Tànkùt 19 - NTSHOB NSI

¹ Mebwô b'a mbwoṅ z'a be nzin ntùm nenùn nà, ntshùa mèn z'a be ntshob lamte ntshobe, mbe nkagni là.

² Neyôg ke ke nsiaṅte ke' be bwô, nganànte be mfàn ku i.

³ Bà be ngù mènntùn tshùb manze kebwô, là nke nja ntù Tshùaben ntùm ntù i.

⁴ Nkàb be mfà nshun mènntùn yàme, là mba kua' nkwi nshun mbwoṅ tum num i à netume.

⁵ Ngakwénta tatte ke nsi tum bwe banban, ngatshob tatte ke nsi yôg bwe.

⁶ Ngafà b'a ndù a ghù ghabatt'é; benntùn yàm be mbatte ngabwôntù.

⁷ Njoṅ fèt mbwoṅ fa num mbàn i, shun tse nsi sô wut num i tshùate. A ke ntshob be nu bo, mba bo ke nsi tswe nsi ju'u.

⁸ Mèn z'a ghù nkwate ntùn nà mb'a kô ko' tu wul i; mèn z'a tshùb zete là mb'a ghù fu'.

⁹ Ngakwénta tatte ke nsi tum bwe banban, ngatshob tatte nsi tsiag bwe kwù.

¹⁰ A ke' ywimte ndù nkagni yôg ntùm mebwô, a bag ntshùate mb'a be nkuan tô kamkam nà.

¹¹ Ngazete be ngom wul i num yantù, ghamte z'a ghù là b'a ndù a be nkàb fu num nu ze mèn fàn yi là.

¹² Yantù mfen b'a mba ntshu' ngwayit là, bwôntù mfen b'a mba meme' mi a num nenà là.

¹³ Nshum z'a be nkagni là be ndo' nge' njen tàab yi, ntanta tse ta' mènnzwi be ngù là b'a tshemntse s'a be nswe' ke tsin nà.

¹⁴ Ba' boa tshu b'a ntsi' mi be mèn jù tà tse là, nda' ndù nzenu mènnzwi b'a fu' se Tshùaben ke mbèn mfà là.

¹⁵ Lô be ma' mèn ntùm miaglo, nziku' nsi ya bam s'a be mbot là.

¹⁶ Mèn z'a be nze ntshù' là, ke mbéb à yôg se, mèn z'a wag mba' i là nsi kwù.

¹⁷ Mèn z'a ko ndèn mbwoṅ nà ke mfà ju à Tshùaben, a nsi ba' numebwô i yi num ju z'a ghù là.

¹⁸ Tshobte nshum o nummbe nenywinte ke' nsi, là kà ghù nkwate ndù a kwù à nekwù.

¹⁹ A bwô ndù mèn z'a be nja ntù neshu là jù bin, a be z'o kabt'é là, mb'a nsi bèn to'te.

²⁰ Ju' ntage, mbam ndù bo zi't'o, a nsi tshùa ndùlala o be miagte ntù' nzenu.

²¹ Ntàmtenu num ntù mènntùn ndù a gha' mbu! Là nda' mi Tshùaben nke mbumte.

²² Ju ze bo num mbéb mènntùn nà b'a bwôntù i; mebwô b'a ta' mbwoṅ ntshùa ngatatte.

²³ Nebwôg Tshùaben be ndo' mèn nèn yi ntùm yôg, mèn be mbe zi njwèle, nge' ke se' mbaṅ i.

²⁴ Ndô so bu i ntùm kàb, ke bèn ndo' mbèn yi njam netshag ntshu i.

²⁵ O lab ngatshabte mba nkagni nsi ghom wul i, nze nu, o tshobte ngasiaṅte mb'a nsi ju' ju z'a lo mbwô ndù a ghù là.

²⁶ Mén z'a be ma' tàab nze, ngù màab kù là, b'a ta' mén z'a be nkag tuswe fétwut là.

²⁷ Nshum àm, kà neju' ju bo tshwèt nzi't'o yi là, a be z'a nsi te o ngùanesà mbaṅ ntshob zenu là.

²⁸ Ngakwénta kebwô be ntshabte nunetsine; ntshu ghatshùagntù ke mi nukebwô à nemi.

²⁹ Nevù ntsha b'a num ze tu ghatshabte, shua' bèn nke mbéb à mvèn kagni.