Tànkùt 27 - NTSHOB NSI

¹ Kà ka'te num nu ndamnjù nummb'o ke' lèn mba sènni lo' be yi là.

² A bwô ndù mènghua bèn nyàmt'o ke b'a yu tu wut, ta' ngùn bèn nyàmt'o ke b'a ko' mu nkub ntshu.

³ Loṅ be ndèle, kwango' nke ndèle, là yantù nkagni be ndèt ntshùa loṅ bo kwango'.

⁴ Tshùaben be njab nu, yantù nke mbùn dù', là we z'a ku'ni netsin tù mbwe lànghe' à?

⁵ Mebwô b'a netshobte mèn ndaṅndaṅ ntshùa netsho i nshun njamnjam.

⁶ Nshun o kag mfaṅ num o ntùm nenùn mb'a la't'a nkôni wù, là ngakeban z'a tshwèt ntsiag o là ke nefùt'o.

⁷ Mèn be njwèt mb'a nyiaṅte kub ṅwa' nku, là njoṅ tshu fa be ndùm ntshu nganziku' à nedùme, mba z'a zwe là.

⁸ Mèn z'a tù' tshakendà, ntsin ngùanesà mbaṅ ze ngô là fut'a saṅ s'a be tshakendà, mbe ngùanesà mbaṅ nkàn i là.

⁹ Mfèt bo labinda num nso tsiaṅte ntù mèn ntag mebwô mi nshun mèn num mfà yi là be ntswe'te ntù.

¹⁰ Kà ghua' nshun o, shun tàan kà nèn ndà mfèl o num lé'njù nge' nshun o z'a mbaṅ o là tshùa mfèl o z'a b'a ngùanesà là.

¹¹ Nshun àm, be nzenu, ngù ntù àm tsiaṅte. A nsi tshùa ndùlala me bùnte nu mèn z'a tshwèt ntut'àm nà.

¹² Ngazete num njen mba nukebwô se' là nkù ù, là nkagni num mbémte ntshùa, nket nge' i.

¹³ Lo' nzwe i, nummb'a kwé bu ngùn mbe se' num ghùn, a bwô ndù o tshùb tshu yi num tshwèt.

¹⁴ A be ze mèn tshag nz'é tù mà bam nkebnjù naṅ mbotni num mfèl i là, mba bo ghù nelo' yen n'a mba ndon neso tu mèn nà.

¹⁵ Ndaṅndaṅ mba ntshùaṅba' ke' be tsin neke ntum ntse num lé'njù mbaṅ nà, a b'a ndùlala num mènnzwi z'a be ngù ntanta là.

¹⁶ O diag neghom i mb'o diag neghom à fetmbaṅ mbèn ngom à mfèt mbu.

¹⁷ Mba tùn nke mbèn nkùa tùn nà, a b'a be ndaṅndaṅ num mènntùn, nummb'a mènntùn nke nshu'te yantù mènntùn.

¹⁸ Mèn z'a nabte tù tshom se là mb'a jù ntàm mi. Mèn béb ze tàfa' mebwô mba bo a' nyamt'é.

¹⁹ Mba mènntùn be nshù se i ntùm ntse mbèn njen be se i bwe là, be ndaṅndaṅ ntù mènntùn ke njab à num mènntùn.

²⁰ Mba ngô fe ben ke' be ywèt là, be ndaṅndaṅ miag mènntùn ke' be ywèt.

²¹ Tômbwôg num bwe num silba, ndà mbwôg be bwe num gol, ndùlala bo ke ndèn njoṅ mèn à mba lén se lo' nju'ni yi là.

²² O ma' nkagni be ntùm kebu', netèt miag tshu, ndo' nkô kebu' ntswe' i yi, mba zwiaṅte ke nsi tum num i.

²³ A bwô o lèn mba bon nyàm tsho tshwèt ndo' mbe yi là a bwô nete lag num yu bwoṅ nyàm.

²⁴ Nummbe tshunkàb ke' be ghô njoṅ ndù fa, kétmbùm ke bèn nke ntswe matmat.

²⁵ Bo num kebte nenà, a bèn nte'e bo tem nenà ts'a num ba mbat là, ṅwale.

²⁶ Njùmbwe b'a num nema' nzwe num o, mfot mbwe be num nejun ta' nà yi

²⁷ mbùn mbwe tùn ku' num jujù o bo ze tunndà o, mba nelo' nkém ghafa' tsho tse bènnzwi yi.