Yérémia 31 - NTSHOB NSI

Nebèn nte te nswe num tsha' tse bo dù' là

¹ Num yen ngelaṅ nà, me nsi be Nsi njoṅ tunndà Israél fa, njoṅ tunndà là fa be yàm nzwit mèn. Tshùaben bèn ntshobe.

² Tshùaben bèn ntshob ndù: me lo ghù kondèn num bo kônkwa, ndù a nzwit mèn z'a yôg bu ṅwi là. A tù' mén nda'nda' Israél tsho ntùm fite.

³ Tshùaben tsin ngùanesà nda'te wul i me, ntshob ndù: Me ghù nkôni z'a tswe matmat là num o me Israél. A ndùlala bèn ngù kà me ke sô bwôntù àm num o.

⁴ Me nsi bèn te o, bo bèn mbù't'o me ngô Israél; ba la' tsho nsi kwi wut, ma' lammbé mbe' bo tum tsho ntùm tsiaṅte tshu nenyiaṅe.

⁵ Bo nsi bèn ywit ntù ndu' num mbat ts'a Samaria là. Ghaywit tshu nsi ywile, kàb ntàm mi.

⁶ Nummbe lé'njù tshwèt nse', ze ghabéb dù' nsi kua' mfe num mbat Efraim nà. Bo nsi tshob ndù: Bin lo nsi, be ko' nèn Sion, mbaṅ Tshùaben Nsi be.

⁷ Tshù mba Tshùaben tshob li: Bin tshag nze zin tù ntùm tsiaṅte num nzwit Yakob, bin tshèn ngoṅ ntùm ṅwate ndo' nsoṅte ngôngô yi. Bin fà là sin tù, bin yob nkwi, nke ntshob ndù: Tshùaben, tshu' yu nzwit mèn, tshé' ba Israél!

⁸ Tshù, me nsi lo' yub tu swe' yi. M'a' kùmte yub num ntôg njù fa. Mfùmiag bo nke'kèt num netèt bo, mènnzwi jùm bo z'a tshwèt ndùbte là. A b'a mo' mà bwoṅ benntùn bèn nke mbèn njam nsen ni.

⁹ Bo be se' nke nkua'a, nke ma' mbu. Me nsi tshagte yube, lo' yub nèn yi mbaṅ koṅntse, tshùa bo à num ta' manze netsine, dù' bo ke tiag là. Nummbe me be Israél à mba ta' tà là. Efraim b'a tuswe àm.

¹⁰ Ngôngô, bin ju' ntshob Tshùaben, bin sa men ntshob là ntùm ngô ts'a tètntse, tà ngùanesà là! Bin tshob ndù mèn z'a na' nsate Israél là nsi bèn tse't'é, ke lôt'é mba ngabéb mbwe be mbéb bwoṅ nyàm tse là.

¹¹ Nummbe Tshùaben tshwèt ntshu' nzwit Yakob. A tshwèt ntshu' i bu mèn z'a ta ntshùa i là.

¹² Bo nsi se'e, fà nze yub tù ntùm tsiaṅte num ntshùa mbat Sion; bo nsi kù nde nèn mbaṅ tshu tse Tshùaben fà bo là: Ngefele, ndu', mfèt, mbwe boa nyàmna'. Ntù tshob nsi b'a mba nka' ze bo zwi' là. Bo ke nsi bèn be ntùm nge'.

¹³ Ndùlala bonngon nsi tsiaṅte ndù nenyiaṅ sa. Nshumnshum boa ywèn benntùn nsi tsiaṅte yub. Me nsi lo' vù sob kaṅ ṅwate yi. Me Tshùaben nsi fite ntù yub ngelaṅ zwe, ghù bo tsiaṅte.

¹⁴ Tshùaben nsi ghù ghale'te ywèt nzile, yàm nzwit mèn ywèt tshu ts'a be tshàm nà. Tshùaben bèn ntshobe.

Nkua' bo nefite ntù

¹⁵ Tshùaben bèn ntshob ndù: Bo tshwèt nju' nekua' nke mfe Rama. Nelàn vù bo netam keshù' mbimbi. Rashél ke ndàn à bon tse. A ke' bam ndù mèn fite ntù i num nu bon tse, nummbe bo ke' bèn mbe.

¹⁶ Tshùaben tshob ndù: Tsin kà nelàne, tsin kà nefètte ntsenyà. Nummb'o nsi ghù ntsho'fa' num mfa' mu; Tshùaben bèn ntshobe. Bo nsi be se' fe à ntùm ngô ngakeban.

¹⁷ Tshùaben tshob ndù: Nenywinte num bwe num yu tu. Bon tsho nsi bèn ntùm yub ngô.

¹⁸ Me ju' mba nzwit Efraim tshwèt ndàn nà, a tshwèt ntshob ndù: O lo so ntsha tu àm, ntsha tsho tu àm, me be mba ta' fot mfô se bo ke' kwiagt'é là. Ghù me bèn njam, me nsi bène, nummb'o b'a Tshùaben Nsi àm.

¹⁹ Ndùse me yoṅ nkaṅ mvèn àm nà me kaṅ ntù àm. Ndùse me lèn yen nu là là, me lab ntù àm mbu. Tuswe ko àm, tuswe ghom àm, nummb'a b'a tuswe nguanmèn ze me ket num àm nà.

