Tànkùt 24 - NTSHOB NSI

Nzenu bo tshùagkèt mèn

¹ Kà ghe'te ben tse bo b'a ghatshùagntù là, kà tam mbwoṅ bin à bo;

² nummbe ntù tshob ke nkwat'a be nefètte lem nkub ntshu mub ke ntshob à be nukebwô.

³ Bo ke ndo' à zenu nkut ba' yi, ndo' nesiaṅte kà mfét tun i yi nsi,

⁴ bo ke ntshùa à njam nesiaṅte kà nto'ndà ndun mbwô mbwô tshu boa tshu ntùn.

⁵ Mènntùn z'a be nzenu là b'a nga neta mènntùn z'a ghù nesiaṅte là be ngù ze nesiaṅte féb nga nsi.

⁶ Nummbe bo ke ndo' à zete nde' ntsho yi; a be z'o ju' ntag yàm nà, mb'a ywimt'o ndù o tshùa ntsho njob ngu'u.

⁷ Zenu be nzi neshu num miag nkagni, a ke' be gha' ntshu i num nsém.

⁸ Mèn z'a be nkwate neghù nukebwô là, b'a mèn ze nukebwô dun num i là.

⁹ Ntàmtenu bà b'a nukebwô ngatshabte ke mb'a ta' tshùaya'nu netèt benntùn.

¹⁰ A be z'o ghua' fènntù num lé'njù nge' là, mba yu neta b'a nge'.

¹¹ Tshu' ben tse bo tù' b'a ben vùkob là, boa tse bo tshwèt nke ntiag nèn tsho ntùm ngùtni nge' là.

¹² A b'o tshob ndù: Yen mbe bag lo ke lèn tshage! Mèn z'a be mfi' ntù mèn ndèn nà ke' ju' ké? Mèn z'a num ndôte ntù o là, tu wul i lèn ndùlala, a nsi ghù mba num we lo à mba mfa' mi be yi là.

¹³ Nshum àm, jù ṅwa'a, nummb'a bwô; ta' kub ṅwa' nsi botte num ntag mu.

¹⁴ Be ndaṅndaṅ a bwô ndù o ghù zenu num ntù o, a be z'o fon zenu là, mb'a' ywimte ndamnjù, o be ke bi yu nenywinte.

¹⁵ Kà lo' tshùagntù mbùn ko' yi ntùm dù'ntswe mèn netsine, ke sate dù' z'a num mfite bwe là.

¹⁶ Nummbe mèn netsin be ngwù nsi yoṅ sammbàa, mbèn ndo, là ghatshùagntù nke ngwù ntùm nge'.

¹⁷ Kà tsiaṅte mba ngakeban o vù nsi là, a ke' bwô ntù o ṅwate ndùs'a tiag là;

¹⁸ mbwôg ndù kà Tshùaben yen i, nu tse ke bwô i, a ke sô yantù i num i.

¹⁹ Kà ghù yantù num ben tse bo ghù nukebwô là, ke ghù miag ghe'te num ghatshùagntù;

²⁰ nummbe ze ndamnjù ngaghù nukebwô ke' be bwe nka' ghatshùagntù num mbi.

²¹ Nshum àm, bwôg Tshùaben bo mfen, ke so wul o num ghaghù ntutntut!

²² Nummbe nge' nsi kab mbu num bo ndende. We z'a lèn tse nevù ntsha Tshùaben boa tse mfen à?

Memo' ntag nzenu

²³ Tshù ju z'a bèn mfe ghazenu li. Nesa' kam njam ntshù' ke' be mebwô.

²⁴ Mèn z'a tshob ngatshùagntù ndù a b'a mèn netsin nà, mba benntùn nsi so ndon tu i, ngôngô tam bwe mvèn i.

²⁵ Ben tse bo num nso ntsha tu i là be mbe mebwô; fu' ke ntsho yub à mba ntshèt là.

²⁶ A num ntsiag mèn z'a bùnte mebwô là.

²⁷ Nabte tsho tshu mebwô, njam ntshundà, nabte yu nà mebwô; yen nà nsi be tôg o kut yu ba'.

²⁸ Kà ghù fùag kwénta num mfèl o; o ke ndiag à nefùte num nkub ntshu mu ké?

²⁹ Kà tshob mb'o nsi ghù yi mb'a na' ngù wù là, ke tshob mb'o nsi ba' mba we lo mba mfa' mi be yi là.

Bin fa' ndô

³⁰ Me lo tshùa mbaṅ nà ta' ndô, mbaṅ nà tù ndu' ta' nkagni.

³¹ Tshù, njen ndù njô lo' dù' fa, kwékwénàndô kabte njoṅ dù' fa, kàb ndoṅ kôg naṅ nsi,

³² me lôte kua' mebwô, ndo' zenu num ju ze me yen nà.

³³ Metsit miaglo, metsit nebole, nena' mfa mbu nyitte wul o!

³⁴ Mba bwoṅ nsi ṅwag num o mba nganya' dù' là, kekua tèl o mba mènntùn z'a tshùb tshuntshùag là.