Yérémia 37 - NTSHOB NSI

Yérémia ndàtsha

¹ Sédékia nshum Yosias tô num ze dù' Yékonia nshum Yoyakim. Nébukanetsar mfen Babilon na' mbèn njab i mfen ndù a ke ntô ngô Yuda.

² Ke ze tu wut, ke ghafa' tse, ke ngô lo ke ju' ntshob mi Tshùaben tshùa num ntshu ngatshob ntshob Nsi Yérémia ntshob bo là.

³ Mfen Sédékia tum Yukal nshum Shélémia, bo Sofoni nshum Maaséya, ngafà tshule'te, mbaṅ Yérémia ngatshob ntshob Nsi, bo tshob yi ndù: Ma' mbu num yag tu mbaṅ Tshùaben Nsi be.

⁴ Tshù, a lo be be Yérémia nke nke' nzinte netèt benntùn; bo lo ke yoṅ mfùn i ndàtsha.

⁵ Ntshu ntsho Faraon lo tum Egipto; ba Kaldéa tse bo kab mbu num Yérusalém nà, be ju' yen tshô là, ntum Yérusalém.

⁶ Ndùlala Tshùaben tshob ngatshob ntshob Nsi Yérémia ntùm ntshob mi ndù:

⁷ Tshù mba Tshùaben, Nsi Israél tshob li: Bin tshob mfen Yuda z'a tum zin bin bètt'àm nu là ndù: Tshù ntshu ntsho Faraon z'a ke nse' ywimte zin nà z'a tshwèt mbèn njam Egipto, ntùm ze ngô là.

⁸ Ba Kaldéa nsi bèn njam, kam sen tusô li ntsho, lo' i, te mbwôg ntùm bwe.

⁹ Tshùaben tshob ndù: Kà bin fùte wut tsin zin tu nke ntshob ndù: Ba Kaldéa nsi tsin tà ngùanesà mbaṅ bag. Nummbe me tshob bin ndù bo ke nsi tsin nesà mbaṅ bin.

¹⁰ A be ze bin tshùa be ntshu ntsho ba Kaldéa tse bo tshwèt nde' zin ntsho là, mba mba tse bin kag mfaṅ num bo, bo ke' ntùn nà nsi lo ntùm ntàb, mba we lo te mbwôg ntùm sen tusô li nton i yi.

Bo ma' Yérémia ndàtsha

¹¹ Ndùse ntshu ntsho ba Kaldéa nèn ngùanesà num ntshu ntsho Faraon nà,

¹² Yérémia diag netum Yérusalém nèn ntùm ngô Benjamin, nsô wul i netèt ngô.

¹³ Ndùs'a zin nkum nzendà Benjamin nà, tàndà ntsho ngabéb dù', lén se Yériya nshum Shélémia, nshum Hanania be bwe. Ndùlal'a ghom ngatshob ntshob Nsi Yérémia, ntshob ndù: O ke ntam njam ba Kaldéa!

¹⁴ Yérémia bùnte ndù: Tatte! Me ke tam à njam ba Kaldéa. Là Yériya ke ju' mb'a tshob là. A ghom Yérémia ndo' i nèn yi mbwe kamkame.

¹⁵ Kamkam ya ntù num Yérémia, ndab i, mfùn i ndàtsha ntùm ndà Yonatan ngakite, nummb'a lo ghù ndàtsha ntùm bwe.

¹⁶ Tshù mba Yérémia tsho yi ntùm ndàtsha, ndà njame, dù' z'a tswe bwe neshu là.

¹⁷ Mfen Sédékia tum bo nèn ndiag i, a bètt'é nu njam tsham ntùm ndà i. A bètt'é ndù: Tshùaben tshob ta' ntshob wù ké? Yérémia bùnte ndù: ṅ, ntshob ndù: Bo nsi swèn o ntùm mbu mfen Babilon.

¹⁸ Yérémia bèn ntshob mfen Sédékia ndù: A zit nukebwô ze me ghù wù, ghafa' tsho, yen ngô li kà bin mfùn àm ndàtsha à?

¹⁹ Tsin ghatshob ntshob Nsi tse bo ke ntshob ndù mfen Babilon ke nsi lo nsi num bin, ke num yen ngô li là b'a yà.

²⁰ Mfen àm, wù tshùaben! Kà bèn ntum àm ntùm ndà Yonatan ngakite, mbwôg ndù kà me tsho bwe nkwù.

²¹ Mfen Sédékia tshob ndù bo lé' Yérémia ntshundà ndàtsha, nke mfà tag z'a fe num ta' nze ghaka tag là yi mba sit lé'njù lo. Bo nke ngù ndùlala njoṅ ngelaṅ fa ze tag ke' tusô là. Ndùlala Yérémia tswe ntshundà ndàtsha.