Tànkùt 12 - NTSHOB NSI

¹ Mèn z'a kô ndù bo tshobt'é là mb'a kô nesiaṅte, là mèn z'a gha netswit nkùn nà mb'a b'a nkagni.

² Tshùaben be njab ntù num mèn mebwô, là Tshùaben be nso ntsha tu mèn ze nukebwô dun num i là.

³ Mènntùn ke' be lo' tshùagntù ngum wul i yi, là nga ben netsin ke nsi nyi'te.

⁴ Mènnzwi nku'ni b'a kétmbùm ndu i. Là, z'a be nkag tuswe là b'a mba nyu' là ntùm mvôg mi.

⁵ Nkwatenu ben netsin b'a mi ndaṅndaṅ, ntàmtenu ghatshùagntù b'a fùte.

⁶ Ntshob ghatshùagntù b'a ba nko' nefètte lem yi, là ntshu ben ndaṅndaṅ be ntshu' mèn.

⁷ Bo be njoṅ ma' ghatshùagntù nsi bo ke bèn mbe! ba' ben netsin ke mbe z'a be tù.

⁸ Bo ke ndèn njoṅ mèn à num ze nesiaṅte, bo num ngwag mèn z'a ghù ntù kebwô là.

⁹ Mebwô b'a mèn nebétni z'a ghù ngafa' là, ntshùa nebe ngaka'te njôg nke mbwoṅ bàn.

¹⁰ Mèn netsin be ndôte yôg nyàm tse, là kondèn ke tse ntù ghatshùagntù.

¹¹ Mèn z'a dù' ze nà là nsi ywèt bàn, là mèn z'a be ntam njam tshu banban nà tu i ke' tsin.

¹² Ngatshùagntù be nge'te ju ze ghatshùagntù lo' là, là, nga ben netsin nsi yàm ntàme.

¹³ Mo' ywi' kebwô num ntùm nukebwô nkub ntshu, là mèn netsin be ntum tse ntùm nge'.

¹⁴ Mènntùn be njwèt tàm s'a tum ntshu i là, mba we lo be nkwé nkàbfa' mbu mi.

¹⁵ Manze nkagni ke mbe num miag mi a kua' ndaṅndaṅ, là mèn z'a ne nju' là b'a nzenu.

¹⁶ Nkagni be nda'te yantù i be ndùse, là ngazete be mèn z'a be ndem tshabte là.

¹⁷ Ngatshob nenùn be ntshob nunetsine, ngakwénta tatte nke ntshob fùte.

¹⁸ Mo' mènntùn be mbe bwe, ntshob mi nke nkeb à mba ṅwi là! Là lém ghazenu nke njate ze neyate.

¹⁹ Kub ntshu s'a be ntshob nenùn nà num ngù tànntù njoṅ ndù fa. Là lém tatte, ke ngubt'a nda' njoṅ ngualag!

²⁰ Fùte num mbe ntù ben bo num nkwate nukebwô là, là tsiaṅte b'a ju ben tse bo num mfà ntag à num fite là.

²¹ Sàm nge' ke' be tsho mèn netsine, là kebwô be njab nu num ghatshùagntù.

²² Nkub ntshu mi a be ntshob tatte là be mbag Tshùaben, là ben tse bo be ngù nunenùn nà be mbwô i neshu.

²³ Ngazete be ndem ze nesiaṅte, là ntù nkagni be mbu' ngoṅ nze bà.

²⁴ Bu z'a be mfa' là nsi tô, là bu ndô nsi fà ntshub.

²⁵ Nenywin be mbe ntù mèn mb'a' fam ng'é, là ta' ntshob mebwô so tsiaṅte ntù i.

²⁶ Mèn netsin be nda'te manze ntùn nshun i, là ze manze ghatshùagntù nke ntshag yub tshwèt.

²⁷ Ndô ke' be ton ze mbàb z'a tam nà, là ju nkàb tanjoṅ ze mènntùn ghù là b'a fa'.

²⁸ Yôg num manze nunetsine. Vùkob ke' be tse num manze ze nunetsin bèn ntswe' là.