Tànkùt 17 - NTSHOB NSI

¹ Mebwô b'a nefèt toṅtag ke méb ntùm fite ntshùa ta' ba' ntùn ze mbàb dun bwe, là ntanta be nsi là.

² Ngafa' z'a be nzete là num ntô nshum ndà z'a be nkag tuswe là. A nsi ghù mi ntsi' boa fèt tse.

³ Tômbwôg b'a num silba, ndà mbwôg be num gol, là mèn z'a num ndaṅte ba ntù là b'a Tshùaben.

⁴ Ngatshùagntù be nkù' ntoṅ num nkub ntshu kebwô, ngatatte nke nkù' ntoṅ num lém kebwô.

⁵ Mèn z'a tshabte mbwoṅ nà tute Mbon i; mèn z'a tshwèt nzwi njennge' là ke nsi tum bwe banban.

⁶ Bon bon ke mb'a kétmbùm ywèn benntùn ba tà ke mb'a ghamte bon tshobe.

⁷ Ta' ntshob ntùn ke' be bwô nkagni ntshob tatte num mbag ta' nkam tshùate.

⁸ Ta' nda' ke ntswe à mba loṅ tanjoṅ nà num mèn z'a ghù i là; a bèn yi be zit bag lo mb'a vù lag.

⁹ Mèn ke nkabte fu num mfànnu mb'a tshwèt ndiag shun be nsi; mèn z'a be nkwimte mfànnu là ke mfagt'a shune.

¹⁰ O be ntshobte ngasiaṅte nu tse kwag i ntshùa ntshu shua' nkù mi bo lab nkagni yi là.

¹¹ Ngatshùagntù ke ndiag z'a be tatu, là bo nsi tum tshùagntù ngantum num i.

¹² Mebwô b'a nebumte bin mbù tshwèt z'a bi bon tse là, ntshùa ta' nkagni.

¹³ Nge' ke nsi tum ntùm ndà mèn z'a be ndo' kebwô njagte mebwô yi là.

¹⁴ Neto' ntanta b'a mb'o tsho' nze ntse tshùa là; tantshu be te nsi ndù o yà sô wul o bwe.

¹⁵ Mèn z'a be nkabte mèn kebwô bo mèn z'a be mbote mèn netsin nà, tamte ntu bàa mb'a be mat ntshù' num miag Tshùaben, nu tshob be mbag i.

¹⁶ Nkàb be bu nkagni ngù à ke? Nelo' njun zenu yi ké? A ke' ghù tse nkwate.

¹⁷ Nshun ke nkô à njoṅ ndù fa, a be nda'te ndù a b'a ta' mfèle, mba ntùm nge'.

¹⁸ Mèn ze tu i ke' tsin nà be mfa'te mbam netsin tsham mèn, nke nte tshwèt num mfèl i.

¹⁹ Mèn z'a be nkô ntanta là be nkô nukebwô; mèn z'a ko'te nzendà i là ke ndiag à nevù ù.

²⁰ Mèn z'a ghù ntù kebwô là ke' ghù nefon fu' mèn ze ntshob mi ṅu'te là nsi vù ntùm nge'.

²¹ Mèn z'a bwe nkagni là ghù zwe ntù i, be tà mbabun ke tsiaṅte.

²² Ntù z'a num ntsiaṅte là b'a ta' fu ntùn, là ywèt tse nyu' vù bwe là be njumte mvôge.

²³ Ngatshùagntù be mbam nda' njamnjam num nekaṅ ba manze nunetsine.

²⁴ Zenu ke mb'a mbwe ngasiaṅte là miag nkagni ke ndôt'a tà num ntôgnjù.

²⁵ Ta' nshum z'a b'a nkagni là be mfà zwe tàab, mfà zwentù mènnzwi z'a bwe i là.

²⁶ A ke' tsin netshob mèn netsin ndù a fà nkondo, ke nelab ben nenùn mba bo kô nu ndaṅndaṅ no.

²⁷ Mèn z'a be mfi' ntshob mi là b'a ngasiaṅte. Mèn z'a be ntswe ndù kam nà be ngazete.

²⁸ Mba nkagni tswe ke tshob nu mb'a tù' nzenu, mèn z'a be ntshùb nkub ntshu mi là tù' ngasiaṅte.