Sakaria 7 - NTSHOB NSI

Netswe ke jù ju mba Yérusalém vù nsi là

¹ A lo be kum ngu'njù kuà mba Darius jù fen nà, Tshùaben tshob Sakaria, mum lé'njù kuà ntùm ṅwù bwe'e, z'a be ṅwù Kisle là ndù:

² Ba Bétél lo tum Scharetser bo Regem-Mélék boa njoṅ ben tshob fa nema' mbu Tshùaben,

³ mbètte ghale'te Nsi mum ndà Tshùaben tàndà ntsho mba ghatshob ntshob Nsi ndù: Bag nsi kua' num mbatte ṅwù tàn mbèn ntswe nziku' mba bag ghù fe ngu'njù yàm nà ké?

⁴ Tshùaben tàndà ntsho tshob me ndù:

⁵ Bètte njoṅ benntùn fa mum ngô bo ghale'te Nsi, a be ze bo na' ntswe nziku'u, num mbatte ṅwù tàn bo mbatte ṅwù sammbàa, num ngu'njù ṅam sammbàa à num yàm tu là!

⁶ Ndùse bin bèn nke njù, nke nu là, mba bin ke' ke njù, nke nu à be num zin tu wut ké?

⁷ Bin ke' lèn ntshob mi Tshùaben tshob mbwe ghatshob ntshob Nsi ndùse Yérusalém na' nke' tshaṅ, ba la' tse be ntùm fite, benntùn nke ntswete mà ntèn mba ntùm ba tômbo' là ké?

⁸ Yen ngelaṅ nà Tshùaben tshob Sakaria ndù:

⁹ Tshù ju ze Tshùaben tàndà ntsho tshob li: Bin ghù nu z'a tsin nà, mba we lo ghù bwôntù bo kondèn num mfèl i.

¹⁰ Kà bin fétte mfôg mènnzwi, ménntse, ngùn mba mbwoṅ; kà mèn ke nkwate nukebwô ntù i num mfèl i.

¹¹ Là, bo lo gha nekù' ntoṅ mube, nko' nshua' nkembe' mube, mfùn ntoṅ mub ndù kà sàm nu tam toṅ bo.

¹² Bo ghù ntù yub sag mba loṅ nà, ndùlala ndù kà bo ju' ntshù' bo ntshob mi Tshùaben tàndà ntsho tshob bo njam Ywèt tse mba njam mbwe ghatshob ntshob Nsi là. Ndùlala Tshùaben tàndà ntsho ya ntù num bo neshu.

¹³ Tshùaben tàndà ntsho tshob ndù: Ndaṅndaṅ mba me na' nke ntsiaṅ bo ke bùnte là, bo lo tsiaṅ me ke bùnte.

¹⁴ Me lo sate yub netèt ntumntum tse bo na' mbe ke lèn nà; ngô lo kamte ndùse bo nèn nà, ben tse bo nèn nà ke tse bo se' là lo ke bèn mbe; bo lo' ngô fu' ngù kônkwa yi.