Yérémia 2 - NTSHOB NSI

Netshobte ba Israél num kebwô yub

¹ Tshùaben tshob me Yérémia ntùm ntshob mi ndù:

² Nèn nkua' num ntoṅ ba Yérusalém ntshob ndù: Tshù mba Tshùaben tshob li: Me num nkwimte nkôni o ndùs'o na' nke' nguanmèn nà, nkwimte yu nekù ntù ndùse bo na' nka o là, ndùs'o na' nke mbwe àm num kônkwa là. Yen dù' là na' mb'a dù' tsha' ze bo ke' dù' là.

³ Israél na' mb'a ze ju Tshùaben z'a tsho' là, mbe mbwe tshu ts'o lo' fèn nà; njoṅ benntùn fa tse bo jù là lo tù' ghafànnu, nge' lo tshùa bwe ntsho yube. Tshùaben bèn ntshobe.

⁴ Bin ju' ntshob Tshùaben me tunndà Yakob, njoṅ zin tunndà Israél fa ju'u.

⁵ Tshùaben tshob ndù: A zit nukebwô ze tà tsin yen num àm, kà nke ntsin mbaṅ àm ka' ku, nke ntam njam ba nsi, mbèn ntù' ben banban yub tu à?

⁶ Bo ke' bètte tu wut yub ndù: Tshùaben b'a yà? A yi na' ndo' yag nko' yi Egipto, ndo' yag nzin yi kônkwa, num tsha' njum, ze ntô yàm bwe là. Num tsha' ts'a ghage, tse netshaṅ vùkob be bwe là, num tsha' dù' ze sàm mèn ke' be tshùa bwe, sàm mènntùn ke be tswe bwe là.

⁷ Me lo ghù bin tsho ntùm ngô ntù, ndù bin jù ntàm mi, nju' mb'a bwô là, là, bin yoṅ mbe tsho bwe nsagte tsha'a, ngù ntsi' màm ngô ze me na' mfà bin nà tù' dù' z'a tshwèt mbag à nebag là.

⁸ Ghale'te Nsi ke' be bètte tshob ndù: Tshùaben b'a yà? Tshen benntùn nà tse bo num mfa' fa' num ntshù' là ke' lèn àm. Ghabéb mbwe lo ke be ben nenùn me. Ghatshob ntshob Nsi ke ntshob nu à num lén Baal. Bo tam à njam ben ts'a be ywimte ke fe bo là.

⁹ Tshùaben tshob ndù: A ndùlala m'a' bote zine, ke b'a nda' bin, bon tsin mba bon bon tsine.

¹⁰ Ndùlala bin tshùa ngô tètntse ts'a be Kittim nà njene; bin tum benntùn Kedar bo lôte kua' mebwô njene. Bin yen mbe ze mfuni nu ze bin ghù be bwe là.

¹¹ Ta' ngô bwe z'a b'a bate nsi tse là ké? Ne mbe ndù tshen nà ke b'a ba nsi. Là, yàm nzwit mèn lo' ju banban mbate nkuni mi a fe me Tshùaben nà yi.

¹² Kamànyam bin be ghakwénta netshàme. Bin vètte ntùm bwôg bo fétwut. Tshùaben bèn ntshobe.

¹³ Nummbe yàm nzwit mèn ghù nukebwô nze tse bàa: Bo ghua' àm, me ze me b'a tôntse yôg là, nke ntswe' ntôntse, ntôntse mi a bagte là, ntôntse mi ntse ke' be la' bwe là.

Ya bo nezwe e

¹⁴ Israél b'a ta' nkuan ze bo jun i là ké, ke bo bwe i à ntùm ndà à? Ke z'a ghù a bam netù' mén mbwe fa à?

¹⁵ Bon ngwayit tshwèt nkua' num i, nke ntshag là sob tù. Bo tshwèt nke nsate ze ngô. Bo ton mi ntusô fa, benntùn ke bèn nke ntswe bwe.

¹⁶ Mba ba Nof boa ba Takbanès ts'a be ngô Egipto là nsi be' ntshom tu o.

¹⁷ Yen nu li ke' tsho o ndù à nummb'o lo ghua' àm, me Tshùaben Nsi o, ndùse me ke ntshagt'o num manze ntùn nà ké?

¹⁸ Ndonni, numk'o ntam manze nke nèn nu ntse Nil mà Egipto à? O tam manze nke nèn nu ntse Efrat Asiria numke?

¹⁹ A nukebwô o bèn ndo' yen nge' li ntsho o yi. A tsho tatu bèn nsoṅ nkondo ma' tu o. O nsi lène, yen mb'a b'a kebwô neshu bo zwe, neghua' àm me Tshùaben Nsi o; o ke' bèn nebwôg àm tsho mba meju i. Tshùaben Nsi tàndà ntsho bèn ntshobe.

