Yérémia 35 - NTSHOB NSI

Ben Rékab

¹ Tshùaben tshob ntshob mi Yérémia num ze ngelaṅ Yoyakim nshum Yosias, mfen Yuda, ntshob ndù:

² Nèn ntùm ndà ben Rékab ntshobte bin à bo; lo' yub nèn yi ntùm ndà Tshùaben, ntùm mo' to'ndà, mfà ndu' bo, bo nu.

³ Me ngatshob ntshob Nsi Yérémia lo' Yaazania nshum Yérémia, nshum Habazinia, fèt tse, njoṅ nshumnshum tse fa, mba ze tunndà Rékab,

⁴ ndo' yub nèn yi ntùm ndà Tshùaben, ntùm to'ndà tse nshumnshum Hanan, tse Yigdalia, mèn Nsi. A b'a mbaṅ to'ndà kamkame, mfe tu to'ndà Maaséya, nshum Shallum, ngabéb nzendà.

⁵ Me tete ba ntu' mbwe bo ndù ndu' dun bwe, mbwe nshumnshum Rékab boa ndô nenu ndu' yi, ntshob bo ndù: Bin nu ndu' là!

⁶ Là bo bùnte ntshob ndù: Bag ke' be nu ndu'; nummbe Yonadab nshum Rékab, tà yag lo tshob bag ndù: Bin ke nsi zi nu ndu', ke bin, ke nshumnshum tsin no;

⁷ bin ke nsi kut mba', ke ywit sàm nzwit ju, ke bwe ntù ndu', ke bèn ngù tshen tshu là mba neghù. Bin nsi ke tswe à ntùm ba ntàb njoṅ sin yôg fa, ndùlala ndù bin tswe yàm yàm neshu ntùm ngô ze bin be ghùn bwe là.

⁸ Bag ke' be nu ndu' njoṅ sag yôg fa; bag, zwi tshage, nshumnshum tshag boa ngonngon tshage.

⁹ Bag ke' be kut mba' num tshag dù'ntswe, ke ghù ntù ndu', nà, ke tsha' tse bo dù' njwit lo.

¹⁰ Bag ke ntswe à ntùm ba ntàb nke mbwe mbèn nke nze tshu tse Yonadab tà yag na' nkite bag là.

¹¹ Ndùse Nébukanetsar mfen Babilon na' nko' nkam yen ngô li là, bag lo tshob ndù: Be nène, be tum nèn Yérusalém, ngùanesà mbaṅ ntshu ntsho ba Kaldéa bo ze Siria. Tshù ju z'a ghù kà bag mb'a Yérusalém nà.

¹² Ndùlala Tshùaben tshob Yérémia ndù:

¹³ Tshù mba Tshùaben tàndà ntsho, Nsi Israél tshob li: Nèn ntshob ba Yuda boa ba Yérusalém ndù: Bin ke' zi'te ndù a bwô neju' ntshu num ntshob màm ké? Tshùaben bèn ntshobe.

¹⁴ Bo lo ze ntshob Yonadab nshum Rékab, z'a na' nto' nshumnshum tse nenu ndu' là. Bo ke' to' nenu tà nse' nkum sènni, nummbe bo ju' ntshu num ju ze tà yub tshob là. Mba me là, me lo tshob nu bin, ntshob nu bin fe nkebnjù, là bin ke ju' tsin nz'àm.

¹⁵ Me lo tum ghafa' tshàm, ba ghatshob ntshob Nsi, me lo tum yub fe nkebnjù netshob bin ndù mba we lo netèt bin kag manze kebwô; bin lôte nu num ngùninu mine; kà bin tam njam tsemo' nsi neke mfa' bo. Bin ghù ndùlala mba bin nsi tswe ntùm ngô ze me na' mfà bin, mba tà tsin nà. Là bin lo ke kù' ntoṅ num yen nu là, ke ju' nz'àm.

¹⁶ Yen nà, nshumnshum Yonadab nshum Rékab num nze ju ze tà yub na' ntshob bo là, nda' ndù yen ngô li ke' be ju' nz'àm.

¹⁷ A ndùlala, Tshùaben, Nsi tàndà ntsho, Nsi Israél tshob ndù: Tshù, m'a' ghù njoṅ nge' fa me na' njù' num ba Yuda mba num ba Yérusalém nà se' num bo. Nummbe me lo tshob bo, bo ke ju' nz'àm.

¹⁸ Yérémia tshob ben Rékab ndù: Tshù mba Tshùaben tàndà ntsho, Nsi Israél tshob li: Mba bin ju' ntshu tà zin Yonadab, mba bin ze njoṅ ntshù' mi fa a kite bin nà;

¹⁹ a tshùa ndùlala me Tshùaben tàndà ntsho, Nsi Israél tshob ndù: Yonadab, nshum Rékab, ke nsi zi bwoṅ mèn ntùm tunndà i z'a tum ntsin mbwe àm nà.