Yérémia 25 - NTSHOB NSI

Ngu'njù ndà kuan b'a ṅam sammbàa. Babilon boa ngôngô nsi vù kame

¹ Yoyakim nshum Yosias mfen Yuda tswe num fen ngu'njù kuà kà Nébukanetsar mfen Babilon njù ze fen. Num yen ngelaṅ nà Tshùaben tshob nu Yérémia mfà num ba Yuda.

² Ngatshob ntshob Nsi Yérémia tshob men ntshob là mbwe njoṅ ba Yuda fa boa njoṅ ba Yérusalém fa.

³ Fe ndùse Yosias nshum Ammon, mfen Yuda be ngu'njù ntshob tat gham num fen nà, tà nse' nkum sènni, a b'a ngu'njù ntshob tat ṅam mbàa mba Tshùaben tshob ntshob mi me, me nke ntshob bin ke tag là. Nda' ndù bin ke neju' mba me tshob là.

⁴ Tshùaben lo tum ghafa' tse, ba ghatshob ntshob Nsi bin, njoṅ ndù fa; là bin ke to' ghom wut tsin, ke to' kù' ntoṅ num nkùn ze bo tshwèt ntshob là.

⁵ A lo ke ntshob ndù: Mba we lo kag manze kebwô nsi bo nzin mi mi a bag neshu là. A nsi tshùa ndùlala bin ghô ntùm ngô ze Tshùaben na' mfà bin mba tà tsin matmat là.

⁶ Kà bin tam njam tsemo' nsi, nke ngwù mbwe bo, mba neke mfa' bo. Kà bin nekamte yantù àm njam neto ts'a b'a mfa' mbu min nà. Me nsi lo nsi a bag num bin.

⁷ Là bin lo ke ju' ntshu àm. Tshùaben bèn ntshobe. Yen nà na' mbèn nsoṅ nge' ntsho yi num mfa' mbu mine, mi a b'a ba neto là. Nummbe yantù àm lo kam num bin.

⁸ A ndùlala Tshùaben tàndà ntsho tshob ndù: Mba bin ke' ju' ntshob màm nà,

⁹ m'a' tum njoṅ ngôngô fa ts'a tu là num bin, Tshùaben bèn ntshobe. Ndùlala m'a' tum bo diag Nébukanetsar mfen Babilon z'a be ngafa' àm nà. M'a' tshag yub njam yen ngô li boa ba la' tse, mba njam ngô tse bo diaṅ i mbum nà. Me nsi tam bu' num bo, lo' yub ghù ju fétwut yi, ze mba we lo nsi yen i tôte fin nà. A nsi tù' fam z'a tswe matmat là.

¹⁰ Me nsi ghù kwi tsiaṅte bo kwi ṅwate mi bwe, ghù nze ndungon bo ze nzwingùn mi bwe, ghù nze masin negho' bàn yi fame, lambo be ke bèn mfà nka' ntùn.

¹¹ Tshen tsha' là nsi b'a fam, be kônkwa. Bin nsi be kuan bu mfen Babilon ngu'njù ṅam sammbàa.

¹² Tshùaben tshob ndù: Tshen ngu'njù ṅam sammbàa là nsi be tôg me so ntsha tu mfen Babilon boa ze ngô num nukebwô tshobe. Me nsi lo' mba ngô ba Kaldéa kaṅ a tù' kônkwa kua' matmat.

¹³ Me nsi zwiagte njabnu mi me jù' num i, bo kite ntùm yen ṅwa'ni li là. (Ju ze Yérémia na' ntshobe, num njoṅ ngôngô ba tum fa là).

¹⁴ Mba bo yub nsi be kuan bu ngôngô yàm boa fenfen ndùbndùb. Me nsi ghù num bo à ndaṅndaṅ mba nzin mub boa mfa' mbu mub be yi là.

Mbùnte nu mfà mum ngôngô

¹⁵ Tshù mba Tshùaben, Nsi Israél tshob me li: Lo' yen ntu' li bu àm, ze ndu' yantù àm dun ntùm bwe là, nèn mfà njoṅ ngôngô fa tse me nsi tum o mbaṅ bo là bo nu.

¹⁶ Ndùse bo nsi nu là, bo nsi tiage, zwiaṅte ngelaṅ bo nsi yen ṅwi ze me nsi tum num bo là.

