Sofoni 3 - NTSHOB NSI

Yérusalém tatu neju' ntshu Nsi

¹ Nge' tu ngô z'a be nta tu, ngô z'a sagte là, nge' tu ngô ze ghafètte lem dun ntùm bwe là!

² A ke' be ju' nze mba ntshù', ke be kô ndù bo te bu num mfànnu mi. A ke' be yab ntù num Tshùaben, ke be ghebte mbaṅ ze Nsi.

³ Tse kamkam be netèl i mba ngwayit tse bo tshwèt ntshu' là; tse ghatsho'te b'a mba nzwimàntô tse bo be mbe mfetnjù, mfèt ke lé' sàm ju num nkebnjù là.

⁴ Tse ghatshob ntshob Nsi b'a ghata'te, mbe ghatatte; tse ghale'te Nsi be mbagte tshu nelàne, nke mbagte ntshù'.

⁵ Tshùaben b'a mèn netsin netèl i, a ke' be fàn nu; a be ngù ze netsho'te tum njoṅ nkebnjù fa, k'a ke tag ke be ndùlala. Là mèn z'a b'a mèn kebwô là ke' be lèn tuswe.

⁶ Me lo biagte ngôngô, nsate mub mba' nesag mi nebéb ngô yi; me lo sate tshob manze, kà benntùn ke bèn ntshùa bwe! Tshob ngô sate fafa, benntùn ke' bèn bwe, ba la' ke' bèn mbe!

⁷ Me lo tshob ndù: A lo mbe ndù o be na' mbwôg àm, nke mbam ndù me te bu num mfànnu mu, mba bo lo ke bagte dù'ntswe, mba njoṅ tshu fa tse me lo' ma'ni o yi là ke' be; là bo lo nànte mbagte njoṅ mfa' mub fa.

⁸ Tshùaben tshob ndù: Bin béb àm n'à! Bin béb àm mum lé'njù se me nsi lo tù mba ngabote là, nummbe me yab ntù àm ndù m'a' kùmte ngôngô, nkùmte nufen nzenze, num nesa tshùagntù àm num bo, njoṅ tonkèt yantù àm fa. Nummbe njoṅ nsitsha' fa nsi kù num tonkèt tshùagntù àm z'a tswe mba mbwôg là.

Nsi a' ghù benntùn kaṅ ntù tshobe; nekut Yérusalém kut nswe

⁹ Ndùlala me nsi fà nkub ntshu nelàn ntumntum, ndù njoṅ yub fa ke ntsiaṅ lén Tshùaben, nke mfa' yi mum ntshu ntshù'.

¹⁰ Ghaghamt'àm, ben tshàm tse bo sate là, nsi lo' tshu bwôntù fe tà neyoṅ nta'ntse mi à Etiopia là se' fà me.

¹¹ Mum sen lé'njù là, tuswe ke nsi bèn ko o num mfa' mu, mi o tshùa njam bwe ngù nukebwô me là; nummbe me nsi sô ben tse bo ke ndo' ka'te ntshùa ntsho yi là netèl o, yen ngelaṅ nà o ke nsi bèn ko'te wut num mbal àm ze nelàne.

¹² Me nsi faṅ nzwit mbétni, metsit nzwit netèl o, a nsi fon ndàlem mum lén Tshùaben.

¹³ Tshé' bon Israél ke nsi bèn ke fàn nu, ke bèn nke ntshob ba tatte, ntshob fùte ke nsi bèn tum ntshu bo; bo nsi fèle, fite, sàm mèn ke kamte yube.

¹⁴ Tshag nz'o tù ntùm tsiaṅte me ngon Sion! Tshag nz'o tù ntùm ṅwate me Israél! Tsiaṅte, ṅwate njoṅ ntù o fa num yu netshùa ntsho me ngon Yérusalém!

¹⁵ Tshùaben kaṅ tshunu ts'a ke nse' tsho num o là. A te ngakeban o tà ngùanesà mbaṅ o; Tshùaben mfen Israél b'a netèl o, o ke nsi bèn te lag so num nge'.

¹⁶ Bo nsi tshob mum sen lé'njù là mà Yérusalém ndù: Kà bwôg sàm ju! Sion kà mbu mu yub!

¹⁷ Tshùaben Nsi o b'a netèl o, a b'a mba ngayob ngu' là, sa'nde' z'a be njôg be. A nsi lo' o ghù ze mà tsiaṅte ndùb yi; a nsi tswe ntshu mi' ntùm nkôni; a nsi ghù ṅwate yàm num tu o.

¹⁸ Me nsi kùmte ben tse bo tswe nenywine, mbe nesà num njùa mi ndùbndùb là, ben tse bo tum netèl o là. Tuswe tshwèt ndèt yube.

¹⁹ Tshù, ngelaṅ ku' ze me nsi te bu tu ghafétt'o là; m'a' tshu' ba nke'kèt mbèn ndo' ben tse bo na' nta' yub là. Me nsi ghù ghamte be bo, lén sob ju'ni ntùm njoṅ ngô fa tse bo na' mbe bwe ntùm tuswe là.

²⁰ Tshùaben tshob ndù: Me nsi lo' zin bèn yi num yen ngelaṅ nà, me nsi kùmte zin num yen ngelaṅ nà; me nsi ghù lén sin ju'ni bin ghù ghamte netèt njoṅ nzwit benntùn fa num tsha'a, ndùse me nsi lo' kuan tsin se' yi num miag min nà.