Yakobo 4 - NTSHOB NSI

Netshètte ghe'te

¹ Ba ntsho fe à yà netèt bin à? Ba zwe' fe à yà netèt bin à? A ke b'a ghe'te tsin bèn nke ma' ntsho ntùm nkam wut min ké?

² Bin num nge'te ke ghù; bin num nzwi, nge'te ke ku'ni netshùbe; bin num nzwe zwe', nke ma' ntsho. Bin ke' ghù nummbe bin ke' bètte.

³ Bin num mbètte ke kwé, nummbe bin bètt'a kebwô, nke nkô netsiaṅte ntùm ghe'te zin.

⁴ Ghaghù màndà, bin ke' lèn ndù nekô njù b'a nebàn Nsi ké? Ndùlala mèn z'a kô nebe nshun njù là, mb'a tù' ngakeban Nsi.

⁵ Bin kwate ndù ṅwa'ni ke ntshob à banban ndù: A num nge'te Ywèt ts'a yab num be là ntùm ghe'te ké?

⁶ A num mfà kondèn z'a be ze ndùb ntshùate là; a ndùlala a tshob ndù: Nsi be ntshètte ghako'tewut, là, a num mfà kondèn ghafà wut nsi.

⁷ Ndùlala bin ju' ntshu Nsi, nta tu Satan, a kù zine.

⁸ Bin kù'te nse' mbaṅ Nsi, a kù'te nse' mbaṅ bin. Ghaghù nukebwô, bin sôg mbu mine; ghaghù ntù bàa, bin lànte ntù tsine.

⁹ Bin lèn nge' zin, bin kua' wut tsine, bin tswe ntsenyà. A bwô ndù zwi sin kaṅ ntù' nekua'a; tsiaṅte zin tù' nenywine.

¹⁰ Bin fà wut tsin nsi mbwe Tshùaben, a nsi bù'te zine.

Tsha'te

¹¹ Fèt tshàm, kà bin ke ntete nu num bin, bin bin. Mèn z'a te nu num mfèle, ke netsho'te mfèt lo là, mb'a te nu num ntshù', nke ntsho'te ntshù'. Là, a be z'o tsho'te ntshù' là, mb'o ke bèn mb'a ngaze ntshù', là ngatsho'te ntsha.

¹² Ta' mèn num bwe z'a be ngafà ntshù' mba ngatsho'te ntsha là, a yi bèn nku'ni neyôg mèn mba neghù a bi. Là tu wul o, o b'a we kà nke ntsho'te mèn z'a ghebte mbaṅ o l'à?

Mèn ke' lèn nu ndamnjù

¹³ Ndonni, tshù, bin num ntshob ndù: Sènni ke ndamnjù lo, bag nsi nèn ntùm yen ngô li ke yen nà lo, bag nsi tswe bwe ta' ngu'njù, bag nsi ta ntàn bwe, ghù nkàb yàme,

¹⁴ bin tse bin ke' lèn ju ze ndamnjù nsi be yi là. Yôg sin b'a ke? Bin b'a ywèt tshaṅ ts'a be ntume, ke ghubte, mbèn mi là.

¹⁵ A lo mbwô bin tshob à ndù: A be ze Tshùaben kô là, mba bag nsi yôge, mba bag nsi ghù yen ni ke yen nà lo.

¹⁶ Là ndonni, bin num nta'nsoṅ ntùm ko'tewut zine; njoṅ lèn men nta'nsoṅ ni fa b'a mi kebwô.

¹⁷ Ndùlala mèn z'a lèn neghù numebwô ke ghù là, mba yen nà b'a nukebwô num i.