Tànkùt 4 - NTSHOB NSI

Neghù zenu mbèn ndé'e

¹ Nshumnshum tshàm, bin ju' nezi'te ta' tà, bin kù' ntoṅ, num nelèn zenu.

² Nummbe me ke mfà à ntag mebwô bin; kà bin ghua' yàm netswite.

³ Me na' mb'a nkwi nshum mbaṅ tàa. Ta' nshum nenywi' bo ta' nkwi nshum mbaṅ màa.

⁴ A lo ke nzi't'àm, nke ntshob me ndù: A bwô o lé' ntshob màm ntù o. Ze ntag màm, o nsi yôge.

⁵ Ghù zenu, ghù nezi'te. Kà lag ntshob mi a tum ntshu àm nà ke lo' mvèn o ntam ntshob là yi.

⁶ Kà ghua' i a nsi béb o, kô i, a nsi kabt'o.

⁷ Tshù, neto'te zenu b'a ndù o ghù zenu, ndo' mba ke lo z'o ghù là njun nezi'te yi.

⁸ A bwô ndù o lèn njoṅ i, a bù't'o, a nsi fà nkuni wù, a be z'o tat'é là.

⁹ A nsi te tshe' kondèn tu o, a nsi lo' ta' kuni kétmbùm kwi o yi.

A bwô nekù nze tshùagkèt benntùn

¹⁰ Nshum àm, ju' ntshob màm ntshùbe, ndù ngu'njù yôg tsho yàme.

¹¹ M'a' la't'o manze zenu, m'a' tshagt'o num ba manze ndaṅndaṅ.

¹² A be z'o tshwèt nzin nà mba ku o ke nsi tiage, mbe z'o tshwèt nkù nde là mb'o ke nsi fa'te.

¹³ Tshùb ju z'o zi'te là, kà kag i nsi. Lem i kua' mebwô, nummb'a so yôg.

¹⁴ Kà tsho num manze ghatshùagntù, ke ke nzin num ze manze ben kebwô.

¹⁵ Le'te num bwe, kà tshùa bwe! Kaṅ mvèn o ntam i yi, tshùa dù' ghua.

¹⁶ Nummb'a be bo ke zi ke be ndù bo ghù nukebwô, be miaglo ke tsho tu bo ke be ndù bo ma' mènntùn nsi.

¹⁷ Nummbe bo ke njù à bàn tshùagntù, nke nu à ndù' nefètte lem.

¹⁸ Ze manze ben netsin b'a mba nelàn z'a tshwèt nké' là, ndù ze neziag be nèn tà nkum netèt lé'njù.

¹⁹ Ze manze ghatshùagntù b'a mba njam nà, bo ke' be yen ju z'a ghù bo vù nsi là.

A bwô netshùb ngùninu neta

²⁰ Nshum àm, kù' ntoṅ num ntshob màm, kù' ntoṅ nju' tshàm tshô fa.

²¹ A ke' bwô ndù bo lo num miag mu. Lem njoṅ i fa ntùm ntù o.

²² Nummb'a b'a yôg num njoṅ benntùn fa tse bo fon yub là, mbe ntswe mebwô njoṅ wut yub fa.

²³ A bwô ndù o béb ntù o ntshùa njoṅ tshu fa, nummbe njoṅ tsho tumnsi ntse yôg fa b'a bwe.

²⁴ Sô tatte ntshu o, sô ba lamte num nkub ntshu mu.

²⁵ A bwô ndù o te miag mu num manze netsin z'a be mbwe o là, yu nelôte nèn be ndaṅndaṅ mbwe o.

²⁶ Lôte manze z'o tshwèt ntshùa bwe là, tsiagte njoṅ nzin mu fa.

²⁷ Kà ke ngwù bag bag, ke bu zwim ke bu kwéb lo. Sô ku o num manze kebwô.