Yérémia 49 - NTSHOB NSI

Ntshob Nsi num ben Ammon

¹ Num bon Ammon. Tshù mba Tshùaben tshob li: Ndù Israél ke' ghù nshum ké? Ndù njùndà i ke bwe ké? Numke ghaghamte bebun Malkom ndo' Gad, numke bo nke ntswe ntùm ntusô mi à?

² A ndùlala, lé'njù tshwèt nse'e, tse me nsi ghù tshu'te ntsho vù Rabba, tusô mba Ammon nà. Tshùaben bèn ntshob ndùlala. Rabba nsi tù' ta' fèt fam, mbwôg kù ntusô mi a lam i mbum nà. Yen ngelaṅ nà Israél nsi ta' ben tse bo na' nta' i là. Tshùaben bèn ntshobe.

³ Ba Hesbon tsham zwe nummbe bo sate Aï. Ngonngon Rabba, bin kua'a, bin tôg nke'mbàm, bin làn wut tsine, bin kù nde mbaṅ ba kàbngô, nko' nswe'e. Tshù bebun Malkom nà ze ngakeban tshwèt nèn yi ndà kuan boa ghafa' tse mba kamkam tse là.

⁴ Numk'o nke ngamte wul o num ntômbo' mu, num ntômbo' mu mi ntùn ménngon ngatatu? O lo ke njab ntù o num tshunkàb tsho, nke ntshob ndù: We z'a ghù nebù' tu i nsi num àm à?

⁵ Ndonni m'a' ghù bwôg se' num o. Tshùaben tàndà ntsho bèn ntshobe. Bwôg nsi fe à bag bag kà se' num o; bo nsi ta' mba zit mèn no tshag à be tà ngùanesà.

⁶ Là, yen nà nsi be tôg me lo' bon Ammon tse bo be kuan nà mbèn yi njam. Tshùaben bèn ntshobe.

Ntshob Nsi num Edom

⁷ Num Edom, tshù mba Tshùaben tàndà ntsho tshob li: Ndù zenu ke' bèn nebe bag ngô Téman ké? Ndù zete ke' bèn nebe netèt ghasiaṅte ké? Zenu yub vù vù ké?

⁸ Ba Dedan, bin kù, bin kaṅ mvèn zin, bin kù ntsho ntùm ba ngabndoṅ, nummbe m'a' ghù nge' tsho num nzwit Esau. A b'a yub ngelaṅ nevù ntsha li.

⁹ Ghakàb ntàm ndu' tse bo tshwèt mfa' la' o là ghù nefaṅ tsha ntàm tù ndu' ze bo nsi kàb là; tshô tse bo se' ndà o tèttswe' là ghù nelo' à ju z'a bwô yub là;

¹⁰ là, tu wul àm, me nsi lag ntsha' nzwit Esau fafa, me nsi to tun yube, bo be ke bèn nku'ni neleme. Bon tshobe, fèt tshobe, tshob ba ndùla' nsi bi fa. Yub tu wut ke nsi bèn be.

¹¹ Ndùse bin nsi be ke bèn mbe là, me nsi ghù bontse tsin yôge, tsin fôg bènnzwi nsi nywinte num àm.

¹² Nummbe tshù mba Tshùaben tshob li: ben ts'a na' mbe ke bwô ndù bo nu ntu' là nsi nu ntu'; bin kwate mbe bin nsi tswe zin à ndùlala ké? Nga! be bin ke tswe à ndùlala. Bin nsi nu ntu'.

¹³ Tshùaben tshob ndù: Me lo' tu wul àm ntshob nsaṅlaṅ bwe ntshob ndù: Botsra nsi tù' fam, be ju tuswe. Bo nsi sat'é, so ndon tu i. Njoṅ ntusô mi fa nsi tù' fam, matmat.

¹⁴ Me Yérémia ju' mo' ta' tshô Tshùaben. Ta' ngantum nèn netèt ngôngô, ndù bo netum i bwe nke ntshob ndù: Bin tse'te be lo nsi num ba Edom! Bin lo nsi num ntsho.

¹⁵ Nummbe me nsi ghù o tù' metsil o netèt ngôngô, bo ke ngwag o netèt benntùn.

¹⁶ Ka't'o; ko'tewut z'a ntù o là tshag o nze ghua. Wù z'o be ntswe ntùm ntô ngabloṅ, nke mbe num tu nkônga là. A te nkàn o be tà mfe tù mba sa'mbu' là, là, mba m'a' tèn o mfe bwe ma' nsi. Tshùaben bèn ntshobe.

¹⁷ Edom nsi tù' fam. Ghatshùanze nsi tshàme. Bo nsi be yen ba nge' yen ngô là tôte fin.

¹⁸ Tshùaben tshob ndù: A nsi b'a mba nge' Sodom, nge' Gomora boa ntusô mi a mbaṅ bwe là. Sàm mènntùn ke nsi bèn tswe Edom, sàm nshum mènntùn ke nsi bèn tshùa bwe.