²⁰ Là Efraim ke b'a mén ze me num nkô i là ké? A nshum àm ze me be nkô i neshu là. Me num njoṅ ntshob kebwô num i, mbèn nkwat'é be kua' ndende ntù àm. Me nsi ko ndèn mi, nummbe ntù àm tshwèt ntam num i. Tshùaben bèn ntshobe.

²¹ Te ba lèn tù, te ba nsaṅ tù, zete là num manze, num ntshagnze z'o na' nzin bwe là. Bèn njam me nzwit Israél, bèn njam ntùm ntusô mi a b'a mu là.

²² Bin b'a mba ngon z'a bi là, bin nsi ke tsha be netsha tà nkum à ndùke? Nummbe me Tshùaben nabte mo' nu nswe num nsitsha'a. Mènnzwi nsi diag ndu i.

Nebèn nabte Yuda a bwô

²³ Tshù mba Tshùaben tàndà ntsho, Nsi Israél tshob li: Bo nsi bèn tshob ntùm ngô Yuda boa ntusô mi, ndùse me nsi lo' ben tshob bo be kuan bèn yi njam nà ndù: Dù'ntswe nunetsin, mbat nelàn, a bwô ndù Tshùaben tam ntse wù.

²⁴ Yuda boa ntusô mi nsi tete bwe, ghadù' nà boa ben tse bo num ntshagte bwoṅ nyàm nà.

²⁵ Nummbe me nsi fà ntse nefite ntù z'a kù là, ghù ndù ntù z'a yub là ywèle.

²⁶ Me Yérémia, me vôg be ndùse, mbam num miaglo, ndôte, njen ndù màm miaglo lo be num àm mebwô.

²⁷ Tshùaben tshob ndù: Tsemo' lé'njù bwe nse'e, tse me nsi ywit ta' nzwit benntùn bo ta' nzwit ba nyàm num tunndà Israél bo tunndà Israél bo Yuda là.

²⁸ Ndaṅndaṅ mba me na' nzi tshùalo num bo, netsho'o, nekamte, nesate, nebagte bo neghùtni là, be ndaṅndaṅ me zi tshùalo num nekule, bo nebwe ju nsi. Tshùaben bèn ntshobe.

²⁹ Ntùm tshen lé'njù là, bo ke nsi bèn ke tshob ndù: Ba tà lo fèt netswe, mbam bon nke ntà.

³⁰ Là mba we lo nsi kwù à kua' num mi mfànnu; mba we lo z'a fèt netswe là, mba kua' ko' se bam bèn tà.

Kàn nswe

³¹ Tshùaben tshob ndù: Tsemo' lé'njù tshwèt nse'e, tse me nsi wat kàn nswe bag tunndà Israél mba tunndà Yuda là.

³² Sen kàn nà ke nsi fute se me na' ngwat bag à tà tshobe, lé'njù me na' tshùb bu yube, nsô yub ntùm ngô Egipto là; bo lo bagte sen kàn nà, mba mba me na' mbe ngatshagte yub là; Tshùaben bèn ntshobe.

³³ Là, tshù lèn kàn se me nsi wat bag tunndà Israél ndùse tshen lé'njù là nsi tôg li: Me nsi yab ntshù' àm ntùm wut yub, kit'é ntùm ntù bo; me nsi be Nsi yub, bo be yàm nzwit mèn. Tshùaben bèn ntshobe.

³⁴ Yen mèn ni ke nsi bèn tswite yen mèn nà, yen nà ke bèn ntswite mfèl i! Nummbe njoṅ yub fa nsi lèn àm, neto' num tse nke' tà nkum num tse ndùb, Tshùaben bèn ntshobe. Tshù, me nsi lagte mfànnu mube, ke bèn nekwimte nukebwô yub.

Ze nelagte Tshùaben num Israél b'a ju neyi'te

³⁵ Tshùaben z'a te lagnyam neke nké' mbwôgtshù, nte maṅwù boa nsa neke nké' tèttswe', z'a be nkamte dibantse nke ngù ntu' ntse nke ntshu'u, yi ze lén se b'a Tshùaben tàndà ntsho là tshob ndù:

³⁶ A be ze men ntshù' là ke' bèn mbe mbwe àm nà, mba mba nzwit Israél ke nsi zi bèn b'a ta' ngô num miag màm, Tshùaben bèn ntshobe.

³⁷ Tshùaben tshob ndù: A be ze be bo fi' kamànyam mfe tù, mbe ze be bo zwi'te mba tsha' tsho yi mànsi là, mb'a be me ghua' njoṅ ze nzwit Israél fa. Num njoṅ ju fa ze bo ghù me là. Tshùaben bèn ntshobe.

³⁸ Tshùaben tshob ndù: Tsemo' lé'njù bwe nse'e, tse bo nsi bèn kut tusô num lén Tshùaben nà. A nsi be ndùlala neto' num tu ba' Hananéel nèn nkum num nzendà z'a tôgndà là.

³⁹ Bo nsi bèn tèt nkù nefi' dù' yi, ndù bo taṅ se bwe tà nèn nkum kônga Gareb. Nkù là nsi diaṅ nze bag Goat.

⁴⁰ Njoṅ tômbo' fe ben bo tômbwôg fa, njoṅ nà fa tà nèn nkum fub Kédron, tà nkum tôgndà nzendà ba nyàmdiaṅ z'a be ntumnyam nà, nsi b'a ze ju Tshùaben. Bo ke nsi zi kamte tshen dù' là, ke bèn nsate yube.