²⁰ O lo be' so kele' fe tà ndùke lo, nkebte tsho nkù, ntshob ndù: Me ke' kô nebèn mbe ntùm kuan! Là, o lo ke ṅam wul o nsi mba kattù mènnzwi là num tu mba zit kônga z'a ṅate lo là, tun mba sit tù fi lo.

²¹ Me lo ywil o à mba kua' mbwô nkùa là, ndù o tum à ntùm ntèn nkùa ntùn. A tshùa à ndùke k'o nkaṅe, ntù' nkùa z'a fut'a z'a fe à tum à?

²² Tshùaben Nsi tshob ndù: A be z'o lo' be tshèn nsôg wul o yi là, a be z'o lo' be sôg nzwe yàm nsôg wul o yi là, mba nukebwô o nsi b'a be mbwe àm ndù a tam ṅu' bwe.

²³ B'o tshob mb'o ke' sagte wul o, ke tam njam Baal à ndùke? Lôte ntshùa mu boa nku mu mà tômbo'o, ndèn ju z'o ghù là be yu tu, wù nyàm neket lèt z'o fùage, mbe tshakendà là.

²⁴ O b'a nzwi kekwèn tshwèt, ndù o ke ntswe à kônkwa, mfùag bo fetmbaṅ nke ntshoṅ o ntùm yu nekù ntù. We z'a nsi tshèl i ntùm mb'a ghù nekù ntù ntù i ndù l'à? Kà ben bo tshwèt ndiag i là mi ndab wut yub. Bo nsi yen i nummb'a bèt sôg.

²⁵ Me num ntshob ndù: Zete ndù kà nketo' tum ku o, mba ndù kà ntô mu jum. Là, o nke ntshob ndù: A ke nu là, kà tagt'àm. Me num nkô tse nsi ba mfàm, m'a' tam à njam bo.

²⁶ Ben tse bo tum ntùm tunndà Israél là nsi be ntùm tuswe à mba ntshô be mbe ntùm tuswe ndùse bo yen i là. Tuswe nsi ko yube, fenfen tshobe, kamkam tshobe, ghale'te Nsi tshob boa ghatshob ntshob Nsi tshobe.

²⁷ Bo be ntshob tù ndù: O b'a tàa; ntshob loṅ ndù: O bèn mfà yôg me. A b'a nummbe bo tam àm mvèn yub, ke bèn nelôt'àm. Bo num mbe ntùm nge', ntshob yen ngelaṅ nà ndù: Lo nsi njôg yage.

²⁸ Ba Yuda, nsi tsin tse bin nabte là yà? Bo lo nsi, a be ze be bo yôg zin ngelaṅ nge' là. Nummbe ba nsi yàm bin à kua' mba ntusô yàm bin nà. Tshùaben bèn ntshobe.

Mèn ze bo bot'é là diag ju z'a lo' sate nu ze bo kutte num i yi là

²⁹ Tshùaben tshob ndù: Be bag bin ta ntshu à numke? A bin bèn nta tu me.

³⁰ Me na' ndab bon tsin à kua' banban. Bo ke' ju' ntshob ntag mi me na' mfà bo là. Ṅwi zin lo watte ghatshob ntshob Nsi tsin mba ta' ngwayit ngasate dù' là.

³¹ Bin ju' ntshob Tshùaben, me benntùn ntùm yen ngelaṅ njù li! Me na' mb'a kônkwa bin ké ba Israél, ke ngô ze njam lam i mbum n'à? Numke yàm nzwit mèn nke ntshob ndù: Bag b'a yag tu, bag ke' kô nebèn njam ntèl o à?

³² Ménngon ze bo ka i là lag ju ze mandum z'a ka i là fà yi là ké? Tshù là, a tswe ndonni ngelaṅ yàm mba yàm nzwit mèn lag àm nà.

³³ O zi'te nku mu nezin num manze lem à mb'o be nkagtùn nediag màndà tsho là.

³⁴ Bo num ntèt lem bwoṅbwoṅ, mbu' num kum so, ke be ndù o tèt yub bo nke mbe' dù'.

³⁵ Mba ndùlala, o nke ntshob ndù: Kua' nenùn me be tshàm à mbu'u. Mo' ndù yantù Tshùaben ke' bèn mbe num àm tshàm. Là, me Tshùaben tshob wù ndù bag wù nsi te tantshu nsi, nummb'o tshwèt ntshob ndù o ke' ghù tsho nukebwô.

³⁶ Numk'o nke nànte nebate yu manze ndù à? Tuswe nsi fe à Egipto kà tsho num o, ndaṅndaṅ mb'a na' mfe Asiria là.

³⁷ O nsi be tum bwe tshub mbu tu o; nummbe Tshùaben ghua' ben ts'o ke njab ntù num bo là, mbe ndù b'o ke tshùa njam bo njôg ntsha.