¹⁹ Ngakeban tshwèt nko' nkaṅ Yordan mi ka'te mba ta' ngwayit là, nke nèn dù'ntswe z'a ta là. Me yoṅ ngù Edom kù. Me nsi te mèn ze me tsho' i là bwe. Kua' we z'a fut'àm à? Kua' we z'a ghù netsiaṅ àm nsi kam à? A zit mfen z'a ghù netùn tu mbwe àm à?

²⁰ Bin ju' nu ze Tshùaben jù' num Edom, boa nu ts'a tàmte num ba Téman ni: Ṅ, bo nsi soṅ yub nèn zwite mba fikèt njùmbwe là. Bo nsi sate kua' tshob dù'ntswe.

²¹ Tshu'te yub nevù, ghù tsha' nyi'te, maṅ tà nkum dibantse meba.

²² A tshwèt mfùt mba sa'mbu' là, nke nyit mbàb mi num Botsra. Ntù tse soyé Edom be sen lé'njù l'a mba ntù ta' mènnzwi z'a tshwèt ndùbte là.

Ntshob Nsi num Damas

²³ Num ba Damas. Tuswe ko ba Hamat boa ba Arpad, nummbe bo ju' ta' tshô kebwô, bo tshwèt mvètte. A ta' dibantse z'a tshwèt mbùne, ke ghù nefi là.

²⁴ Ba Damas vù nsi, bo kaṅ wut nke nkù, fétwut ghom yube, nge' boa ba ya ghom yube, mba mènnzwi z'a tshwèt ndùbte là.

²⁵ Ah! Bo ke' ghua' sen tusô là, tusô nekuni, tusô s'a be mfà tsiaṅte me là.

²⁶ A ndùlala, tse ghuan benntùn nsi vùte num ba manze, njoṅ tse ghama' ntsho fa bite num sen lé'njù là. Tshùaben tàndà ntsho bèn ntshobe.

²⁷ Me nsi te mbwôg num kàbngô ts'a Damas là, a kù mi mba' fen Ben-Hadad mfen Damas.

Ntshob Nsi num Kedar bo Elam

²⁸ Mum ngô Kedar bo nufen Hatsor tse Nébukanetsar mfen Babilon na' nkut là. Tshù mba Tshùaben tshob li: bin lo nsi, ko' nèn num Kedar; Bin biagte bon ntumnyam!

²⁹ Bo lo' ntàb tshob boa bwoṅ nyàm tshobe, ndo' tshob keki, tshu tshob boa kamél tshobe, mbe lo' ndo' nkua' nkag bwôg yi num bo bag bag.

³⁰ Bin yôg wut tsine, bin kù ndende, bin lem ntùm tsha' me ba Hatsor, nummbe Nébukanetsar mfen Babilon tàmte kebwô num bin, a jù' nebiagte zine. Tshùaben bèn ntshobe.

³¹ Bin lo tù, nèn num ta' ngô z'a tswe fite, ntswe mbétni là. Tshùaben bèn ntshobe. Yen ngô là be ts'a njamnjam, ke ghù tse ba nzendà, ke ba fùnndà lo. A ke ntswe à tù' i.

³² Bo nsi lo' njoṅ kamél tshob fa, bwoṅ nyàm tshob ts'a yàm nà tù' tshu ben ghua; me nsi sate ben tse bo be nkom mbaṅ tu tshob là tshag bag bag. Me nsi ghù yub nevù fe à bag bag kà nse'e. Tshùaben bèn ntshobe.

³³ Hatsor nsi tù' b'a dù'ntswe mbù tshwèt, be kônkwa z'a tswe matmat là. Sàm mèn ke nsi tswe bwe. Sàm mèn ke nsi tshùa bwe.

³⁴ Tshùaben tshob ntshob mi ngatshob ntshob Nsi Yérémia num Elam, ndùse se fen Sédékia, mfen Yuda ke nto'te là ntshob ndù:

³⁵ Tshù mba Tshùaben tàndà ntsho tshob li: M'a' be'te mi ngoṅkét soyé ba Elam. Bo bèn mbe mbwe ben neta ntùm ntshu ntsho ba Elam.

³⁶ M'a' ghù fetmbaṅ kuà fe num ntôg kamànyam nkua' nse' num ba Elam. M'a' lo' tshen fetmbaṅ nà nsate yub yi. Sàm ta' ngô ke nsi be, ze tse ghakùla' Elam ke zin nkum bwe là.

³⁷ Me nsi ghù ba Elam vètte mbwe ghakeban tshobe, mba mbwe ben tse bo tshwèt nya' tu yub là. Me nsi lo' ba nge' se' yi num bo, tonkèt yantù. Tshùaben bèn ntshobe. Me nsi lo' ṅwi yab yi njam bo, tà nkum ndùse me biagte yub là.

³⁸ Tshùaben tshob ndù: Me nsi te diaṅkwa sàm Elam, biagte mfen boa kamkame.

³⁹ Nda' ndù a nsi be ngelaṅ mànjam me lo' kuan Elam mbèn yi njam. Tshùaben bèn ntshobe.