Yérémia 36 - NTSHOB NSI

Yoyakim ton ṅwa'ni ntshob Nsi mi Baruk kite là

¹ Yoyakim, nshum Yosias mfen Yuda lo be ghù num fen ngu'njù kuà, Tshùaben tshob ntshob mi Yérémia, ntshob ndù:

² Lo' ta' bu' ṅwa'ni, nkite njoṅ ntshob fa mi me na' ntshob wù num Israél bo Yuda, mba njoṅ ngôngô fa, fe lé'njù me na' ntshob nu wù num ze ngelaṅ Yosias, tà nse' nkum sènni là.

³ Ndùse tunndà Yuda nsi ju' nukebwô ze me kwate neghù yi là, mb'a be mo' ndù mba zit mèn no kag ze manze kebwô z'a tshùb là; mb'a b'a tshùa ndùlala me lagte mfànnu mub bo nukebwô yub.

⁴ Yérémia tsiaṅ Baruk nshum Nérija; Baruk kite njoṅ ntshob fa mi Tshùaben na' ntshob Yérémia là. Yérémia nke ntshobe, Baruk nke nkite.

⁵ Yérémia tshob Baruk ndù: Be me ke lo nsi, ndùlala be me ke nèn ntùm ndà Tshùaben.

⁶ A bwô ndù tu wul o nèn bwe. Gha' ṅwa'ni nsiaṅ ntshob Tshùaben mi me tshob o kite là num ntoṅ ngô, ntùm ndà Tshùaben mum lé'njù netswe nziku'u. Bèn nsiaṅ men ntshob là num ntoṅ ba Yuda tse bo fete ntùm ngô mub se' là.

⁷ Be mo' ndù Tshùaben ju' mba bo ma' mbu yi, nkaṅ ntù tshob nkag manze kebwô là. Nummbe yantù i b'a ze ndùb, mb'a jù' yen ngô là ntùm tshùagntù i là ta neshu.

⁸ Baruk nshum Nérija ghù mba ke lo ze ngatshob ntshob Nsi Yérémia tshob yi là, nsiaṅ ntshob Tshùaben ntùm ṅwa'ni. Yen nu là tôg à ntùm ndà Tshùaben.

⁹ Yoyakim nshum Yosias, mfen Yuda lo be ghù ngu'njù tàn num fen, a be num maṅwù bwe'e, bo tswi nkùn num netswe nziku' mbwe Tshùaben. Yen nu là lôt'a ngô Yérusalém fa, boa ben tse bo fete ntùm ntusô Yuda nse' Yérusalém nà.

¹⁰ Baruk siaṅ ntshob Yérémia ntùm ṅwa'ni, num ntoṅ njoṅ ngô fa, ntùm ndà Tshùaben, ntùm to'ndà Guemaria, nshum Shafan ngakite. Yen dù' là b'a bam ntshundà z'a mfe tu là, num nze netsho yi num nzendà ndà Tshùaben ze nswe.

¹¹ Mika nshum Guemaria, nshum Shafan, be ju' ntshob Tshùaben mi a be ntùm ṅwa'ni là,

¹² nswe' nèn ndà mfen, ntùm to'ndà ngakite dù' ze kamkam fa, Elishama ngakite, Délaja nshum Shemaéya, Elnatan nshum Akbor, Guemaria nshum Shafan, Sédékia nshum Hanania boa njoṅ tsemo' kamkam fa tse'te là.

¹³ Mika soṅ yub njoṅ ntshob mi a na' nju'u, ndùse Baruk ke nsiaṅ ntùm ṅwa'ni num ntoṅ ngô là.

¹⁴ Ndùlala njoṅ kamkam fa tum Yéhudi nshum Netania, nshum Shélémia nshum Kushi mbaṅ Baruk, a tshob yi ndù: Lo' ṅwa'ni z'o siaṅ num ntoṅ ngô là nse'e. Baruk nshum Nérija lo' ṅwa'ni nèn ntèt yube.

¹⁵ Bo tshob yi ndù: Tswe nsi, nsiaṅ ṅwa'ni num ntoṅ mag bag ju'u. Baruk siaṅ num ntoṅ mube.

