Tànkùt 23 - NTSHOB NSI

¹ Bin ndùb ntswe téblé, o ghom wul o.

² Te bi num lôtô o, a be z'o b'a jù ke ywèt là!

³ Kà te lag ghe'te num tshujù tse ntùn; nummb'a b'a nelo' mfùt'o yi!

⁴ Kà ghùtni wul o num neghù fu', kà yab yu nesiaṅte num bwe.

⁵ O be nte lag so bwe, a ke bèn mbe nummb'a ghù mbàb mi! A be mfùt ndaṅndaṅ mba sa'mbu' be mfùt nèn kamànyam nà.

⁶ Kà jù jujù bin mèn ze ntshù mi ke' bwô là, kà te lag ghe'te num tshujù tse ntùn;

⁷ nummb'a ke ntswe à mb'o mi ntàn nyiaṅtu a la' tô o là; a num ntshob wù ndù: Jù mbèn nu, a be ntshob ndùlala, nda' ndù ntù i ke be num o!

⁸ O nsi ywi' kam i z'o lo nejù là, be ke jù bin ntshob mebwô mi o tshob là.

⁹ Kà tshob nu num ntoṅ nkagni, nummb'a nsi wag zete z'o lo' ntshob ntshob yi là.

¹⁰ Kà tsho' loṅ njwèn ndùnsi, ke bèn ntsho ntùm ndà bontse;

¹¹ nummbe Tshùaben z'a be njagte mba' yub là b'a nga ngù', a yi bèn lo nsi num o, tshètte yub njam!

¹² Yab ntù o num nezi'te, mbèn nte ntoṅ mu nge num zenu.

¹³ Kà lèt wut num netswit nkùn num mèn! A be z'o tam shua' mvèn i là, mb'a ke nsi kwù!

¹⁴ O nsi yôg i num ngô fe ben a be z'o tam shua' mvèn i là.

Ntag ta' tà num mfà mén i là

¹⁵ Nshum àm, a be z'o ghù ntù zenu là, mba mba yàm ntù a' tsiaṅte num bwe.

¹⁶ Ntù àm nsi ṅwate ntùm tsiaṅte ndùse nkub ntshu mu nsi tshob nu ndaṅndaṅ nà.

¹⁷ Kà ntù o ghù ghe'te num ben kebwô, là, a bwô ndù a ke mbwôg Tshùaben njoṅ ndù fa.

¹⁸ Nummbe kua' ndamnjù num bwe, mbe ndù o ke nsi fém num yu nenywinte.

¹⁹ Wù nshum àm, a bwô ndù o ju'u, ntù' nzenu; tshagte ntù o à num manze ntùn.

²⁰ Kà tsho shun bin à ghanu ndu' bin à ghakô mbàb neshu.

²¹ Nummbe nganu ndu' bo jù ke ywèt be ntsho ntùm bwoṅ nzi miaglo, nke nkel à ghanzwe.

²² Ju'ni tàan z'a mbwe o là, ke bèn ngwag màan ndùs'a ywèn nà.

²³ Jun nenùne, ke bèn nswèn i, ghù zenu nezi'te bo nesiaṅte.

²⁴ Tà mèn netsin ke njôg à ntùm neṅwate, mèn z'a bwe nzenu là be ngù tsiaṅte ntù i.

²⁵ Tàan z'a bwe o là tsiaṅte num o mènnzwi z'a bwe o là ghù tsiaṅte.

²⁶ Nshum àm, fà ntù me, nke nte lag num tshàm manze.

²⁷ Nummbe kattù mènnzwi b'a ta' gheme, s'a tsho là, ngùn mènnzwi be tôntse s'a fét là!

²⁸ A num nya' dù' mba fimntshu là, a num ngabte kal i netèt bon bandum.

Keki mbum ndu'

²⁹ Netshob mbe wé' ke ndôt'a ba we? Netshob mbe ha, ke ndôt'a ba we? Ntanta bo nebote mèn ke ndôt'a ba we? Neket mfaṅ ke tun nsi ke ndôt'a ba we? Miag meba ke ndôt'a ba we?

³⁰ A ke ndôt'a ben tse bo num nso wut num ndu' nke nèn nu ntamte ndu' là.

³¹ Kà kaṅte mbwô ndu' meba mi a ntùm ntu' nke mbùn nà, a ke nswe' à nda'nda'.

³² Là mbe miagte nke ntshôg ntshùa nyu, nke ntshôg ntshùa swenyu.

³³ Miag mu nsi yen tshu nezwiaṅte, ntù o tshob nu z'a ke' zin nà.

³⁴ O nsi b'a mba mènntùn z'a nô netèt dibantse là, mba mènntùn z'a nô num ntshùa mbwoṅ sitima là.

³⁵ O nsi ke tshob ndù: Bo lab àm! Me ke ju' kebwô! Bo lab àm me ke ju'! Ndùse me nsi bam num miaglo là, me nsi bèn nèn nu ndu'.