Tànkùt 11 - NTSHOB NSI

¹ Kilô kebwô be mbag Tshùaben, là mfi' netsin be mebwô yi neshu.

² Ko'tewut be nte nsi, mba mba tuswe nsi tam njam bwe, là zenu ke mbwe à ben nebétni.

³ Ze nenùn ben netsin be ntshagte yube, là tse lamte ghamfùm nke ma' yub nsi.

⁴ Fu' ke' be ywimte sàm ju num lé'njù yantù, là nunetsin be ntshu' mèn num vùkob.

⁵ Nunetsin mèn nenùn be nzwiagte ze manze, là tshùagntù ngatshùagntù be ma' i nsi.

⁶ Nunetsin ben ndaṅndaṅ be ntshu' yube, là nukebwô ghatshùagntù be ngom yube.

⁷ Ngatshùagntù be nkwù ze nenywinte bi ze, ze nebéb ben kebwô ghô ze ndùlala.

⁸ Mèn netsin be ntum tse ntshu nge' ngatshùagntù lo' ze dù'.

⁹ Mèn kebwô be ndo' ntshu i ngua' mfèl i yi, là nesiaṅte nke ntshu' ben netsine.

¹⁰ Tsiaṅte be mbe tusô ndùse ben netsin be mebwô là, bo num mbu' ngoṅ tsiaṅte ndùse ghatshùagntù kwù là.

¹¹ Ben ndaṅndaṅ be ntshùa njam mbotni mub mbù'te tusô, là ntshu ghatshùagntù nke ma' tusô nsi.

¹² Mèn z'a be ngwag mfèl i là tu i ke' tsin; là mèn z'a be nsiaṅte là ke ntswe ts'a ntshu mi'i.

¹³ Ngasa' ndàm ndù a to tsham. Là mèn z'a ghù ywèt nefite là ke ndé' ntsham à nelé'é.

¹⁴ A num mbe ndùse nezete bwoṅ nà mba ngô a' vù; là yôg b'a mum mbu ghafà ntag tse bo yàm nà.

¹⁵ Mèn z'a be njab tshwèt num mènghua là, be mfon kebwô nze; là mèn z'a be mbwôg nekwé bu mèn nà be ntswe fite.

¹⁶ Bo num mfà ghamte mènnzwi nku'ni nkàb be ntsho ben tse bo ghù neta là.

¹⁷ Mèn mebwô ke ngù mebwô à tu wul i, là ngatshùag ke ngùtni à kua' ze mbàb wut.

¹⁸ Ngatshùagntù ke ngù à ntsho'fa' nu tatte, là mèn z'a ke njwil à nunetsin nà nke ngù nkàbfa' nenùne.

¹⁹ Ndùlala nunetsin ke ndo' mèn nèn yi à ntùm yôg, là mèn z'a be mbwe njam nukebwô là be mfon vùkob.

²⁰ Ben tse bo ghù ntù kebwô là nu tshob be mbag Tshùaben, là ben tse manze tshob b'a nenùn nà be mbwô i.

²¹ A nenùne, bo ke nsi faṅ ngatshùagntù à banban ndùlala, là nzwit ben netsin nsi yôge.

²² Mbwô mènnzwi ze tu i ke' tsin nà ke ntswe à mba ngùnyàm ze bo ma' tùn ntshu i là.

²³ Ben netsin ke nkô yub à nda' numebwô, tshùagntù b'a ju ze ghatshùagntù be mbéb là.

²⁴ Mèn be mfà mb'a ko' ntù i là ntù' ngafu', mèn z'a ke mbèn mfaṅ à be bàm i là ke nkwù z'a bwoṅ.

²⁵ Ngaghù ntù mebwô nsi ywèle, bo nsi tam ntse mèn z'a be ntam ntse là.

²⁶ Ngô be nso ndon tu mèn z'a lem nsa là, là nke nso mbotni num mèn z'a tshwèt nswèn i là.

²⁷ Mèn z'a be ndiag mebwô là, be ngù benntùn yab ntù num i, là kebwô be ntsho mèn z'a tshwèt ndiag i là.

²⁸ Mèn z'a be njab ntù num tshu tse là nsi vù ù, là ben netsin nsi ke te' à be nete' mba mfu ntù là.

²⁹ Mèn z'a kag va' ntùm ndà i là, mba mi ntsi' b'a fetmbaṅ, nkagni nsi be nkuan nzenu.

³⁰ Tàm tù mèn netsin b'a ta' tù yôg, nzenu nke ndo' z'a be ntù benntùn.

³¹ A be ze mèn netsin kwè ze nkàbfa' num nsitsha' là, mb'a ke nsi ta num ngatshùagntù bo mèn kebwô tshùate ké?