Yérémia 24 - NTSHOB NSI

Ntsi mbatsi bàa bo mba ngô nsi bèn be là

¹ Tshùaben ghù me yen ntsi mbatsi bàa, ndù bo te yub mbwe ndà Tshùaben. A lo be be ndù Nébukanetsar mfen Babilon yà lo' Yékonia Yérusalém boa kamkam Yuda, ghalo' tuba' boa ghanabte fùn ndà nèn yi Babilon.

² Mo' ntsi lo ghù mbatsi bo kàb a kua' mbwe yoṅ i là. Mo' ntsi bèn ngù z'a mbatsi kebwô, mèn ke ku'ni nejù, nummb'a bag neshu.

³ Tshùaben tshob me ndù: Yérémia, ke z'o yen à? Me bùnte ndù: Mbatsi. Mbatsi ntùn b'a kua' ze mebwô, mbatsi kebwô bag kua' neshu, ndù be mèn ke jù, nummb'a bag neshu.

⁴ Tshùaben tshob me ntùm ntshob mi ndù:

⁵ Tshù mba Tshùaben, Nsi Israél tshob li: Mb'o ghù fagte num tshen mbwô mbatsi li là, me nsi ghù fagte num kuan ntsho Yuda tse me lo' yub nsen ni ntshag ntùm ngô Kaldéa là be ndaṅndaṅ, kà njôg nko ndèn mube.

⁶ Me nsi lôte yub lag mebwô, sô yub bèn yi ntùm yen ngô li, dù' ze me nsi te yube, be ke bèn mbiagte yube, dù' ze me nsi ywit yube, be ke bèn ntsho' yub là.

⁷ Me nsi fà ntù z'a ku'ni neghù ndù bo lèn àm, ndèn ndù me b'a Tshùaben nà. Bo nsi be yàm nzwit mèn, tu wul àm be Nsi yub, nummbe bo nsi bèn njam se' tèl àm njoṅ ntù yub fa.

⁸ Me nsi ghù num Sédékia mfen Yuda, num kamkam tse bo tshé' ngô Yérusalém tse bo tù' la' ke tse bo kù nèn Egipto lo l'a mba bo nsi ghù num mbatsi kebwô, ts'a bag nejù là. Tshùaben bèn ntshobe.

⁹ Me nsi ghù bo tù' tunu fétwut, tunu nge' num njoṅ nufen fa num nsitsha'a. Bo nsi tù' b'a ju tuswe, tshô, komzwi bo ndon njoṅ dù' fa ze me nsi sate yub bwe là.

¹⁰ Me nsi tum ṅwi, nziku'u, mba keya' num bo, tà nkum ndùse bo biagte yub num tsha' tse me na' mfà bo mba tà tshob là.