Titô 3 - NTSHOB NSI

Ntag nzenze

¹ Kwimte bo ndù bo fà wut nsi mbwe ghatsho'te ntsha mba ghatô ngô, nju' ntshu yube, nànte nefa' njoṅ mfa' mebwô fa,

² ke tshabte sàm mèn, ke be ngazwentù, là ghabwôntù tse bo num nda'te njoṅ fite fa num njoṅ benntùn fa là.

³ Nummbe mba be na' mb'a kagni mo' ngelaṅ, ghakeju' ntshu, ben tse bo fùte yub là, kuan ghe'te mba ngùa nzenze, nke njôg ntùm nukebwô mba ghe'te, ben newage, nke mbàn wut be, be be.

⁴ Là, a lo be ngelaṅ ze bwôntù Nsi ngayôg be, mba nkôni i num benntùn tswite wul i là,

⁵ a yôg be, ke b'a num mfa' nunetsin mi be na' mfa' là, là ntùm kondèn i, a lo yôg be, ngù Ywèt Nelàn fà nebwe nswe mba yôg nswe be, njam nesôg wut,

⁶ a lo fètte Ywèt Nelàn num be kua' mà yàme, njam Yésu Kristô ngayôg be,

⁷ ndùlala ndù be tse kondèn i ghù be tù' ben netsin nà, tù' jùndà ntùm nenywinte yôg matmat.

⁸ Men ntshob li b'a nenùne, me kô ndù o tshob yen ni kua' mebwô, ndù ben tse bo bam Nsi là lab wut nefa' mfa' mebwô. Tshen tshu là bwô, nku'ni neywimte benntùn.

⁹ Là kù tantshu kagni, nu tunndà, ntsha, nesoṅte nu num ntshù', nummbe a ke' ywimte, a b'a banban,

¹⁰ Kù ngakag fagte, ngelaṅ z'o tagt'é yoṅ ntshù' ke yoṅ bàa lo là,

¹¹ ndèn ndù lèn yen mèn nà fàn manze, nke ngù nukebwô, a tshwèt nso ntsha num i ze tu.

Tsha'te

¹² Ngelaṅ me tum Artéma ke Tikikô lo wù là, o nànte nse' ntèl àm Nikôpôli; nummbe me nabte nejù sàn à bwe.

¹³ Nabte katte Zéna ngalèn ntshù' mba Apôlô kua' mebwô ndù kà bo bwoṅ sàm ju.

¹⁴ A bwô ndù mba tse be ben zi'te nenèn mbwe ntùm mfa' mebwô ndù bo ywimte mfa' mi a tshwèt nànte là, ndùlala ndù kà bo be ke ntàme.

¹⁵ Njoṅ benntùn fa tse bag à bo be là tsha't'o. Tsha'te ben tse bo num nkô be ntùm bamntù là. Kondèn Nsi be njoṅ zin fa.