Yérémia 23 - NTSHOB NSI

Kebwô num ghabéb mbwe tse tatu

¹ Tshùaben tshob ndù: Ndon tu ghabéb mbwe tse bo ghua' ben tshàm mba nyàm kin, mfaṅ yub bo sate là.

² A ndùlala, tshù ju ze Tshùaben, Nsi Israél tshob num ghabéb mbwe tse bo tshwèt ndôte ze nzwit mèn Israél là li: Bin lo sate ben tshàm mba nyàm nà, bin lo ta' yube, ke lôte yube. Ndonni m'a' ghù bin ket lèt nzin min mi kebwô. Tshùaben bèn ntshobe.

³ Me nsi tse'te tshé' ben tshàm mba njùmbwe là ntùm njoṅ ngô fa dù' me tshag yub ndà kuan nà, lo' yub bèn yi ntùm mub nkin, bo bèn mbwe, njàme.

⁴ Me nsi tsho' ghabéb mbwe tshobe tse bo nsi lôte yube, bo be ke bèn mbwôge, ke vètte; mba ze ntshù' be ke bèn mbi là. Tshùaben bèn ntshobe.

⁵ Tshùaben tshob ndù: Tsemo' lé'njù bwe nse'e, tse me nsi ghù ta' nzwit netsin tum num David là. A nsi be mfen, lo' zenu kà tô yi. A nsi ghù nunetsin ntùm ngô bo nu ndaṅndaṅ.

⁶ Yuda nsi yôg num ze ngelaṅ fen, Israél tswe mebwô, ke ke mbwôge. Bo nsi ke tsiaṅ i ndù: Tshùaben b'a yag nunetsine.

⁷ Tshùaben tshob ndù: A ndùlala tsemo' lé'njù tshwèt nse'e, ndù bo ke bèn netshob ndù: Nsi z'a na' nsô Israél mà Egipto là b'a ntùn, a te ku i num nenàfi!

⁸ Là, bo nsi ke tshob à ndù: Nsi z'a ghù ba Israél là, ghù bo fe tu boa njoṅ ngô fa tse bo be kuan bwe là; a bèn ndo' yub mbèn yi njam ntùm yub ko' ngô. A bwô ndù a te ku i num nenàfi.

Kebwô num ghatshob ntshob Nsi tse tatte

⁹ Num ba ghatshob ntshob Nsi. Ntù àm be'te ntùm bwe fa; njoṅ mvôg màm fa nyi'te, me b'a mba mbum ndu' là, mba mèn ze ndu' be't'é là; a be num àm ndùlal'a num Tshùaben bo ntshob mi mi nelàne.

¹⁰ Nummbe ngô dun kat, yen tsha' li ze ndon be bwe là b'a nsi vù; nenà mbwe nkin mbwe mi a kônkwa là jumte fa. Benntùn ke mbwe à njam nukebwô, mfànnu tù' bèn nke mfà neta bo.

¹¹ Mba ba ghatshob ntshob Nsi boa ghale'te tù' b'a ben kebwô. Nukebwô yub nèn tà nkum ntùm ndà àm. Tshùaben bèn ntshobe.

¹² A ndùlala, manze yub nsi tiage, tam njame; bo nsi fa'te bwe, tam nsi. Nummbe m'a' ghù nge' tsho yub ngu'njù ze me nsi so ntsha tu bo là. Tshùaben bèn ntshobe.

¹³ Me lo yen bà netèt ba ghatshob ntshob Nsi Samaria. Bo lo ke ntshob nu num lén Baal, nzwiaṅte yàm nzwit mèn Israél, k'a fàn manze.

¹⁴ Là, mbe se' mba ba ghatshob ntshob Nsi tse bo Yérusalém nà, me yen tshu ts'a bag ntshùate là; màndà bo tatte. Bo be mfà tànntù ghatshùagntù, ndùlala mba ze ntshù' ke bèn nkag tshùagntù nsi. Njoṅ yub fa be num miag màm à mba ben kebwô tse bo be Sodom nà. Ben tse bo be Yérusalém nà b'a mba ben kebwô tse bo be Gomora là.

¹⁵ A ndùlala, Tshùaben tàndà ntsho tshob num ba ghatshob ntshob Nsi ndù: Me nsi lo' zwe tshù'tshù' kém yub yi, ghù bo nu ntse mi tsheb be ntùm bwe là. Nummb'a tshùa njam ba ghatshob ntshob Nsi tse bo be Yérusalém nà, kà nukebwô ndo' la' fa.

¹⁶ Ndùlala Tshùaben tàndà ntsho tshob ndù: Kà bin ju' nze ba ghatshob ntshob Nsi tse bo tshwèt ntshob ntshob banban bin nà. Bo ke ntshob à tatte bin, tshen njem nà b'a tse bo kwate tu bo là. Yen nu là ke fe à ntshu Tshùaben.

¹⁷ Bo ke' be tsin neke ntshob ben tse bo num ngwag àm nà ndù: Njoṅ i fa nsi zin num bin mebwô. A b'a mba Tshùaben tshob là. Nke ntshob ben tse bo num nzin à be num nkwate kebwô mi a ntù bo là ndù: Sàm nukebwô ke nsi tsho zine.

¹⁸ Là, a kua' we z'a be nsi kam Tshùaben à? We z'a na' njen i à? We z'a na' nju' ntshob mi à? We z'a na' nkù' ntoṅ num ntshob mi kà nju' à?

