Yérémia 46 - NTSHOB NSI

¹ Ntshob mi Tshùaben na' ntshob ngatshob ntshob Nsi Yérémia mfà mum ngôngô là.

Ntshob Nsi num Egipto

² Num Egipto. Num ntshu ntsho Faraon Néko, mfen Egipto, z'a be mbaṅ ta'ntse Efrat, Karkémish, Nébukanetsar mfen Babilon tshùa i ntsho là. A lo be be ndù Yoyakim nshum Yosias mfen Yuda tswe num fen ngu'njù kuà.

³ Bin nabte tshètntsho se nke' bo se ndùb nèn tshwèt ntsho.

⁴ Bin nabte nyàmdiaṅ nko' num bwe me ghako' nyàm. Bin tete ntshe' tu bin ntume; bin tswitte nkô mine, ma' kum tùn num bin!

⁵ A ke din à? Bo tshwèt mbwôge, bo bèn tuntun nà; tshob nduku là tse mbu mub bot là. Bo tshwèt nkù kà nke ndôte njam. Tshù bwôg l'a be njoṅ bag fa là. Tshùaben bèn ntshobe.

⁶ A ke' bwô ndù fùag mèn fon manze yôg ndùs'a tshwèt nkù là. Kà neta nduku tum ntshu vùkob! Bo tshwèt nke ntiag ngwù nsi, nke nzwiaṅte num nkaṅ Efrat z'a be tu là.

⁷ A we z'a tshwèt nko' mba Nil, ze ntse mi tshwèt mbùn mba ba koṅntse à?

⁸ A b'a Egipto. A ke nko' à mba Nil là, ntse mi nke mbùn mba ba koṅntse là. A be ntshob ndù: Me tshwèt mole, me nsi dun num nsitsha'a, biagte ntusô boa benntùn.

⁹ Ba nyàmdiaṅ, bin ko'o; nkalig, a bwô bin ko' ndende. A bwô ba neta nduku la'te wut yub, me tshob à ba Etiopia boa ba Put tse bo ket tshètntsho là, me tshob à ba Lud tse bo be ma' nkét mi bo taṅte ngoṅ i là.

¹⁰ Sen lé'njù li b'a se Tshùaben Nsi tàndà ntsho; a b'a lé'njù yagte mba'a, a tshwèt njagte mba' ghakeban tse. Ṅwi tshwèt nzwite, njwèle, a bum lem tshobe. Tshù fe ben Tshùaben Nsi tàndà ntsho là, ngô tu num nkaṅ Efrat.

¹¹ Ngon Egipto, wù bo ke' yoṅ ntabte là, ko' nèn Galad ndo' la nelamte! Kà ghùtni wul o num mfu, mb'o ke yate tsho.

¹² Ngôngô lèn tuswe z'a ghom o là, nkua' mu dun num nsitsha'a, nummbe tsho soyé tshwèt ntiage, mèn nke ngwù num mèn. Njoṅ yub fa tamte ngwù nsi.

¹³ Ntshob mi Tshùaben na' ntshob ngatshob ntshob Nsi Yérémia, num Nébukanetsar, mfen Babilon z'a ke ndiag nese' ndab ngô Egipto là.

¹⁴ Tswi yen nkùn nà Egipto, tshag nkùn nà Migdol, tshag nkùn nà Nof mba Takbanès. Tshob yi ndù: Lo nsi, nabte wul o, nummbe ṅwi tshwèt njab nu mbaṅ o!

¹⁵ A ndùke! Apis b'a yà, a kù kà? Me tshob à neto fot mfô z'a be zin bebun nà. Yu neta bebun nà vù nsi ké? Kua' nenùn Tshùaben tèn i ma' nsi.

¹⁶ A ghù tse yàm nke ntiage, mèn nke ngwù num mèn, bo nke ntshob ndù: Be nène, be bèn mbaṅ ze be nzwit mèn, ntùm ze be ko' ngô, ntsin ngùanesà mbaṅ ṅwi z'a tshwèt mbiagte dù' là.

¹⁷ Bo be nkua' bwe ntshob ndù: Faraon, mfen Egipto, a tù' b'a ta' tshu'te, nummb'a faṅ ngelaṅ tôg.

¹⁸ Me lo' tu wul àm, me mfen ze lén sàm be Tshùaben tàndà ntsho là, nsaṅlaṅ yi ntshob ndù ngakeban tshwèt nse'e, ndù a fute Tabor z'a be ntshag ntshùa i tù netèt tsemo' mbale, ndaṅndaṅ mba Karmél z'a be nswe' nkum dibantse là.

¹⁹ Ngon z'a be ntswe Egipto là nabte ze ntsha' kuan; nummbe Nof nsi tù' kônkwa; bo nsi ton i; benntùn ke nsi bèn tswe bwe.

²⁰ Egipto b'a ta' mbwô metshab mfô. Ngasate dù' fe a tu, a tshwèt nse'e.

²¹ Ghakô nkàb tse bo be netèl i là b'a mba mfot mfô mi bo tshab yub mebwô là. Mba bo yub kaṅ mvèn yub, nke nkù, ke bèn nku'ni nefènte. Nummbe lé'njù nge' yub kab mbu num bo, ngelaṅ nekeb ntsha yub te nsi.

²² Nz'é fute nze nyu; nummbe boa ta' ntshu ntsho bèn nke nse'e. Bo tshwèt ndo' ba njàm nse' yi num i, ndaṅndaṅ mba ghabag ntshwèn nà.

²³ Bo tshwèt nkeb ntù ntùm fèn se, mba mb'a be mèn ke tsho bwe nze là. Tshùaben bèn ntshobe. Nummbe bo yàm ntshùa ngamntàn, be mèn ke ku'ni nesiaṅ yube.

²⁴ Tuswe ghom ngon Egipto. Bo swèn i mum mbu nzwit mèn z'a be tu là.

²⁵ Tshùaben tàndà ntsho, Nsi Israél tshob ndù: Tshù, m'a' so ntsha tu Faraon, Egipto, nsi tse boa fenfen tse, Faraon boa benntùn fa tse bo be nso ntù num i là.

²⁶ Me nsi swèn yub mum mbu ben tse bo tshwèt nya' tu yub là, mum mbu Nébukanetsar mfen Babilon, mba mum mbu ghafa' tse; yen nà nsi be tôg benntùn bèn mbe Egipto mb'a na' mbe mbwembwe là. Tshùaben bèn ntshobe.

²⁷ Là, bin nzwit ngafa' àm Yakob, kà bin bwôg. Ba Israél, kà bin vètte! Nummbe me nsi tshu' zin num tsha' tse bin be bwe ngùanesà là. Me nsi tshu' zin ntùm ngô ze bin be kuan bwe là; nzwit Yakob nsi bèn njam, tsiaṅte, be ntùm fite bo mbétni; sàm mèn ke nsi kamte zine.

²⁸ Tshùaben tshob ndù: Kà bwôg me nzwit ngafa' àm Yakob, nummbe bag bin bèn mbe. Me nsi biagte ngô tse me na' nsate zin ntùm bwe là. Là, me ke nsi biagte zin tu wut. Me nsi lo' à zenu kà so ntsha yi tu bin, nummb'a be me ke faṅ zin ndùlala.