Yérémia 14 - NTSHOB NSI

Nge' num dù' nejume

¹ Ntshob mi Tshùaben na' ntshob Yérémia num mba dù' nsi jum nà.

² Yuda b'a nsivù, ben tse bo be ntùm ntusô mi là ket nzwe vù, nôte num tsha'a. Nekua' tshwèt nko' Yérusalém nke nèn kamànyam.

³ Ben ndùb tshwèt ntum tse nke' bo nèn diag ntse. Tshen ben ni tshwèt nèn tôntse, ke tèt ntse bwe, ndo' ntshaṅ ntse mub mfe yi banban. Tuswe nke nko yube, ngom yube, bo kabte se yube.

⁴ Tsha' sé'te fa, nummbe mbaṅ ke' lo ntùm ngô. Nu tshùa ghadù' nà, bo nke nkut tu yube.

⁵ Mba kwinyàm tshwèt mbwe mén mà tshwèt ngua'a, nummbe nenà ke' bèn mbe.

⁶ Ba kekwèn tshwèt mbe ntsinte num dù' ṅaṅa, nke mfit mfùag mba ba mbù tshwèt là, là, miag mub nke nsènte nummbe nenà ke bwe.

⁷ Tshùaben, a be ze mfànnu mag te mbit yag là, o tshùa njam lén so ngù mb'o lèn. Nummbe nukebwô tshag yàm neshu, mbe ndù bag ghù nukebwô num miag mu.

⁸ Wù z'o b'a ze nenywinte Israél là, z'o be ngayôg i num ngelaṅ nge' là, numk'o ntù' b'a ngùn ntùm yen ngô li, ntù' b'a mba ntshùanze z'a zi bwe a nda' ta' tèttswe' l'à?

⁹ Numk'o ntù' b'a mba ta' mbwôgtun a, mba ta' sa'nde' z'a ke' ku'ni nebèn njôg mèn à? Tshùaben, o ke mb'a be netèt bag njoṅ ndù fa, bo ke ndo' a lén so ntsiaṅ yag yi. A ke' bwô ndù o ghua' yage.

Nekeb ntsha ke bèn mbèn njam

¹⁰ Tshù mba Tshùaben tshob num yen nzwit mèn nà li: Bo be nkô neke ntsha, ke faṅ ndù nku mub fite. A ndùlala Tshùaben ke nsi tsho' ntù i num bo. A kwimte nukebwô tshob ndonni, mbe ndù a nsi so ntsha tu bo num nukebwô tshobe.

¹¹ Tshùaben tshob me ndù: Kà mi ma' mbu num ze nu yen nzwit mèn nà.

¹² Bo tswe be nziku' mba me ke nsi ju' nkua' mube. Bo ton be ba nyàm ke nefà tshule'te lo mba me ke nsi bame. Là me nsi lo' ṅwi biagte yub yi, lo' nziku' bo keya' biagte yub yi.

¹³ Ndùlala me bùnte ndù: Bin ke nsi yen ṅwi lag sine, bin ke nsi ju' nziku'u; là me nsi fà fite z'a tswe neshu là bin be kua' nsen ni.

¹⁴ Tshùaben tshob me ndù: A b'a tatte là tse ba ghatshob ntshob Nsi tshwèt ntshob num lén sàm nà. Me ke bèn ntum yube, me ke' tshob nu bo, me ke' tshob sàm ju bo. Ju ze bo tshob bin nà b'a njem tatte, ngàm banban, ju ze bo kwat'a tu bo là.

¹⁵ A ndùlala Tshùaben tshob ndù: Mbe se' mba ba ghatshob ntshob Nsi tse bo tshwèt ntshob nu num lén sàm, nke ntshob ndù ṅwi bo nziku' ke nsi be ntùm ngô, ndù me ke bèn ntum yub là, tshen ghatshob ntshob Nsi là nsi kwù à ṅwi bo nziku'u.

¹⁶ Bo nsi ma' fe ben tse bo tshob nu bo là num manze ts'a Yérusalém nà, ndù ṅwi bo nziku' bèn nzwite yube. Sàm mèn ke nsi tum z'a tshoṅ yub là, bo, zwi tshobe, nshumnshum tshob boa ngonngon tshobe. Nummbe me nsi ghù nukebwô ze bo ghù là vù num tu wut tshobe.

¹⁷ Tshob ba la' bin ndù ntsenyà tshwèt nswe' tu o ke tsin mbwôgtshù bo tèttswe', nummbe bo sate yub kua' kebwô neshu. Keko' sob b'a se ke tùn.

¹⁸ A be ze me Yérémia nèn tshwèt là, mba m'a' yen ben tse ṅwi watte yub là; a be ze me nèn tusô là, mba m'a' yen ben tse nziku' yab nu num bo là. Mba kua' ngatshob ntshob Nsi bo ngale'te tshwèt nke ntsha ntùm ngô, ke lèn dù' ze bo tshwèt nèn nà.

¹⁹ Tshùaben, ndù o ghua' tsho Yuda kua' nenùn ké? Ndù o tsho' ntù o num Sion matmat ké? Numk'o ndo' nge' ze fu se ke bwe là ntsho yag yi à? Bag tshwèt mbéb yôg, là sàm nu ntùn ke tum, nke mbéb ywimte, là nge' bèn nse'.

²⁰ Tshùaben, bag lèn nukebwô yag, ndèn nukebwô tà tshage; ṅ, bag ghù kua' nukebwô num miag mu.

²¹ Ghù nku'ni num lén so, kà ghua' yage. Kà so tuswe tu diaṅkwa so se nekuni z'a b'a Sion nà. Kà bagte kàn se bag bin na' ngwat là, nkwimte sen kàn nà.

²² Netèt neto tse ngôngô ghù là, mo' ta' i bwe nke ngù mbaṅ ndo ké? A b'a kamànyam bèn nke mfà tubtub mbaṅ ké? Nga, a b'a kua' wù Tshùaben Nsi yag, wù ze bag yab ntù à nda' num o là, A b'a wù bèn nabte njoṅ tshu fafa.