Biblia Todo Logo
Bìoball air-loidhne

- Sanasan -

Yérémia 1 - NTSHOB NSI

1 Ntshob Yérémia, nshum Hilkija mo' mèn netèt ghale'te mà Anatot, ntùm ngô Benjamin.

2 Tshùaben lo tshob ntshob mi me Yérémia num ze ngelaṅ Yosias, nshum Ammon, mfen Yuda. A lo be be ndù a tswe num fen ngu'njù ntshob tat gham.

3 Tshùaben bèn ntshob ntshob mi me Yérémia mba num ze ngelaṅ Yoyakim nshum Yosias, mfen Yuda, tà nèn nkum miagte ngu'njù ntshob ntshù' gham, mba Sédékia nshum Yosias be mfen Yuda là. A be be ndùlala tà nèn nkum ndùse bo lo' ba Yérusalém nèn yi ndà kuan num mbatte ṅwù tàn nà.


Mba Tshùaben na' ntsiaṅ Yérémia ndù a tù' ngatshob ntshob Nsi là

4 Tshùaben tshob me Yérémia ntùm ntshob mi ndù:

5 Me lo be bom o bam màan ndù m'a lèn o. O lo be tum bam i ndù m'a tsho' o, njab o ngatshob ntshob Nsi ngôngô.

6 Me bùnte ndù: Tshùaben Nsi, yen mbe me ke' lèn netshobe, nummbe me b'a mônke'.

7 Tshùaben tshob me ndù: Kà tshob ndù o b'a mônke'. Nummb'o nsi nèn mbwe njoṅ benntùn fa, dù' ze me nsi tum o là, tsho bwe tshob mba ke lo ze me nsi tshob wù là.

8 Kà bwôg yube, nummbe bag wù bèn mbe, mbe ndù m'a' ke njôg o. Tshùaben bèn ntshobe.

9 Tshùaben tshag bu i, ndo' nkwag ntshu àm yi, ntshob me ndù: Tshù, me yab ntshob màm ntshu o.

10 Yene, me fà ngù' wù num ngôngô, num nufen nzenze, ndù o temte dù', ndù' kà njwile, ndù o kamte dù', ntswe', kà nkule.

11 Tshùaben tshob me ntùm ntshob mi ndù: Ke z'o tshwèt njen Yérémia? Me bùnte ndù: Me tshwèt njen ta' kaṅ tshom.

12 Tshùaben tshob me ndù: O yen kua' mebwô; nummbe me be nzi tshùalo num ntshob màm, num nezwiagte ju z'a tshob là.

13 Tshùaben tshob me mbatte yoṅ bàa ntùm ntshob mi ndù: Ke z'o tshwèt njen à? Me bùnte ndù: Me tshwèt njen mo' kab nedume, ndù ntse tshwèt mbùnte ntùm bwe nze tu.

14 Tshùaben tshob me ndù: Nge' nsi bùn à tu kà sa num njoṅ benntùn fa tse bo ntùm ngô là;

15 nummbe m'a' tsiaṅ njoṅ ntumntum fa tse bo ghù nufen ts'a be tu là; Tshùaben bèn ntshobe. Bo nsi se' njoṅ yub fa, mba zit lo te se diaṅ nsém Yérusalém, mbaṅ tse kàbngô, ndiaṅ mbume, mba mbaṅ njoṅ mi ntusô Yuda fa.

16 Me nsi keb ntsha, so ntsha tu bo, num tshùagntù yube, nummbe bo ghua' àm, mfà tshu nelamte tsemo' nsi, ngwù nsi mbwe fa' mbu mube.

17 Mba wù là, taṅ kob so, ndo nsi ntshob ju ze me nsi tshob wù là bo. Kà vètte mbwe bo, mbwôg ndù kà me ghù o vètte mbwe bo.

18 Tshù, me yab o sènni mum ngô fa mba ta' tusô neta là, mba ta' ntom tùne, mba ta' kumba' tùn meba là. Me lo' o ngù kôg zwe' yi num fenfen Yuda, kamkam tse, ghale'te tse mba mum ngô fa.

19 Bo nsi ma' o ntsho, là bo ke nsi tshùa o; nummbe bag wù bèn mbe, ndù me nsi yôg o. Tshùaben bèn ntshobe.

La Sainte Bible en Bamiléké-Medùmba © Alliance Biblique du Cameroun, 1993. All rights reserved.

Bible Society of Cameroon
Lean sinn:



Sanasan