Yérémia 4 - NTSHOB NSI

¹ Tshùaben tshob ndù: Israél, a be z'o bèn njam ntèl àm, a be z'o bèn ntèl àm, ma' mfa' mu mi a bag nga' mbu njam nà, mb'o ke nsi bèn be tshakendà.

² A be z'o lo' tu wut Tshùaben nsaṅlaṅ yi, ntùm nenùne, ntùm ndaṅndaṅ, ntùm netsin nà, mba bo nsi tshùa njam i tam ntse ngôngô, ngôngô bèn nke ṅwate njam i.

³ Nummbe kua' tu wut Tshùaben tshob ba Yuda boa ba Yérusalém ndù: A bwô ndù bin tem mo' nà nswe, kà bin ywit tshu ntùm njô.

⁴ Bin si ket num miag Tshùaben, bin lànte wut tsin bo ntù tsin me ba Yuda boa ba Yérusalém, mbwôg ndù kà yantù àm kam mba ta' mbwôg là, nkù, sàm mèn ke ku'ni nebiagt'é. A be ndùlala mb'a b'a num tshùagntù zin boa mfa' mine.

Ba tum nsi se ka ntùm ngô

⁵ Tswi nkùn mà Yuda, tum nkùn mà Yérusalém ntshob ndù: Bin tô nta ntùm ngô! Bin tshag nze zin tà tù ntshob ndù: Bag bin nèn ntùm ntusô mi bo kut ntsham ntsiag là.

⁶ Bin te ta' keki nze Sion. Bin kù nène, kà bin tsin, nummbe m'a' ghù nge' fe tu ntsho, mo' mà nesate ze ndùb.

⁷ Ngwayit tum ntùm ngab i; ngasate ngôngô tam manze; a tum ntùm dù'ntswe i num nesate ngô o z'a b'a kônkwa là. Benntùn ke nsi bèn be ntùm ntusô mu mi bo sate là.

⁸ Ndùlala, a bwô ndù bin tôg nke'mbàm, ndàn wut tsine, ntsham zwe, ntshob ndù: Wé! Nummbe tonkèt yantù Tshùaben ke' tsho' lag num be.

⁹ Tshùaben tshob ndù: Num sen lé'njù là mfen boa kamkam ke nsi ghù fènntù. Nu nsi tshùa ghale'te; ba ghatshob ntshob Nsi nsi tshàm neshu.

¹⁰ Tu wul àm Yérémia, me tshob Tshùaben Nsi ndù: Ndù o na' netatte yen nzwit mèn ni bo Yérusalém kà ntshob ndù bo nsi ghù fite ké? Ndonni tshù ṅwi là ze bo tsho' num bo là.

¹¹ Bo nsi tshob yen ngelaṅ nà yen nzwit mèn bo Yérusalém ndù: Mo' jumte fetmbaṅ tshwèt mfe mfe num ntshùa kônkwa nke nse'e; ke ku'ni neke'te nsa ke bèn mbé'te dù'. Yen fetmbaṅ nà tam nze, nke nse' num ngon yàm nzwit mèn;

¹² ta' neta fetmbaṅ fe bwe nke nse' num àm; là, mba kua' yàm tu wut nsi keb yàm ntsha ndonni.

¹³ Tshù, ngasate ke nko' nse' à mba ndot là. Nkalig mi b'a mba zim nà. Nyàmdiaṅ tse be mfùag wut ntshùa ghammàtat. Nge' num tu be, nummbe bo sate be.

¹⁴ Yérusalém, lànte ntù o num nukebwô, ndùlala ndù o yôge. O nsi ke lé' nkwate kebwô ntùm ntù o tà nèn kum à ndùke?

¹⁵ Nummbe nze z'a fe Dan nà ke ntswi à nkùn nge'. Yen nze là tswe à tà num mbat Efraim kà nke ntshag nkùn nà.

¹⁶ Bin tshag yen nkùn nà ngôngô, bin tshag yen nkùn nà mà Yérusalém, ntshob ndù: Tshù ghalo' la' là tse bo tshwèt mfe ngô z'a nesà nse' là. Bo tshwèt mbu' ngoṅ tun mi ntusô Yuda.

¹⁷ Bo lam Yérusalém mbum mba ben tse bo tshwèt nta' nà là. A b'a nummbe Yérusalém ta tu mbwe àm. Tshùaben bèn ntshobe.

¹⁸ Tshù ntsho'fa' nzin mu boa mfa' mu soṅ nso num o là. Tshù ntàm fa' tshùagntù o là! Yu laṅte b'a kua' ze nezwe; a lab o kà ntsho ntù o.

¹⁹ Zwe' àm! Zwe' àm! Me tshwèt nju' ya ntùm ntù àm, ntù àm tshwèt ntame, be me ke mi ntswe, nummbe wù ntù àm tshwèt nju' nze nta, nke nju' nze tshu'te ntsho.

²⁰ Nkùn nesate dù' se ka ntùm ngô, bo sate njoṅ ngô fa. Bo biagte tshàm ntàb à yoṅ ntshù', mbiagte màm mba' num ta' ngualag.

²¹ Me nsi yen keki, ju' nze nta tà kum à ndùke?

²² Tshùaben tshob ndù: Kua' nenùn yàm nzwit mèn bà, a ke' lèn àm tse; tshen ben nà b'a kagni, ndù zenu ke' be bo. wut yub be mfùag neghù nukebwô. Là, bo ke' lèn neghù numebwô.

²³ Me Yérémia lôte tsha'a, njen a b'a banban, mbe nge; ndôte kamànyam, njen ndù nelàn fa bi mfe bwe.

²⁴ Me lôte ba mbale, njen bo nke mvètte; nkônga fa nke nyi'te.

²⁵ Me lôte, njen ndù mba nda' ta' mènntùn ntshù' ke' tù', njen ndù njoṅ nsaṅ mi a kamànyam nà kùù.

²⁶ Me lôte, njen ndù Karmél tù' kônkwa, ndù bo sate njoṅ ntusô mi fa mbwe Tshùaben, mbwe tonkèt yantù i.

²⁷ Nummbe Tshùaben tshob ndù: Bo nsi sate njoṅ ngô fa, nda' ndù me Tshùaben, me ke nsi biagt'é koṅkoṅ.

²⁸ A nsi tshùa ndùlala nsitsha' b'a nsivù; kamànyam tam njam mfe tù. Nummbe me lo tshobe, me lo jù' yen nu là. Me ke nsi sô ju num yàm keb ntsha; me ke nsi bènte tuntun.

²⁹ Ndùse tshu'te ghako' nyàm boa ze ghama' két nsi tum nà, njoṅ benntùn fa nsi kù tum ntùm ntusô; bo nsi kù nèn fèn, ko' num ngondoṅ. Bo ghua' njoṅ ntusô fa; benntùn ke tshwèt mbèn ntswe bwe.

³⁰ Wù Yérusalém ze bo sat'o là nsi ghù à ndùke? O nsi ma' nzwe meba num o, o nsi lo' tshukwi gol kwi wul o yi, o nsi mag tun miag mu. O ke nabte wul o à banban. Màndà tsho tshwèt ngwag o, nke ndiag nezwi o à nezwi.

³¹ Me ju' nkua', a fute nkua' ta' mènnzwi z'a tshwèt ndùbte là, nkua' nge', a fute mi mènnzwi z'a yôg nto' se bwe ngon nà. Men nà b'a nkua' ba Yérusalém. Bo tshwèt ntsham zwe, ndù bo tshag mbu mub tù, nke ntshob ndù: ghayennge' mba bag là, bag vù nsi mbwe ghazwi benntùn.