Sofoni 2 - NTSHOB NSI

Ntag ghafà wut nsi

¹ Ghom wul o, lo' ntù o nèn tsham yi, wù ngô z'o ke' lèn tuswe là,

² ntag ndùlala mba bo nsi yoṅ o, mba nyi'nga z'a be ntôg mum ta' lé'njù là; ntag ndùlala mba tonkèt yantù Tshùaben nsi vù num o.

³ Njoṅ zin ghabétni ntùm ngô diag Tshùaben, bin tse bin be nze nkàn mi là, bin diag nunetsine, bin diag mbétni! Mo' ndù be lé'njù yantù Tshùaben tôg zin ntshùa.

Tshùagntù num ben tse bo be bag mbinyam nà

⁴ Tshù, bo nsi ghua' Gaza, bo nsi sate Askalon, bo nsi ta' Asdod tshag mà ntèn tèt nka mbwôgtshù, bo nsi fiaṅ nga Ekron nsi.

⁵ Nge' tu ben tse bo be num nkaṅ dibantse là, ngô ba Kérét, Kanaan ngô ba Filistia, Tshùaben tam ntu bu i num o, ntshob ndù: Me nsi sat'o, o ke nsi bèn ghù tsho ba la'.

⁶ Nkaṅ dibantse nsi tù' nkin nenà, mba dù'ntswe ghabéb mbwe, bo nkin mbwe num ba nyàm.

⁷ Men nkaṅ ntse là nsi b'a mi tshé' tunndà Yuda; bo nsi fèl à bwe; bo nsi fite mfetnjù ntùm tse ndà Askalon. Nummbe Tshùaben Nsi yub ke nsi lagte yube, a nsi lo' kuan tshob bèn yi njam.

Tshùagntù num ben tse bo be bag ntumnyam nà

⁸ Me ju' tshabte Moab bo tute bon Ammon, ndùse bo ke ntute nzwil àm, nke mbù' tu yub nsi ntùm ka'te num tse ndùnsi là.

⁹ A ndùlala me Tshùaben tàndà ntsho, Nsi Israél, tshob nsaṅlaṅ bwe ntshob ndù: Moab nsi be mba Gomora là, bo nsi tswe mba dù' ze nka' lo' i fa, tô ngwa, tù' kônkwa matmat. Tshé' nzwil àm nsi lagt'é, tshé' ngô àm nsi ghù i a tù' yub ju.

¹⁰ Yen nu là nsi tsho num bo num ka'te yub, nummbe bo tshabte mbèn ngùtni nzwit Tshùaben Nsi tàndà ntsho ntùm ko'tewut.

¹¹ Tshùaben nsi bag num bo tshùate, nummb'a nsi biagte njoṅ nsi fa num nsitsha'a; mba zit nsi lo ntùm njoṅ ngô fa, mba tse ngùanesà, ntùm njoṅ ngô tètntse fa ts'a ntùm ngôngô là nsi ghamt'é.

Tshùagntù num ben tse bo ntèn mba tse bo be tu là

¹² Mba bin ba Etiopia, ṅwi àm nsi lab zine.

¹³ A nsi nyit bu i tu, sate Asiria, lo' Ninive ghù ngô mèn ke' be bwe là yi, tsha' ts'a jum mba kônkwa là.

¹⁴ Bwoṅ nyàm nsi nô netèl i, njoṅ nyàm nzenze fa, ntshum mba bu'nyàm nsi tswe ntùm tse taba'. Nsaṅ nsi ke kua' num ntôndà, màla ke nkua' num nkù'ndà, nummbe bo tsho' tù bù ngua'a.

¹⁵ Tshù mb'a nsi be mum ngô tsiaṅte, z'a ke nsa' ntùm fite, nke ntshob ntù i ndù: A b'a me, kua' nda' me! Tshù là, a tù' b'a fam, dù'ntswe nyàm! Ben tse bo nsi tshùa mbaṅ i là tôte fin, tam ntu bu yub.