Yérémia 30 - NTSHOB NSI

Nefe ndà kuan bo mba Israél bèn te la' là

¹ Tshùaben tshob Yérémia ntùm ntshob mi ndù:

² Tshù ju ze me Tshùaben, Nsi Israél tshob li: A bwô ndù o kite njoṅ ntshob fa mi me tshob wù là ntùm ta' bu' ṅwa'ni.

³ Nummbe tsemo' lé'njù tshwèt nse'e, tse me nsi bate ze nebe yàm nzwit mèn, Israél bo Yuda là. Tshùaben bèn ntshob ndùlala.

⁴ Tshù ntshob mi Tshùaben na' ntshobe, ndù a kwag Yuda bo Israél li:

⁵ Tshùaben tshob ndù: Be tshwèt nju' nkua' bwôg. Fétwut num njoṅ dù' fa. Fite ke' bèn mbe.

⁶ Bin bètte njen mbe ze mandum be mbwe là. Numke me nke njen bandum fa boa mbu zwe' bo mba bènnzwi tse bo tshwèt ndùbt'à? Ke z'a ghù se tshob nke ntshùaṅ à?

⁷ A nge' be! Sen lé'njù li b'a se ngùtni, ndù mfuni mi ke' to' yoṅ mbe. A b'a ngelaṅ nge' num Yakob! Nda' ndù bo nsi tshu' i bwe.

⁸ Tshùaben tàndà ntsho tshob ndù: Num sen lé'njù là me nsi be' kele' so, sô i tô o. Me nsi keb tsho nkù, o be ke bèn mbe nkuan ba tum.

⁹ Bon Israél nsi fa' Tshùaben Nsi yub mba David, mfen ze me nsi tsho' fà bo là.

¹⁰ Nzwit Yakob, kà bin bwôg me ghafa' tshàm. Kà bin vètte me ba Israél, nummbe m'a' sô zin num tsha' tse bin be bwe ngùanesà là, mba nzwit zin z'a ndà kuan nà. Nzwit Yakob nsi bèn njam ntùm fite, ntùm la' be tshaṅ, sàm mèn be ke ghùtni yube. Tshùaben bèn ntshobe.

¹¹ Tshùaben tshob ndù: Tshù, bag bin bèn mbe, ndù me tshu' zine. Me nsi biagte njoṅ ngôngô fa tse me na' ntum zin netèt bwe là. Mba bin nà, me ke nsi biagte zine. Me nsi yab nu num bin à njoṅ, nummb'a be me ke faṅ zin à banban ndùlala.

¹² Nummbe Tshùaben tshob ndù: Keko' so b'a se ke tùn, keko' so kuni, mbag neshu.

¹³ Sàm mèn ke bwe z'a kô netshwinte keko' so là. Manze neyat'o yi ke bwe, so fu ke' tum tse.

¹⁴ Njoṅ màndà tsho fa lagt'o. Sàm ta' i mba ntshù' ke' bèn nelat wut num o. Nummbe me lo lab o kua' kebwô, mba mèn be ndab ngakeban i là. Me lo lo' à tshùagntù nso ntsha yi tu o. Yen nà b'a num mfànnu mu mi a gha' mbu là, num nukebwô tsho ts'a yàm neshu là.

¹⁵ Numk'o nke ntshàm num keko' so, num ya z'o tshwèt nju' num nukebwô à? A b'a num mfànnu mu mi a gha' mbu là, num nukebwô tsho ts'a yàm neshu là, ze me ghù o ju' kebwô ndùlala num tshen tshu là là.

¹⁶ Mba tà ndùlala, bo nsi lag ntsha' ben tse bo tshwèt ndag yu ntsha' là. Njoṅ ghakeban tsho fa nsi nèn ndà kuan. Bo nsi tswitte tshu ben tse bo tshwèt ntswitte tshu tsho là. Me nsi ghua' ben tse bo tshwèt ntswitte tshu tsho là ndù bo tswitte tshob tshu.

¹⁷ Tshùaben tshob ndù: Me nsi yat'o, me nsi kut nkeko' mu. Nummbe bo ke ntsiaṅ o à ghua' mènnzwi, wù Sion ze mèn ke tshwèt ndab wut num o là.

¹⁸ Tshù mba Tshùaben tshob li: Me nsi lo' kuan tse bo ntùm ntàb Yakob là bèn yi njam. Me ghù kondèn num tse dù'ntswe. Bo nsi bèn kut tusô num tse fam. Bo nsi bèn kut ntshwèl à kua' mb'a na' mbe mbwe là.

¹⁹ Nenyàmte Nsi nsi bèn be netèt bo, boa tshu'te tsiaṅte. Me nsi ghù bo sine, bo ke nsi bit'a nebite. Me nsi lèn njoṅ yube, bo be ke bèn newag yube.

²⁰ Bon tse nsi be mba bo na' mbe mbwembwe là. Mbumt'é nsi be bwe, me so ntsha tu ben tse bo tshwèt mfétte yub là.

²¹ Bo nsi sô ze mfen à be netèl i. Me nsi ghù à ghebte, nse' mbaṅ àm. Be kua' we ghù fènntù ze tu neghebte num àm à? Tshùaben bèn ntshobe.

²² Bin nsi be yàm nzwit mèn, tu wul àm be Nsi zin.

²³ Tshù fetmbaṅ Tshùaben, yantù i là z'a kam nà, tonkèt fetmbaṅ z'a tshwèt nshùm nà. A ghebte mb'a vù à num tu ghatshùagntù là.

²⁴ Yantù Tshùaben ke nsi bole, ke be ndù a fa'a, nzwiagte mi ntàmtenu. Bin nsi yen yen nu là mebwô ntùm ntswe'njù mi a tshwèt nse' là.