Yérémia 18 - NTSHOB NSI

Kab ngate tsha' mba sagntù ngô

¹ Tshùaben *gi*tshob Yérémia ntùm ntshob mi ndù:

² Lo nsi nswe' nèn ntùm ndà ntetsha'a, m'a' ghù o ju' ntshob màm bwe.

³ Me swe' nèn ndà ntetsha'a, njen a nke nte ta' kab.

⁴ Kab z'a ke nte là ke tum mebwô. A be mbe ndùlala ntùm fa' nete tsha'a. A bèn nte mo' kab mb'a kô là.

⁵ Ndùlala Tshùaben tshob me ndù:

⁶ Tunndà Israél, be me ke ghù num bin mba yen ntetsha' li tshwèt ngù là ké? Tshùaben bèn ntshobe. Tunndà Israél bin be bu àm à mba tsha' be ntùm mbu ntetsha' là.

⁷ A num mbe mo' ngelaṅ, me tam bu num ta' ngô, ke ta' nufen no, ntshob ndù m'a' kôg i, mbiagt'é, nsat'é.

⁸ Là, a be ze yen ngô là ze me tam bu num i nywin num nukebwô z'a ghù, ngua' là, mba m'a' faṅ nukebwô ze me lo nke njù' neghù yi là nsi.

⁹ A num mbe mo' ngelaṅ me jù' nekut dù' bo nebwe tshu ntùm ta' ngô ke ta' nufen no;

¹⁰ là, a be ze yen ngô là ghù nukebwô num miag màm, nga neju' nz'àm nà, mba me nsi gha neghù mebwô ze me na' njù' neghù yi là nsi.

¹¹ Ndonni, tshob nu ba Yuda boa ba Yérusalém. Tshob bo ndù tshù mba Tshùaben tshob li: Me tàmte neghù nukebwô num bin, ntàmte ta' kebwô num bin. Ndùlala, a bwô ndù mba we lo kag ze manze kebwô, mbate nzin min boa ngùninu mine.

¹² Bo nsi bùnte tshob ndù a ke nu, bag nsi zin à mba bag yen nà, mba we lo ghù à mba nkwatenu ntù i mi kebwô yen nà.

¹³ A ndùlala Tshùaben tshob ndù: Bin bètte ngôngô! We z'a to' ju' lèn tshen nu li à? Ba Israél ghù kua' kuni tshùaya'nu.

¹⁴ Nywinmbaṅ ghù nebe ndù dum ké? Be ta'ntse ndùb z'a be mfe tà ngùanesà là jumte ndù sàn ké?

¹⁵ Là yàm nzwit mèn lagt'àm nke mfà ju nelamte ba neto. A ndùlala z'a na' ntiag num ze manze là. A kag njwèn ntshagnze nsi, ntam num ntshagnze ts'a b'a nze tse bo ke' temte là.

¹⁶ Bo ghù yub ngô tù' kônkwa, ntù' tshabte ke mi. Njoṅ benntùn fa bo tshùa bwe là bwôg, nke nyi'te tu yube.

¹⁷ Me nsi sate yub mbwe ngakeban mba tonte fetmbaṅ z'a fe ntumnyam nà. Me nsi lo' mvèn àm tam yub yi, ke lôte yub lag sàm mum lé'njù nge' yub.

Netsin tsham kebwô num Yérusalém

¹⁸ Ndùlala bo tshob ndù: Bin se' be tsin tsham num Yérémia! Nummbe be ntshù' ke bi à nummbe ghale'te ke' be, be ntag ke be ke be à nummbe ghazenu ke' be, be ntshob Nsi ke be ke be à nummbe ba ghatshob ntshob Nsi ke' be. Bin se' be lo' ndàm nzwi i yi. Kà be kù' ntoṅ num tse tshô.

¹⁹ Ndùlala me le'te Tshùaben ntshob ndù: Tshùaben, kù' ntoṅ nju' àm, ju' mba ghamaṅt'àm tshwèt ntshob nju'u.

²⁰ Ndù bo a' lo' kebwô njagte mebwô me yi ké? Bo tswe' tàm num nelo' mbùn àm yi. Tu wul o kwimte ndù me lo se' mbwe o nema' mbu num tu yube, ndù o kaṅ tshùagntù o num bo.

²¹ Ndùlala, swèn nshumnshum tshob nziku'u, nswèn tu wut tshob num ntshùag ṅwi. Zwi tshob bi bon boa du tshobe, bandum kwùte keya', tshob ghuan benntùn vùte bam tùn tshwèt ntsho!

²² A bwô ndù bo ju' ngoṅ tumte ntùm ndà tshob ndùs'o nsi tshag bwoṅ soyé num bo là. Nummbe bo tswe' tàm num neghom àm yi, bo bùn ba nkù num manz'àm.

²³ Là wù Tshùaben lèn njoṅ ntsham kebwô fa mi bo tsin num àm nà. Kà lagte men mfànnu li bo. Nukebwô yub ghô num miag mu matmat. A bwô ndù o ma' yub nsi mbwe o! Yab nge' num bo num ngelaṅ ze yantù o nsi kamte là.