Tànkùt 9 - NTSHOB NSI

Zenu boa tse ben a tsiaṅ nà

¹ Zenu kut ze ba', a bèn nkom tse ntom tse sammbàa,

² zenu bèn nzwite tse nyàm, a bèn ntamte mi ndu', a bèn nabte se téblé.

³ A tum ghafa' tse tse bènnzwi nke nkua' num tu dù' neṅate ts'a tusô là, nke ntshob ndù:

⁴ Mèn z'a b'a nkagni là tsho nsen ni. A tshwèt ntshob ben tse tu yub ke' tsin nà ndù:

⁵ Bin se' njù yàm bàn, bin se' nu ndu' mi me tamte là.

⁶ Bin tum ntùm kagni, bin nsi yôge! Bin zin num manze zenu.

Ngamagte bo nzenu

⁷ Mèn z'a ke ntswit nkùn ngatshabte là be nsoṅ wag nse' yi num tu wul i, mèn z'a be ntshobte ngatshùagntù là, bo be ntshabt'é.

⁸ Kà tshobte ngatshabte, mbwôg ndù k'a bàn o, tshobte nzenu, ndèn ndù a nsi kô o.

⁹ Fà nzenu, a nsi bèn tù' nzenu ntshùate, zi'te mèn netsine, a nsi kwi'te ju z'a lèn nà.

¹⁰ Nebwôg Tshùaben b'a neto'te zenu. nesiaṅte ben nelàn b'a nezi'te zenu.

¹¹ O nsi tshùa njam àm kà lé'njù tsho yàme, kà ngu'njù yôg so kwi'te.

¹² A be z'o b'a ngatshabte là, mb'o nsi bèn ket nge' i yu tu.

Bà boa tse ben a tsiaṅ nà

¹³ Bà ke mb'a mba ta' mènnzwi ntutntut là, nkagni z'a ke' lèn sàm ju là.

¹⁴ A tswe nsi nzendà ba' i, num diaṅ, num dù' neṅate ts'a tusô là.

¹⁵ Num neke ntsiaṅ ba ntshùanze, tse bo tam manze nke nèn ndaṅndaṅ nà.

¹⁶ Mèn z'a be nkagni là tsho nsen ni! A tshwèt ntshob ben tse tu tshob ke' tsin nà ndù:

¹⁷ Ntse mi bo yi là fite, bàn ze mèn be jù nke ndem nà nke ntshùa ntshu ng'é neshu!

¹⁸ Là, a ke' lèn ndù ben tse yen bà tsiaṅ yub là b'a ntùm ba ghem ntùm ngô fe ben.