Tànkùt 5 - NTSHOB NSI

Ntag num nekù mènnzwi kebwô

¹ Nshum àm, kù' ntoṅ num zenu àm, kù' ntoṅ num yàm nezi'te.

² Ndùlala ndù o lem nkwate, mba ndù nkub ntshu mu lem nelène.

³ Nummbe nkub ntshu ngùn mènnzwi be nyi ṅwa'a, lém se botte ntshùa njùanjùa mfèt.

⁴ Là, a be mbe miagte, ngùn mènnzwi là zwe ntshùa zwetshù'tshù'ù, ntshùag ntshùa ṅwi ze bo kuà njam bàa là.

⁵ Nku mi be nswe' nkum num vùkob, nku mi be nzin tà nkum ngô fe ben.

⁶ A be mb'a tshakendà num manze tse, ke ke ndèn dù' z'a tshwèt nèn nà, ndùlala ke ke njen tse manze yôg.

⁷ Nshumnshum tshàm, bin kù' ntoṅ nju' àm ndonni. Kà bin sô ku zin num ntshob mi a tum ntshu àm nà.

⁸ Kag manze z'a tshwèt nèn nkum num i là nsi, kà ghebte mbaṅ nzendà i.

⁹ Mbwôg ndù k'a swèn yu ngù' tsemo' ben, nswèn tsho ngu'njù ngatshùag;

¹⁰ mbwôg ndù kà ba ghùn jù ju o njwèle, z'a be ntàm so fa' ntùm ndà mènghua là.

¹¹ Mbwôg ndù k'o tsham zwe ndùse yen ngelaṅ, ndùse mbàb wul o kôg fa là!

¹² Nummb'o nsi tshob yen ngelaṅ, nà ndù: A na' ntshùa ndùke me bam netswit nkùn, ntshùa ndùke ntù àm gha kà bo tshobt'àm à?

¹³ A na' ntshùa ndùke me ke ghù neju' ntshu ghatswite àm, ke kù' ntoṅ mbwe ben tse bo ke nzi't'àm n'à?

¹⁴ A lo tù' à metsili mba njoṅ nge' fa lo tsho àm, netèt ngô bo mbumte.

Nu mènnzwi nguanmèn

¹⁵ Nu ntse mi a tum num so lagntse là, ntse mi a tum ntùm so tôntse là.

¹⁶ Ndù tsho tumnsi ntse nsi ke sa nèn à ntshundà ké? Tsho bon netsha'ntse nsi ke swe' à num ba nsém ké?

¹⁷ A bwô a b'a mu tù' wù, ke b'a ndù mu bin à ba ghùn.

¹⁸ A bwô ndù mbotni be so tôntse, tsiaṅte bin mènnzwi ze bin yi lo ngon nà.

¹⁹ Kwinyàm s'a be ngag neshu là, njuanyàm z'a dun mebwô là, a bwô ndù a lo' ntù o, kà ze nelo' ntù' bum o, a bwô ndù o ke ndab wut ke tsin num nkôni mi.

²⁰ Nshum àm, a nsi tshùa ndùke k'o nke ndab wut num ta' ngùn mènnzwi a nsi tshùa ndùke k'o ke nkab num ndàntù mènnzwi z'o ke' lèn i l'à?

²¹ Nummbe tse manze mènntùn fa b'a num miag Tshùaben. A be ndôte njoṅ tshagnze tse fa.

²² Ngatshùagntù tsho ntùm ko' mi mfànnu, nkù nukebwô tse ghom i.

²³ A nsi kwù nummb'a ke' zi'te là, a nsi tiag njam ze bà z'a ta neshu là.