¹⁹ Ndonni, tshù fetmbaṅ Tshùaben nà, tshù yantù i là z'a kam nà. Tshù tonkèt fetmbaṅ i là z'a tshwèt nkaṅte, ntù' ke ngwù à num tu ghatshùagntù là.

²⁰ Yantù Tshùaben ke nsi fi, ke be ndù a fa'a, nzwiagte ntàmtenu mi. Tu zin nsi làn ntùm lé'njù ts'a tshwèt nse' là.

²¹ Me lo ke tum tshen ghatshob ntshob Nsi là, bo kù nde nène; me lo ke tshob nu bo, bo nke ntshob ntshob màm.

²² Bo na' mbe nsi kam Tshùaben, mba bo tshob à ntshob màm benntùn, mba bo ghù yàm nzwit mèn kag nzin mi mi kebwô nsi.

²³ Tshùaben tshob ndù: Ndù me be Nsi à nda' ndùse me be nsi là ké? Me ke' b'a Nsi ndùse me be ngùanesà là ké?

²⁴ Tshùaben tshob ndù: Be mènntùn lem ntùm ndàlem, kà me ke yen i ké? Yàm neke mbe be nsi ke' dun mfe kamànyam mba num nsitsha' ké? Tshùaben bèn ntshobe.

²⁵ Me ju' ju ze ba ghatshob ntshob Nsi tse bo num ntshob nu tatte num lén sàm be ntshob là. Bo be ntshob ndù: Me yen njem! Me yen njem!

²⁶ Yen nu là nsi tswe à njoṅ ndùke? Tshen ghatshob ntshob Nsi là ke ntshob à tatte; bo b'a ghatshob ntshob Nsi fùte z'a ko' ntù bo là.

²⁷ Bo ghù nkwate ndù tshen njem ts'a tshwèt ntshem yube, bo nke nsoṅ mba zit mèn yub lo mbaṅ bo là nsi ghù yàm nzwit mèn lag lén sàm ké? Mba tà tshob lo lag lén sàm, nke ntù' lèn à Baal.

²⁸ Ngatshob ntshob Nsi z'a yen njem nà nsoṅ à njem z'a yen nà. Là, a bwô ndù mèn z'a ju' ntshob màm nà tshobe, ke sébte, ke bèn nkwi'te. Nga' ju ne mbèn mfe à yà ntùm miag mi à? Miag ju ne mbèn mfe à yà ntùm nga' mi à? Tshùaben bèn ntshobe.

²⁹ Tshùaben tshob ndù: Ntshob màm ke' b'a mba mbwôg là ké? Ntshob màm ke' b'a mba hama s'a be ntsit gholoṅ nà ké?

³⁰ A ndùlala Tshùaben tshob ndù: Me nsi yab nu num ghatshob ntshob Nsi tse bo tshwèt njé ntshob màm tsemo' ghatshob ntshob Nsi là.

³¹ Me nsi yab nu num ghatshob ntshob Nsi tse bo num ntshob mub ntshob nke ntsiaṅ màm nà. Tshùaben bèn ntshobe.

³² Tshùaben tshob ndù: Me nsi yab nu num ba ghatshob ntshob Nsi tse bo num ntshob njem tatte, ntshùa bwe ngù yàm nzwit mèn bi là. Bo num ntshob tatte, nke nkagtùn ntùm bwe. Me ke bèn ntum yube, me ke' tshob mo' nu bo. Bo ke tshwèt njwimte yen ngô là num sàm nu. Tshùaben bèn ntshobe.

Nu Tshùaben ze nenùne

³³ Tshùaben tshob Yérémia ndù: Ndùse yen nzwit mèn ni, ke ta' ngatshob ntshob Nsi, ke ta' ngale'te lo nsi se' bètt'o ndù: Nu ze Tshùaben tshwèt ndù a' yab num bag là b'a zil à, mb'o nsi bùnte bo ndù: Yen nu là b'a bo, tse me nsi ghua' yub là. Tshùaben bèn ntshobe.

³⁴ Ngatshob ntshob Nsi, ngale'te bo mèn ntùm ngô z'a nsi tshob ndù ntshob Tshùaben b'a mbwe' ju nelèt là, mba me nsi so ntsha tu i bo ze tunndà.

³⁵ Tshù mb'a bwô bin ke ntshob netèt bin ni: Tshùaben bùnte mbe ke, ke ndù: Tshùaben tshob mbe ke?

³⁶ Là, kà bin bèn netshob ndù mbwe' ju Tshùaben nummbe ntshob mba we lo nsi be mbwe ju nelèt yi. Tshù bin kaṅ taṅ ntshob Nsi z'a be ntùn, Tshùaben tàndà ntsho, Nsi be là.

³⁷ O nsi ke bètte ngatshob ntshob Nsi ndù: Tshùaben bùnte wù mbe ke? Tshùaben tshob mbe ke?

³⁸ Là, a be ze bin bèn nke ntshob ndù mbwe' ju Tshùaben nà, mb'a lôt'a bin, nummbe m'a tum bo tshob bin ndù kà bin bèn ntshob ndùlala.

³⁹ A bèn mbe ndùlala mba m'a yab nu num bin, nket zin ma' ngùanesà mbaṅ àm, bin mba tusô se me na' mfà bin, mba tà tsin nà.

⁴⁰ Me nsi lo' tuswe ke mi kag sobni yi num bin, tuswe z'a tswe matmat, tuswe ze be mèn ke lag là.