Tànkùt 21 - NTSHOB NSI

¹ Ntù mfen ke mb'a koṅntse ntùm mbu Tshùaben; a be mben i ma' mba yà lo z'a kô là.

² Njoṅ tse manze mènntùn fa b'a nelàn num miag mi, là Tshùaben bèn mfi' ba ntù.

³ Tshùaben kô neghù nunetsin bo ze nenùn ntshùa tshule'te.

⁴ Miag ka'te bo ko'tewut, sen lambo ghatshùagntù là b'a nukebwô;

⁵ ntàmtenu mènntùn z'a be mfa' là be mfà fu' yàm yi, là mèn z'a be nànte là ke miagt'a ntùm kekua.

⁶ Tshunkàb tse mèn lo' a tatte ngù yi là b'a mba njwèt ntshu mi a be ntôg là: A be nsoṅ vùkob nse' yi.

⁷ Nu nefètte lem be ndo' ngatshùagntù nèn yi nummbe bo num nga neghù nunetsine.

⁸ Ngavù ntsha ke ntshùb à manze ts'a lamte là; là, mbu' ke ngù ze nu a ndaṅndaṅ.

⁹ Mebwô b'a neke ntswe tôg tuba', ntshùa netam ndà ntswe bin mènnzwi z'a be nga ntanta là.

¹⁰ Ntù ngatshùagntù ke nkô z'a be nukebwô, a ke' be ghù kondèn mba kua' num miag nshun i.

¹¹ O lab ngatshabte mba nkagni nsi ghom wul i tù' nzenu; o tshobte ngasiaṅte mb'a nsi ju' ju z'a lo mbwô ndù a ghù là.

¹² Mèn netsin b'a mèn z'a te lag se num ba' ngatshùagntù là, a num ma' ngatshùagntù ntùm nge'.

¹³ Mèn z'a tù' mbu'ntoṅ mbwe nkua' mbwoṅ nà, mb'a ke nsi ghù mbùn ntshob ndùse tu wul i nsi tsiaṅ nà.

¹⁴ Nda' ze mèn fà nguangua là be nkôgte yantù; nda' ze mèn be fà ndemte bam kummbaṅ se là num mbote tonte yantù.

¹⁵ Bo num ngù nunenùn ntù mèn netsin tsiaṅte, là bwôg num ntshùb ben tse bo num ngù nukebwô là.

¹⁶ Mèn z'a kag manze nezete ntsin ngùanesà là, nsi ghù ze dù'ntswe à ntùm mbumte fe ben.

¹⁷ Mèn ke nkô tsiaṅte neshu mb'a nsi tù' mbwoṅ, mèn z'a be nkô ndu' bo mfèt là ke' be ghù nkàb.

¹⁸ Ngatshùagntù b'a ju nelo' ntshu' mèn netsin yi ngamfùm be num ben ndaṅndaṅ.

¹⁹ Mebwô b'a netswe kônkwa, ntshùa netswe bin mènnzwi z'a be nga ntanta, ngakag zwentù là.

²⁰ Tshu tanjoṅ bo mfèt be mbe ntùm ndà zenu, là nkagni nke njù fa ke faṅ ju.

²¹ Mèn z'a be ndiag nunetsin bo bwôntù là nsi fon yôg, nunetsin bo ghamte.

²² Nzenu ke ntsho' ngwù num tusô ba sa'nde' à yoṅ ntshù', a num ntèn kàbngô ze tusô ke njab ntù bwe là ma' nsi.

²³ Mèn z'a be mbéb ntshu i bo lém se là, num mbéb ntù i mum nge'.

²⁴ Mèn bo ke ntsiaṅ i ngatshabte là b'a ngafit, ngako'tewut; a ke ndo' a vôgte bo ka'te ngù ze nu yi.

²⁵ Tshu tse ndô be nkô là num nzwi i nummbe mbu mi be nga nefa'a.

²⁶ A be nzwi njoṅ ze ngelaṅ fa neke ntshob tshu ts'a kô là, là mèn netsin ke mfà ke bèn mbèn bu i njam.

²⁷ Jule'te ghatshùagntù b'a tshùaya'nu ndù a bag neshu, là, mebwô mebwô, ndùse bo be fà ngù nkwate kebwô là.

²⁸ Ngakwénta tatte nsi kwù, là mènntùn z'a be nju' là nsi tshob nu njoṅ ndù fa.

²⁹ Ngatshùagntù num ngù neta ntshù mèn z'a be ndaṅndaṅ nà nke nso neta num nzin mi.

³⁰ Ke zenu lo, ke zete lo, ke ntag lo ke' ku'ni netùn tu num miag Tshùaben.

³¹ Bo ke nkwi nyàmdiaṅ àm mum lé'njù ntsho, là Tshùaben nke mbèn mfà netshùa ntsho.