Yakobo 5 - NTSHOB NSI

Nete bu num ghankàb

¹ Ndonni, tshù, bin ghankàb, bin tswe ntùm ntsenyà, ndàn wut tsin num nge' ts'a tshwèt nse' num bin nà!

² Nkàb zin bi, nse'ngo' jù nzwe tsine.

³ Bangùa jù gol mba silba zin, bangùa yub nsi be nkwénta bin, jù mbàb wut zin mba mbwôg là. Bin tse'te nkàb ntùm ba lé'njù mànjam.

⁴ Tshù, ntsho'fa' ghafa' tse bo tsho' tshu ntùm nà tsine, men ntsho'fa' là mi bin be ke fà là, kua'a; tshu'te ghatsho'tshu nèn tà nkum ntoṅ Tshùaben tàndà ntsho.

⁵ Bin lo yôg mebwô num nsitsha'a, mbagte ke kwate, bin lo yôg ntùm yôg ngùa, bin lo kém ntù tsin ntùm lé'njù nezwite.

⁶ Bin lo keb ntsha, nzwi mèn netsine, a ke ta tu bin.

Ntag nzenze

⁷ Fèt tshàm, ndùlala, bin fènte tà nkum ngelaṅ ze Tshùaben nsi se' là. Tshù, ngadù'nà num mbéb ntàm mebwô tsha' ntùm nefènte tà nkum ngelaṅ mbwe mbaṅ mba miagte mbaṅ lo là.

⁸ Mba bin zin fènte, bin ghù tànntù, nummbe ngelaṅ ze Tshùaben nsi se' là ghebte.

⁹ Fèt tshàm, kà bin ke ntsin tsham num bin, bin bin, ndùlala ndù kà bo tsho'te zine. Tshù, ngatsho'te ntsha tsin nzendà.

¹⁰ Fèt tshàm, bin lo' mfi' num nge' mba nefènte ghatshob ntshob Nsi tse bo na' ntshob nu num lén Tshùaben nà.

¹¹ Tshù, bag num ntshob ndù: Ghafen b'a ghaghù tànntù. Bin lo ju' tshô tànntù Yob njen mba miagte nkwatenu Tshùaben be num i là; nummbe Tshùaben b'a ngakondèn mba ngankôni.

¹² Fèt tshàm, njôg mbe, kà bin kàn mfe ke num kamànyam no, ke num tsha' lo, kà bin kàn mo' sàm mfe. Là, a bwô ndù zin ṅ be ṅ, zin nga be nga, ndùlala ndù kà bin vù ntùm netsho'te ntsha.

¹³ Mo' mèn netèt bin tshwèt njen nge' ké? A le'te Nsi! A tshwèt ntsiaṅte ké? A yob kwi!

¹⁴ A tshwèt ngon ké? A tsiaṅ ghakwé mbwe ntùm ntse'te benkristô ndù bo be yo' i mfèt, nde'te Nsi num tu i num lén Tshùaben.

¹⁵ Le'te Nsi bamntù nsi yôg ngangokèt, Tshùaben bù' i nsi. A be z'a na' ngù nukebwô là, mba bo nsi lagte yi.

¹⁶ Bin ke mbam nukebwô tsin bin bin; nke nde'te Nsi num tu bin, bin bin, ndù bin yate, nummbe le'te Nsi mèn netsin ntùm ngelaṅ i ku'ni neghù nu yàme.

¹⁷ Elia na' mb'a mènntùn ndaṅndaṅ mba be là; ntùm le'te Nsi, a lo le'te Nsi ndù kà mbaṅ lo, mbaṅ ke lo num nsitsha' num ngu'njù tat ṅwù ntôge,

¹⁸ a bèn nde'te Nsi, kamànyam fà mbaṅ, tsha' fà jujù.

¹⁹ Fèt tshàm, a be ze mo' mèn netèt bin kag manze nunenùne, mèn bèn nte i num bwe là,

²⁰ bin lèn ndù mèn z'a te mèn kebwô num manze z'a lo nkag là, nsi yôg yôg se ntùm vù, kabte nukebwô yàme.