Sakaria 8 - NTSHOB NSITshùaben bù fite bo mbotni 1 Tshùaben tàndà ntsho tshob me ndù: 2 Tshùaben tàndà ntsho tshob ndù: Me ghù lànghe' ndùb ntù àm num Sion, ngù tshùagntù ndùb ntù àm num i. 3 Tshùaben tshob ndù: M'a' bèn njam mà Sion, ntswe netèt Yérusalém. Bo nsi tsiaṅ Yérusalém ndù ngô nenùne, ntsiaṅ mbat Tshùaben tàndà ntsho ndù mbat Nelàne. 4 Tshùaben tàndà ntsho tshob ndù: Ywèn bandum bo ywèn bènnzwi tswete nkaṅ manze mà Yérusalém, mbat zit lo bo kôg bu i, nummbe lé'njù yôg tshob nsi sage. 5 Bonnshum mba ngonngon nsi dun num manze ngô, ke ghag num manze. 6 Tshùaben tàndà ntsho tshob ndù: A be ze yen nu là be ze netshàm num miag tshé' yen nzwit mèn ni, mum tshen lé'njù là là, mb'a nsi be nu netshàm num miag màm ké? Tshùaben tàndà ntsho bèn mbètte. 7 Tshùaben tàndà ntsho tshob ndù: Tshù, me tshu' yàm nzwit mèn ngô ntumnyam mba ngô mbinyam. 8 Me nsi lo' yub bèn yi njam, bo tswe netèt Yérusalém; bo nsi be yàm nzwit mèn, me be Nsi yub ntùm nenùn bo nu ndaṅndaṅ. 9 Tshùaben tàndà ntsho tshob ndù: Bin so neta mum mbu mine, bin tse bin tshwèt nju' men ntshob li sènni ntshu ba ghatshob ntshob Nsi là; bo lo tum ndùse bo te tun ba' ndà Tshùaben tàndà ntsho, ngelaṅ ze bo ke nkô nekul i là. 10 Nummbe yen ngelaṅ nà lo be be, mènntùn nke mfa' nke kwé nkàbfa', nda' fa' ba nyàm ke be; fite lo ke be ben tse bo ke ntsho là mba tse bo ke ntum nà, nummbe ngakeban lo be nsi, tu wul àm lo ghù benntùn kamte netèt bo. 11 Tshùaben tàndà ntsho tshob ndù: Me ke' bèn mbe num tshé' yen nzwit mèn ni sènni à mba me na' mbe ngelaṅ z'a tôg là. 12 Nummbe tshu tse bo ywit nsi là nsi bile, nkùa fà ntàm mi, tsha' yam ntàm mi, kamànyam tum meme'; me nsi fà tshen tshu là yen tshé' nzwit mèn ni. 13 Ndaṅndaṅ, bin tunndà Yuda mba tunndà Israél na' mbe ndon netèt ngôngô là, be ndaṅndaṅ me nsi yôg zine, ndù bin tù' ghambotni. Kà bin bwôg, bin so neta mum mbu mine. 14 Nummbe Tshùaben tàndà ntsho tshob ndù: Mba me na' nkwate neghù nukebwô bin ndùse tà tsin kag yantù ntù àm, ke bèn njam num yen nu là là, 15 be ndaṅndaṅ me lo' ntù àm nèn tsham yi, ntshob ndù m'a' ghù numebwô Yérusalém bo tunndà Yuda mum tshen lé'njù li. Tshùaben tàndà ntsho bèn ntshobe. 16 Kà bin bwôg, tshù ju z'a bwô bin ghù li: Mba we lo ke ntshob nenùn mfèl i; bin ke ntsho't'a ntùm nenùn ndùse bin tswe nsém nà, ndù a lo' fite nse' yi; 17 Kà sàm mèn kwate kebwô num mfèl i mum ntù i; kà bin kô nekàn mfe tatte, nummbe me be mbàn njoṅ tshen tshu là fafa, Tshùaben bèn ntshobe. Ndé'njù netswe ke jù ju nsi tù' lé'njù jùa 18 Tshùaben tàndà ntsho tshob ndù: 19 Netswe nziku' z'a be num mbatte ṅwù kuà, mbatte ṅwù tàn, mbatte ṅwù sammbàa bo mbatte ṅwù gham nà, nsi tù' lé'njù neṅwate, tsiaṅte bo lé'njù jùa tunndà Yuda. Tshùaben tàndà ntsho bèn ntshobe. Là, bin kô nenùn bo fite. 20 Tshùaben tàndà ntsho tshob ndù: Ntumntum nsi se'e, ben tse bo tswe ntùm ngô tse ndùb là; 21 ba la' mo' ngô nsi nèn mum mo' tshob bo ndù: Bin se'e, bin se' be nèn ngamte Tshùaben, ndiag Tshùaben tàndà ntsho. Mba tu wul àm nsi nène. 22 Ndùlala ntumntum yàm bo ngô ts'a ta neshu là nsi se' diag Tshùaben tàndà ntsho Yérusalém ghamt'é. 23 Tshùaben tàndà ntsho tshob ndù: Mum tshen lé'njù là ben gham netèt njoṅ ntshob fa mi bo be ntshob ntùm ngôngô tshùbe, ṅat num tôg nzwe mèn Yuda, tshob ndù: Bag bin bèn bèn nène, nummbe bag ju' ndù Nsi num netèt bin. |
La Sainte Bible en Bamiléké-Medùmba © Alliance Biblique du Cameroun, 1993. All rights reserved.
Bible Society of Cameroon