Ngô là nsi biagte ju z'o ywit là bo yu jujù. A nsi biagte nshumnshum tsho boa ngonngon tsho. A nsi biagte mbwe tsho boa nyàmna' tsho. A nsi biagte tù ndu' so bo tù mbatsi so. A nsi lo' ṅwi sate ntusô mu mi o tsham ntsiag là yi. O na' nke njab ntù o à num men ntusô là.

¹⁸ Tshùaben tshob ndù: Là, me ke nsi sate zin koṅkoṅ num tshen lé'njù là.

¹⁹ A be ze bo tshob ndù: Numke Tshùaben, Nsi yag ngù bag ndùlala là. A be ndùlal'o bùnte, ntshob bo ndù: A nummbe bin lo ghua' Tshùaben, nke mfa' tse nsi ba tum ntùm ngô z'a ke' b'a zin nà.

²⁰ Bin tswi yen nkùn ni tunndà Yakob. Bin tshag nkùn nà mà Yuda ntshob ndù:

²¹ Nzwit kagni, bin tse bin ke' ghù ntù là, bin ju' yen nu li ndù: Bo ghù miag, là ke ke njene. Bo ghù ntoṅ, là ke ke nju'u.

²² Tshùaben tshob ndù: Bin ke nsi bwôg àm tsin ké? Bin ke nsi vètte tsin mbwe àm ké? A b'a me na' mbèn mfà nkwango' dibantse mba ze ndùnsi là. A b'a ze ndùnsi matmat z'a ke' bwô ndù a tôg là. Ntu' ntse mi a be ntùm bwe là be nke mbùne, là, mo' sàm neta ke be bo. Men ntu' ntse là be nke ntshu'u, là ke yôg ntôg ze ndùnsi.

²³ Yen nzwit mèn ni ghù ntù z'a sag là, ntù tatu. Bo num nta tu, ndo nène.

²⁴ Bo ke' be tshob ntùm ntù bo ndù: Be bwôg Tshùaben, Nsi be. A yi bèn nke mfà mbaṅ num ngelaṅ i, mfà mbwe mbaṅ mba njam mbaṅ. A yi bèn nke mfà ngabnjù nelo' ntsho' tshu yi be.

²⁵ A b'a mfànnu min bèn nsô tshen numebwô là bu bin. A b'a nukebwô tsin bèn nsô tshen numebwô là ngua'a.

²⁶ Nummbe ghatshùagntù num netèt yàm nzwit mèn. Bo nya' à mba ngaghom saṅ z'a tshwèt mbùn nkù là. Bo num mbùn ba nkù, nke ngom benntùn ntùm bwe.

²⁷ Ndà tshob dun tshu fùte ndaṅndaṅ mba ndà ngab be ndun ngab là. A ndùlala bèn ngù bo ntù' ben neta mba ghafu'.

²⁸ Bo num ntshab wut tshobe, nke nzitte tshob ntùm ntswe mebwô. Bo ya' nka' ntùm nukebwô. Bo ke' be tshètte njam mèn, njam ménntse; bo ke nsin tshob à be nesine. Bo ke' be ghù nu ndaṅndaṅ bwoṅbwoṅ.

²⁹ Me ke nsi so ntsha tu bo num lèn tshen tshu là ké? Me ke nsi yagte mba' num lèn yen ngô là ké? Tshùaben bèn mbètte ndùlala.

³⁰ Tshu ts'a bag neshu là, tshùaya'nu tshwèt ntôg ntùm ngô.

³¹ Ghatshob ntshob Nsi tshwèt ntshob tatte ntùm ntshob mube. Ghale'te ke ndo' à ngù' mfa' yi, yàm nzwit mèn nke ṅwate num bwe. Bin nsi be miagt'é b'a ndùke?