Tànkùt 3 - NTSHOB NSI

Zenu mba nebwôg Tshùaben

¹ Nshum àm, kà lag tshu tse me na' nzi't'o yi là, a bwô ndù o tshùb ntag màm.

² Nummbe bo nsi tènte lé'njù boa ngu'njù yôg so, mbèn nkwi'te yu fite.

³ Kà bwôntù bo nunenùn kag ku o. Taṅ yub tô o, kite yub ntùm ntù o.

⁴ A nsi tshùa ndùlala o ghù fen bo lén ntùn num miag Tshùaben Nsi boa benntùn.

⁵ Yé'te num Tshùaben ngô ntù o fa, ntshùa neyé'te num ko' yu zenu.

⁶ A bwô ndù o zi'te nelèn Nsi num njoṅ tsho manze fa, ndùlala ndù a zwiagte tsho manz'a dune.

⁷ Kà be nzenu à num ko' mu miag, bwôg Tshùaben, ndo' mvèn o ntam nukebwô yi.

⁸ Yen nà nsi be ntswe mebwô num ngawut tsho, be ju nefite num mvôg mu.

⁹ Lo' tshu tsho ngamte Nsi yi, lo' mbwe tshu tsho ngamt'é yi,

¹⁰ a nsi tshùa ndùlala nkandà mu dun fu', ndu' dun ntùm mu ntshaṅ ndùb fa kà nswe.

¹¹ Nshum àm, kà wag ndùse Tshùaben tswit nkùn num o là, kà bwôg ndùs'a so ntsha tu o là.

¹² Nummbe Tshùaben ke nso ntsha à tu mèn z'a be nkô i là, mba tà be ngù num mén z'a nkô i là.

Zenu tanjoṅ ntshùa gol

¹³ Mènfen b'a mèn z'a fon zenu là, bo z'a ghù nesiaṅte là.

¹⁴ Nummbe bin ntàn z'a be mfà là bwô ntshùa silba, fu' se mèn be nsô bwe là tanjoṅ ntshùa gol.

¹⁵ Zenu tanjoṅ ntshùa ntôgtse, a tanjoṅ ntshùa njoṅ tshu fa ts'a ghù ntshu ntàn nà.

¹⁶ Zenu tshùb lé'njù yàm ntùm bu i ze zwim, ntshùb nkàb bo ghamte mum bu i ze kwéb.

¹⁷ Tse manze zenu b'a tse mebwô, tse ntshagnze be tse fite.

¹⁸ Zenu ghù tù yôg num ben tse bo tshùb i là, ben tse bo taṅ num zenu là b'a ghafen.

¹⁹ Tshùaben tshùa njam zenu kà nte tsha' nsi, ntshùa njam nesiaṅte kà ntaṅ kamànyam tù.

²⁰ A tshùa njam ze nesiaṅte kà ngù nta'ntse nke nswe'e, kà ba ndot nke mfà mbaṅ.

Tshùaben num ntomte nzenu

²¹ Nshum àm, kà tshen tshu nezi'te li lo num miag mu, tshùb zenu bo nesiaṅte.

²² Zenu bo nesiaṅte nsi be yôg ntù o, be ju kwiwut num ntô mu.

²³ A be ndùlala mb'o nsi zin num manz'o à ntùm nzin ke tsham ku o.

²⁴ A be z'o nô nsi là, mb'o ke nsi bwôg sàm ju; miaglo mu nsi botte ndùs'o nsi nô nsi là,

²⁵ Kà bwôg mo' fétwut z'a ghù neṅwag num o ndende là, ke ndù ghatshùagntù nsi kam o lo.

²⁶ Nummbe Tshùaben nsi b'a yu dù' neyé'te, a nsi ke béb ku o ndù k'a tsho ntùm ko'.

Mba we lo kô mèn z'a ghebte mbaṅ i là

²⁷ Kà gha neghù mebwô mèn z'a ku'ni ndù o ghù yi là, a be z'a b'a wù bèn nku'ni neghù yi là.

²⁸ Kà tshob mfèl o ndù a nèn kà ntshag nse'e, a be z'o ghù ju nefà yi là, fà yi ndùse ntshùa netshag mfà yi a ndamnjù.

²⁹ Kà kwa kebwô num mfèl o, ndùs'a tswe mbaṅ o ntùm mbétni là.

³⁰ Kà ghù ntanta bin mènntùn ndùs'a ke' ghù nukebwô wù là.

³¹ Kà ghù ghe'te num ze nze nga ntanta, ke bèn mbét sàm ze manze mba ntshù.

³² Nummbe nu ghaghù nukebwô be mbag Tshùaben. Là, a ke mb'a shun ben ndaṅndaṅ.

³³ Nsi be nso ndon ntùm tunndà ngatshùagntù. Là, a be ntam ntse ntùm ndà ben netsine.

³⁴ A be ntshabte ghatshabte, Là, nke nko ndèn ghafà wut nsi.

³⁵ Mi ntsi' ghazenu b'a nku'ni, Mi ntsi' kagni be tuswe.