Tànkùt 26 - NTSHOB NSI

Nkagni

¹ Nywin mbaṅ ke' be bwô dum, ke mbaṅ no num ngelaṅ netsho' tshu, be ndaṅndaṅ nku'ni ke' be bwô nkagni.

² Ndaṅndaṅ mba saṅ num nkù, nganelét nke mfùt là, be ndaṅndaṅ ndon ze bo so num mèn ke ntun nà ke' be tsho num ng'é.

³ Shua' b'a num nyàmdiaṅe, ntùn ntshu nyàm be num kekwène bo ke ntam ṅwag à mvèn kagni.

⁴ Kà yé'te num bà nkagni mbùnte nu yi, mbwôg ndù kà tu wul o fut'é;

⁵ bùnte nkagni mba kua' bà i be yi là, mbwôg ndù k'a yen wul i mba nzenu là.

⁶ Mèn z'a be ntshag nkùn nkagni là num nso mfaṅ num nku mi, nke nu lem ntùm ngùtni.

⁷ Nekeb ntsha z'a tum ntshu nkagni là ke' ghù neta, ndaṅndaṅ mba nku nke'kèt be mbwoṅ neta là.

⁸ Mèn ghù nku'ni nkagni mb'a tswe à mb'o taṅ loṅ num shùmte là.

⁹ Nekeb ntsha' z'a tum ntshu kagni là, b'a mba njô ze nganu ndu' tshùb bu i là.

¹⁰ Mèn z'a num ndo' kagni boa ghatshùanze ntùm ntshufa' là b'a mba ngama' két z'a be ntam njoṅ benntùn fa là.

¹¹ Nkagni be mbèn njam num bà i mba mbù num mbèn njam num ju z'a ywi' là.

¹² O njen mènntùn a nke ndo' wul i mba nzenu là, o lèn mb'a bwô nenywinte num nkagni ntshùa i kua' neshu.

Keki ndô

¹³ Ndô num ntshob ndù: Ngwayit num manze là, ta' ngwayit be num ba manze là.

¹⁴ Tshètndà num nkaṅte num saṅ se bo taṅ i bwe là, be ndaṅndaṅ ndô num nkaṅte wul i num kunndà.

¹⁵ Ndô so bu i ntùm kàb, ke bèn ndo' mbèn yi njam netshag ntshu i.

¹⁶ Ndô ke njen wul i mb'a b'a nzenu ta là mb'a ze nu ntshùa benntùn sammbàa tse bo ghù nkwate ntùn nà.

Tsemo' tànkùt

¹⁷ Ntshùanze z'a be nja ntù num ntanta z'a ke' lôt'é là, fut'a mèn z'a num ntshùb mbù num ntoṅ mi là.

¹⁸ Ndaṅndaṅ mba tshùagkèt mbabun nà, a be ma' ba nesèn mbwôge, nkét bo vùkob;

¹⁹ ng'é fut'a mèn z'a num mfùte mfèl i là a num ntshob ndù: Be lo ke ke ntam à fiaṅnsoṅ ké?

²⁰ Ntshwèn be ke be mba mbwôg bi; ngashu'te be ke be, mba ntanta à mi.

²¹ Kekimbwôg be mfà nge'mbwôge, ntshwèn nke mfà mbwôge. Be ndaṅndaṅ nga ntanta be ntènte tantshu.

²² Ntshob ngashu' ndàm ke mb'a mba bon tshu nelamte là, ntshob là be ntsho num mèn tà nkum tà ntù i.

²³ Ndaṅndaṅ mba ba befe silba z'a ṅab num kab tsha' là, nkub ntshu nelote bo ntù kebwô b'a ndùlala.

²⁴ Ngakeban ke ndo' à nkub ntshu mi mfùte yi, a num ndem mfùm ntùm ntù i.

²⁵ Ndùs'a lo' nze nebotte là, o bamnà nummb'a ghù tshùaya'nu ntù i sammbàa.

²⁶ A be z'a lem ze nkembàn, nkab'é là, mba tshùagntù i nsi la'te wul i ntùm mbumte.

²⁷ Mèn z'a tswe' tam nà, mb'a' vù ntùm bwe; mèn ma' loṅ mb'a nsi tam à be ng'é.

²⁸ Lém s'a num ntatte là num ndo' kebwô nse' yi. Ntshu z'a be mbatte là num nse' fam.