Titô 2 - NTSHOB NSI

Ntag num ywèn benntùn, nguanmèn, kuan

¹ Tu wul o, tshob tshu ts'a ku'ni num netswite ze nelàn nà.

² A bwô ndù ywèn bandum zete, nku'ni, nzenu, ntswe mebwô ntùm bamntù, ntùm nkôni, ntùm nefènte.

³ Be ndaṅndaṅ, a bwô ndù ywèn bènnzwi ghù yôg nelàne, ke be ghatshabte, ke be kuan ndu' yàme, bo fà ntag mebwô,

⁴ ndùlala ndù bo tswite ntshùagntshùag bènnzwi nekô du tshobe, mba bon tshobe,

⁵ mba ndù bo be ghazenu, ben nelàne, ghafa' ntùm ndà, ben mebwô, ghaju'ni du tshobe, ndùlala ndù kà ntshob Nsi vù ntùm tshabte.

⁶ Be ndaṅndaṅ, tagte ghuan benntùn ndù bo ghù zenu.

⁷ Num njoṅ i fa, a bwô ndù tu wul o fà mfi' num mfa' mebwô; a bwô ndù yu netswite làne, nku'ni;

⁸ a bwô ndù ntshob mu bwô, mbe kelo', ndùlala ndù tuswe ko ngakeban, a bwoṅ nukebwô z'a tshob num be là.

⁹ A bwô ndù ba kuan ju'ni tà tshob num njoṅ tshu fa, nke mbwô tà tshobe, ke ke ngwag yube.

¹⁰ Ke ke ndamte tshu, a bwô bo la'te njoṅ yub nenùn fa, ndùlala ndù bo ghamte netswite Nsi, ngayôg be, ntùm njoṅ nu fa.

Kondèn Nsi

¹¹ Nummbe kondèn Nsi, kondèn z'a ku'ni neyôg njoṅ benntùn fa là, tswite wul i,

¹² nke ntagte be tse be gha newag Nsi mba ghe'te njù là,

¹³ kà nke mbéb fen s'a be ntùm nenywinte là, mbéb nese' nkuni Nsi ndùb mba ngayôg be Kristô Yésu,

¹⁴ z'a na' mfà tu wul i num tu be, ndù a tshu' be num njoṅ nukebwô fa, ndànte nzwil i z'a tsho'o, a nke nta num mfa' mebwô là.

¹⁵ Tshob tshen tshu li, tshobte kua' neta! Kà sàm mèn wag o!