¹⁶ Ndùse bo ju' njoṅ ntshob fa là, bo lôte wut tshob bo bo ntùm bwôg, ntshob Baruk ndù: Bag nsi soṅ mfen njoṅ men ntshob là fa.

¹⁷ Bo bèn mbètte Baruk nu ntshob ndù: Soṅ yag mb'a tôg k'o nkite njoṅ men ntshob li fa là:

¹⁸ A tshob njoṅ men ntshob li fa m'a ntshu i; ndùlala me lo' ntse ṅwa'ni nkite yi ntùm sen bu' ṅwa'ni li.

¹⁹ Kamkam tshob Baruk ndù: Nèn bin Yérémia tamte ndeme, ke bam ndù mèn lèn dù' bin be là.

²⁰ Yen nà be tôge, bo nèn ntshundà mfen, mfaṅ ṅwa'ni ntùm to'ndà Elishama ngakite, nèn nsoṅ mfen njoṅ ntshob fa.

²¹ Mfen tum Yéhudi ndù a nèn nkwé ṅwa'ni. Yéhudi lo' ṅwa'ni ntùm to'ndà Elishama ngakite, nsiaṅ i num ntoṅ mfen, mba kamkam tse bo be mbaṅ mfen nà.

²² Mfen na' mb'a ntùm ba' sàne; a na' mb'a mum maṅwù bwe'e ndù bo kwé'te mbwôg mbwe i.

²³ Mba zit ngelaṅ no Yéhudi siaṅ mfe ṅwa'ni ntat ke nkuà lo là, mfen lo' bi ngakite nke nkebte yi ma' mbwôge, kà njoṅ bu' ṅwa'ni fa kù miagte.

²⁴ Mfen boa njoṅ ghafa' tse fa ju' njoṅ men ntshob là fa ke bwôg, ke fagte nzwe tshobe.

²⁵ Elnatan, Délaja bo Guemaria lo le'te mfen ndù k'a ton bu' ṅwa'ni là; nda' ndù a ke bam.

²⁶ Mfen tshob Yéraméel, nshum i, ntshob Séraja nshum Azriél, bo Shélémia nshum Abdel, ndù bo ghom Baruk ngakite bo Yérémia ngatshob ntshob Nsi. Là Tshùaben lem yube.

²⁷ Tshùaben tshob nu Yérémia mo' yoṅ i, ndùse mfen ton ṅwa'ni ntshob mi Baruk na' nkite be ntùm bwe là. Yérémia na' mbèn nke mfà ntshob kà Baruk nkite. Tshùaben tshob Yérémia ndù:

²⁸ Bèn ndo' mo' bu' ṅwa'ni nkite ntshob mi a be ntùm mbwe ṅwa'ni ze Yoyakim mfen Yuda na' nton nà bwe.

²⁹ O nsi tshob num Yoyakim mfen Yuda ndù: Tshùaben tshob ndù: O ton sen bu' ṅwa'ni li, ntshob ndù: Numk'o nkite men ntshob li ntùm bwe ndù mfen Babilon nsi se' sate yen ngô li, mbiagte benntùn boa ba nyàm à?

³⁰ A ndùlala Tshùaben tshob num Yoyakim mfen Yuda ndù: Sàm ze mèn mba ntshù' ke nsi tswe num diaṅkwa David; bo nsi yag fe i num nyam mbwôgtshù, yag fe i num mfùag tèttswe'.

³¹ Me nsi so ntsha tu i, tu nzwil i boa ghafa' tse num mfànnu mube. Me nsi ghù nge' tse me na' njù' neghù num ba Yérusalém boa ba Yuda là tsho yube, nummbe bo ke' kô neju' nz'àm.

³² Yérémia lo' mo' bu' ṅwa'ni mfà Baruk nshum Nérija, ngakite. Yérémia tshob njoṅ ntshob mbwe ṅwa'ni ze Yoyakim mfen Yuda na' nton nà, Baruk bèn nkite ntùm ṅwa'ni. Bo bèn nkwi'te memo' ntshob mi a fute ntshob mbwe ṅwa'ni là bwe.