Tànkùt 25 - NTSHOB NSI

Tsemo' tànkùt nzenze

¹ Tshù tsemo' tànkùt Salomon tse ben Ezékia, mfen Yuda na' nkùmte li.

² Ghamte Nsi b'a nelem tshu tsham, là ghamte fenfen b'a nediag ntun num tshu.

³ Be mèn ke lèn mba kamànyam nèn yi tù là, ke lèn mba tsha' tsho yi nsi là. A b'a be ndùlala num ntù fenfen.

⁴ Tsho' ba befe num silba, ta' kab nsi tum ngana tùn bwe.

⁵ Tsho' ngatshùagntù z'a be mbwe mfen nà, ndù diaṅkwa se féb nga nsi ntùm nunetsine.

⁶ Kà la'te wut mbwe mfen, ke bèn ndo' dù' ben ndùbndùb.

⁷ Nummbe mebwô be mèn a ndùse bo tshob yi ndù: Ko' nse' nsen ni là, ntshùa nekôg o mbwe nkam. z'a bam ndù o se' mbwe i là,

⁸ kà nànte ntsho ntùm tantshu, o nsi ghù à ndùke ndùse mo' mèn nsi be miagte kag tuswe tu o l'à?

⁹ Tshètte ju njam mbaṅ mfèl o là kà ké'te tsham mènghua,

¹⁰ mbwôg ndù kà ng'é lèn, nkel o ntanta, mba ndù kà lén so ke nju'ni be kebwô njoṅ ndù fa.

¹¹ Ntshob mi bo tshob num ngelaṅ ntùn nà fut'a ntàmtù gol mi bo yab ntùm ntu' silba là;

¹² o be tshobte nzenu z'a kù' ntoṅ nà a be yi à mba kwa gol, mba ntshèn gol ntùn nà.

¹³ Ta' ngantum z'a be mèn nenùn nà ke mbe num miag mèn z'a tum i l'a mba fite lé'njù ngelaṅ netsho' tshu là, a num tswe'te ntù tàfa' i.

¹⁴ Mèn z'a be ntatte wul i, nke nka' ke fà ju là, b'a mba ba ndot bo fetmbaṅ ze mbaṅ be ntùm bwe là.

¹⁵ Be mèn lo' nelèt wut num yantù mbot kam yi, ntshob nebotte num mbot mba mvôge.

¹⁶ A be z'o fon ṅwa' là, o zete là nejù i yàme; mbwôg nejù i yàm ntù' ywi' neywi'i.

¹⁷ Kà ke njôg mfèl o neshu, mbwôg ndù k'a be yen o ndà i neshu ntù' ke mbàn o nebàne.

¹⁸ Mènntùn z'a num ngù nkwénta tatte num mfèl i là b'a mba ta' zwit là, mba ta' ṅwi là, mba ta' két s'a béte là.

¹⁹ Nga ndàm ze be mèn yab ntù num i num lé'njù nge' là, fut'a ta' sô s'a be' là, mfut'a ta' ku z'a tiag là.

²⁰ Mèn z'a be njob kwi ntù z'a be ntùm ngùtni là b'a mba mèn z'a sô nzwe mfùag ndùse mfùag tshwèt nko là, b'a mba ndu' netshùag mi bo be naṅ num mfaṅ nà.

²¹ Fà jujù ngakeban o, a be ze nziku' ya i là, fà ntse yi a nu, a be ze ntù i kù là.

²² A be ndùlala mb'o naṅ nge'mbwôg nedum num tu i. Tshùaben nsi fà nda' wù.

²³ Fetmbaṅ z'a swe' tu là num mfà mbaṅ, lém nga ndàm num ngù se benntùn tam njame.

²⁴ Mebwô b'a neke ntswe tôg tuba' ntshùa netam ndà ntswe bin mènnzwi z'a be nga ntanta là.

²⁵ Nkùn nswe z'a fe tum nesà nse' là b'a mba ntse nefite num ntô mi a jumte là.

²⁶ Mèn netsin z'a kag bu i ngatshùagntù là fut'a lagntse se bo kamte là, mfut'a tôntse s'a ke' bwô là.

²⁷ A ke' bwô nejù ṅwa' yàme, là nediag ze nku'ni tsemo' ben b'a ta' ghamte.

²⁸ Mèn z'a ke' ku'ni nebéb wul i ze tu là fut'a tusô se bo sat'é, kàbngô ke bèn mbe bwe là.