Yérémia 19 - NTSHOB NSI

Kab z'a tsit là bo Yérusalém z'a tù' fam nà

¹ Tshùaben tshob me ndù: Nèn ju ntetsha' njun ta' tshaṅ tsha'a. Lo' ywèn benntùn ntùm ngô mba netèt ghale'te.

² Nèn tômbo' Ben-Hinnom, z'a be mbaṅ nzendà dù' ntetsha' là. O nsi tshob nu ze me nsi tshob wù là bwe.

³ O nsi tshob ndù: Fenfen Yuda boa ba Yérusalém, bin ju' ntshob Tshùaben! Tshù ju ze Tshùaben tàndà ntsho, Nsi Israél tshob li: Me nsi ghù ta' nge' tsho ntùm yen dù' li, kà ntoṅ mba we lo z'a nsi ju' tshô là nùne.

⁴ Nummbe bo ghua' àm, mbagte yen dù' li; bo fà ju nelamte tsemo' nsi, tse tu wut tshob ke' lèn, tà tshobe, mba fenfen Yuda là; bo lo' lem ba mbu' ndàm yen dù' li yi;

⁵ bo kut mbwe' Baal, num neke nton nshumnshum tshob bwe num lén se. A ke' b'a ju ze me na' nkite là, ke be ndù me lo tshobe, ke bèn ngù mba nkwate num bwe.

⁶ Num njoṅ i fa, tsemo' lé'njù tshwèt nse'e, tse bo ke nsi bèn tsiaṅ yen dù' li ndù Tofét, ke ndù Ben-Hinnom, là tsiaṅ i à ndù tômbo' nezwite benntùn nà. Tshùaben bèn ntshob ndùlala.

⁷ Me nsi biagte ntàmtenu Yuda bo Yérusalém nsen ni. Me nsi ghù ba la' vùte num ṅwi ghakeban tshob nsen ni, tshùa mum mbu ben tse bo tshwèt nya' tu yub là. Me nsi fà fe tshob nsaṅ mi a kamànyam nà boa nyàm tse bo be nsitsha' là.

⁸ Me nsi ghù sen tusô li tù' tunu bwôg, bo ke nyi'te tu mbwe bwe. Ntshùanze nsi bwôg nyi'te tu i mbwe nkeko' mi.

⁹ Me nsi ghù bo fèt mbàb nshumnshum tshob boa ngonngon tshob ntùm ngùtni bo nge' ze ghakeban tse bo tshwèt nya' tu yub nsi ma' yub bwe là. Bo nsi fèt wut tshob bo bo.

Yérémia ntùm ndàtsha

¹⁰ Tshùaben tshob Yérémia ndù: O nsi tsit sen tshaṅ s'o ghù là num miag ben tse bin à bo nèn nà.

¹¹ O nsi tshob bo ndù: Tshù ju ze Tshùaben tàndà ntsho tshob li: A b'a mba me nsi tsit yen ngô li bo sen tusô li là, tsil i mba bo be ntsit tshaṅ ntetsha'a, kà bo ke ku'ni nebèn nabt'é là. Bo nsi tshoṅ fe tshob dù' bo num ngua' nenà là, nummbe dù' netshoṅ yub nsi bwoṅe.

¹² Tshù ju ze me nsi ghù num yen dù' li là. Tshùaben bèn ntshobe. Me nsi ghù ndùlala num ba la' tse, kaṅ i a tù' kua' mba dù' bo num ngua' nenà bwe Tofét là.

¹³ Mba' Yérusalém boa mba' fenfen Yuda nsi be nesagte mba yen dù' Tofét là là. Men mba' là mi bo na' ntsin tu bwe mfà tshu nelamte njoṅ ze ntshu ntsho kamànyam fa, ntsin bwe nke ma' ndu' tsemo' nsi là.

¹⁴ Yen nà be tôge, Yérémia lo Tofét dù' Tshùaben tum i ndù a tshob ntshob mi bwe là, mbèn njam. A tsin tù bam ntshundà ndà Tshùaben, nkua' ntshob njoṅ bwoṅ benntùn fa ndù:

¹⁵ Tshù ju ze Tshùaben tàndà ntsho, Nsi Israél tshob li: M'a' ghù njoṅ nge' fa tse me jù' là vù num sen tusô li boa mi a ghebte bwe là, nummbe bo ghù tatu, ndù kà bo ju' ntshob màm.