Sofoni 1 - NTSHOB NSI

¹ Tshù ntshob Tshùaben mi Sofoni, nshum Kushi, nshum Guedalia, nshum Amaria, nshum Ezékia ju' ndùse Yosias nshum Ammon be mfen Yuda li:

Nsi ka' netsho' kut nsitsha' fa

² Tshùaben tshob ndù: Me nsi sate njoṅ tshu fa num nsitsha'a.

³ Tshùaben tshob ndù: me nsi bagte benntùn boa nyàm, nsaṅ mfe kamànyam boa ngontse ts'a dibantse, tshu fa'te bo njoṅ ghatshùagntù fa; me nsi biagte benntùn num nsitsha'a.

⁴ Me nsi nyit bu àm num Yuda mba num njoṅ benntùn fa tse bo be ntswe Yérusalém nà. Me nsi biagte tshé' Baal ts'a tù' là yen dù' li, biagte mba lén ghafa' tse mba se ghale'te nsi.

⁵ Me nsi biagte ben tse bo be nkwim ntunkekwi' mub nsi num ntu mba' nsa mfe kamànyam, ben tse bo be nkwim ntunkekwi' mub nsi, nkàn mfe num lén Tshùaben, nkàn mfe num lén mfen yub là.

⁶ Me nsi biagte ben tse bo tam Tshùaben mvèn yub mba ben tse bo ke' be diag Tshùaben, ke be bètt'é nu là.

⁷ Bin tswe ndù kam mbwe Tshùaben Nsi! Nummbe lé'njù se ghebte, nummbe Tshùaben nabte jujù le'te Nsi. A tsho' ben ts'a tsiaṅ yub là.

⁸ A nsi be mum lé'njù jujù Tshùaben, me naṅ ntsha tu kamkam mba bon mfen, mba ben tse bo ket nzwe ghùn nà.

⁹ Me nsi naṅ ntsha tu njoṅ benntùn fa tse bo tshwèt nja' nkù'ndà là mum sen lé'njù là, mba ben tse bo ghù ndà tàfa' yub dun nefètte lem mba fùte là.

¹⁰ Tshùaben tshob ndù: Tshu'te nsi be mum sen lé'njù là nzendà ba ngontse, nekua' yàm be ntùm mo' taṅ ngô, bagni kebwô nsi be num nkônga,

¹¹ bin tsham zwe me ben tse bo be Maktésh! Nummbe bo sate ben tse bo ke nta ntàn nà, bo biagte njoṅ benntùn fa tse bo be mbate nkàb là.

¹² Num yen ngelaṅ nà me nsi lôte Yérusalém, lo' ndambo tsha' i yi. Me nsi yab nu num ben tse bo be ntàn num nkunndà mub nke ntshob ntù bo ndù: Tshùaben ke' be ghù numebwô ke nukebwô lo là.

¹³ Bo nsi lagte tshu tshob fa, sate mba' mube; bo lo kut mba' mi bo ke bèn ntswe bwe là, mbwe nkùa tse bo ke bèn nu ndu' mi là.

Lé'njù Tshùaben

¹⁴ Lé'njù Tshùaben se ndùb ghebte, a ghebte, a tshwèt nse' kua' ndende; lé'njù Tshùaben ghù bo ju' nz'é, sa'nde' tshag nz'é tù ntùm zwentù.

¹⁵ Sen lé'njù là b'a lé'njù tshùagntù. A b'a lé'njù nge', lé'njù ngùtni, lé'njù nekamte, lé'njù nesate, lé'njù tswe', lé'njù njame, lé'njù ndot, lé'njù ṅame.

¹⁶ Lé'njù se bo nsi tô nta, bu' kem ntsho mum ngô tse bo kule, bo dù' nebéb ngô ts'a sag nèn tù là.

¹⁷ Me nsi ma' benntùn ntùm nge', bo ke nzin mba ba mfùmiag là, nummbe bo ghù nukebwô num Tshùaben; me nsi sate lem tshob mba mbab là, sate mbàb yub mba nenà nsindà là.

¹⁸ Ke nkàb yub, ke gol yub lo ke nsi tshu' yube, mum lé'njù tshùagntù Tshùaben, ndùse mbwôg ghe't'é, lànghe' se nsi kù njoṅ ngô fa là; nummb'a nsi biagte njoṅ benntùn fa bo be ntswe mum ngô là ndende.