¹⁷ Ndùlala me kwé ntu' bu Tshùaben, ngù njoṅ ngôngô fa tse Tshùaben tum àm mbaṅ bo là nu ntùm bwe:

¹⁸ A na' mb'a Yérusalém boa ntusô Yuda, fenfen tshob boa kamkam tshobe, num neghù bo tù' fam, ta' kônkwa ze mèn nsi be yen tôte fin nà. A b'a ta' mfi' nelo' nkwimte ba ndon yi, mba bo num nke' njen mba tà sènni là.

¹⁹ A na' mb'a Faraon mfen Egipto boa ben tse, tàndà ntsho tse boa ngô,

²⁰ mba tshé' ba la' tse bo b'a mbwe ntam nà, njoṅ fenfen Uts fa, njoṅ fenfen ngô ba Filistia fa, Askalon, Gaza, Ekron, mba z'a tù' Asdod là;

²¹ Edom, Moab boa ben Ammon;

²² njoṅ fenfen Tiro fa boa fenfen Sidon fa, njoṅ fenfen ba ngô tètntse tse bo be yoṅ dibantse là,

²³ Dedan, Téma, Buz, njoṅ benntùn fa tse bo num nkom nyiaṅ ntshu tshob là,

²⁴ njoṅ fenfen Arabia fa boa njoṅ ba la' fa tse bo b'a mbwe ntam nà,

²⁵ njoṅ fenfen Zimri fa, njoṅ fenfen Elam fa, njoṅ fenfen Media fa,

²⁶ njoṅ fenfen tu fa, tse bo ghebte là boa tse bo be ngùanesà là, mba zit lo num ze ngelaṅ; njoṅ nufen njù fa ts'a be num nsitsha' là. Mfen Shéshak nsi nu ntu' yantù àm n'a ndùse bo nsi miagte nenu yub là.

²⁷ O nsi tshob bo ndù: Tshù mba Tshùaben, Nsi Israél tshob li: Bin nu mbume, bin ywi'i, bin vù nsi ke bèn nelo, bin vù num ṅwi ze me tum num bin nà.

²⁸ Bo nga nekwé ntu' bu o nu, o tshob bo ndù: Tshù mba Tshùaben tàndà ntsho tshob li: Bin nsi nu kua' ntùm yen ntu' li.

²⁹ Me nsi to' neyab nge' à num tusô se bo be ntsiaṅ lén sàm bwe là. Bin kwate mbe bin nsi tum bwe ké? Nga! Bo ke nsi sô zin bwe, nummbe m'a' ghù ṅwi se' num njoṅ benntùn fa num nsitsha'a. Tshùaben tàndà ntsho bèn ntshobe.

³⁰ Ndùlala o nsi tshob ntshob Nsi, tshob ndù: Tshùaben tshwèt ntshu' num kin mbwe se. A tshwèt mbu' ngoṅ tun ba nsitsha' mba ngatshab mfèt be mbu' ngoṅ nà.

³¹ Ngoṅ nà zin tà nkum num ntôg njù, nummbe Tshùaben b'a nsi kam boa ngôngô. A tshwèt ntsho'te njoṅ benntùn fa; a swèn njoṅ yub fa ṅwi. Tshùaben bèn ntshobe.

³² Tshù mba Tshùaben tàndà ntsho tshob li: Yen mbe nge' nsi tsho a ngôngô. Mo' neta fetmbaṅ ndùb kam num ntôgnjù.

³³ Ben tse Tshùaben nsi zwite sen lé'njù là là, nsi vùte nsi, neto' mo' taṅ njù nèn nkum num mo'o; bo ke nsi làn yube, ke ket fe tshobe, ke tshoṅ yube. Bo nsi sa nsi mba nenà netshab dù' yi là.

³⁴ Ghabéb mbwe, bin tsham zwe, bin kua'a, bin yaṅte wut tsin ntùm mbab me ghalôte nyàm, nummbe lé'njù nezwite zin te nsi. Bin nsi ke vùt'a mba nkomnjù mi bo tsho' yub là.

³⁵ Ndàlem ke' bèn mbe ghabéb mbwe, yôg ke bèn mbe ghalôte nyàm.

³⁶ Bin ju' nkua' ghabéb mbwe nju'u, bin ju' mba ghalôte nyàm tshwèt ntshu' nju'u. A b'a nummbe Tshùaben sate nkin mbwe mube.

³⁷ Tonkèt yantù Tshùaben sate nda' mi a ke ntswe fite là.

³⁸ A tum dù'ntswe i à mba ngwayit z'a tum ngab i là. Ṅwi ngasate dù' bo tonkèt yantù Tshùaben lo' ngô nkaṅ kônkwa yi.